Bu gün "Xəzər
Lənkəran” komandasının doğma Lənkərana gələcəyi və komandanın həmişəki kimi şəhərin
girəcəyində sadiq azarkeşlər tərəfindən qarşılanacağı haqqında məlumat
vermişdik. Onu da qeyd etmişdik ki, bu dəfəki qarşılanma mərasimini "12-ci
oyunçu” azarkeş qrupu ilə "Bosman” fanklubu birlikdə həyata keçirir. Komandanın
avtobusunu qarşılamağa adı çəkilən fanat qurumları ilə birlikdə xeyli sayda
fanklublara daxil olmayan azarkeşlər də qoşulmuşdular. İstidən, soyuqdan
qorxmayan, qələbə və məğlubiyyətə fikir vermədən həmişə komandanın yanında
olmaları ilə seçilən sadiq azarkeşlər, komandanın Lənkərana catacağı ehtimal
olunan vaxtdan da bir saat əvvəldən şəhərin girəcəyində yerləşən "Böyük samovar
simvolu”nun qarşısına yığışaraq qızmar iyul günəşinin altında həvəslə
komandanın gəlişini gözləyirdilər. Komandanın yeni transferləri və ümumiyyətlə "Xəzər
Lənkəran” haqqında, xüsusən "Makkabi” ilə son oyundakı hadisələrlə bağlı qızğın
müzakirələr aparan azarkeşlər, "Makkabi”ni keçəcəyimizə inandıqlarını müxtəlif
formada əsaslandıraraq buna əmin olduqlarını dilə gətirirdilər. Kimi "Makkabi”nin
səfər sindromu olduğunu dilə gətirir, kimi əsl azarkeşlik dəstəyimizin onlara "öldürücü
zərbə” olacağını deyir, kimi də komandamızın artiqa bir yerdə ikinci rəsmi
matça çıxacaqları ilə əlaqədar uyğunlaşma mənasında İsraildəki birinci oyundakı
kimi problemin olmayacağı üçün mütləq lazımi nəticəni qazanacağımıza əminliyini
əsaslandırmağa çalışırdı.
Uzun müddətdir ki, Avstriyada təlim-məşq
prosesindən sonra İsrailə "Makkabi” səfəri üzündən çoxdandır ki, doğma
komandalarını görməyə tələsən sadiq azarkeşlər, komandanın artıq Lənkərana az
qaldığını eşidən kimi daha gözləməyib, gəldikləri avtomobillərlə böyük maşın
karvanı yaradaraq "Xəzər Lənkəran” avtobusunun gəldiyi istiqamətdə hərəkətə
başladılar. Az sonra qarşı-qarşıya gələn böyük sevginin hər iki tərəfi artıq "Fırtınalar
Meydanı”na tərəf istiqamət almışdı. Yol boyu maşın karvanına qoşulan digər
avtomobillər də və stadionun önünə yığışaraq komandanı burada gözləyənlər də
böyük bir qarşılanma mərasiminin iştirakçıları oldu.
Stadionun ərazisinə
daxil olan komandanın avtobusundan düşən baş məşqçi və futbolçularımız böyük
azarkeş alqışlarına hərə öz tərzində reaksiya verirdi. Bu dəstəyi oyun gününə qədər
davam etdirməyi planlaşdıran "12-ci oyunçu” azarkeş qrupu və "Bosman” fanklubu
məşq zamanı da müxtəlif şüarlar və bannerlərdən istifadə edərək bu dəstəyi
davam etdirmək və komandamıza lazımi nəticəni əldə etmək üçün motivasiya vermək
niyyətindədir.
|