Dünən komandamız doğma Lənkəran şəhərinə döndükdən və çoxlu sayda azarkeşlər tərəfindən xüsusi qarşılandıqdan sonra vaxt tapıb məşqə də çıxmışdı. Bütün bu məlumatları qarşılanma mərasiminin təşkilatçısı olan "12ci oyunçu” azarkeş qrupunun rəhbəri İslam Cabbarlıdan əldə edərək sizlərə təqdim etmişdik.

            Bugünki məşq barəsində də İslam bəydən əldə etdiyimiz informasiyanı təqdim edirik:-"Fevralın 6-da Julius Qibrila Uobayın da qatıldığı  "Xəzər Lənkəran” komandasının  məşqinə gözlənildiyi kimi bir gün qabaqkından iki dəfə artıq azarkeş toplanmışdı. Əgər dünən 1000 azarkeş məşqi izləyirdisə, bu gün 2000-dən çox Xəzərsevər  "Fırtınalar Meydanı”nda məşqi sonacan izlədi. Stadionun qarşısında dayanan avtomobillərin sayından da bilmək olurdu ki, burdakı azarkeşlərin sayı digər komandaların Premyer Liqada keçirdiyi oyunlara gedən izləyici sayından da artıqdır.”

            Sonra İslam Cabbarlı bunları da diqqətimizə çatdırmağı özünə borc bildi:-"Xəzər Lənkəran”ın məşqini izləmək üçün  toplaşan azarkeşlər futbolçuların qeyri adi hərəkətlərini alqışlarla qarşılayırdılar. Bu da öz növbəsində futbolçuları ruhlandırırdı. Kiçik qapılarla iki tərəfli oyunlarda Mirça Rednik özü  də müdafiəçi qismində oynayırdı. Baş məşqçinin köməkçiləri  xüsusi proqram əsasında futbolçularla çalışırdılar. Komandanın yeni həkimi isə o qədər həvəsli görünürdü ki, məşq zamanı meydançanın kənarına düşən topları futbolçulara qaytaran inzibatçılara da yardım edir və mehriban kollektiv görüntüsünü yaradırdı. Məşq bitəndən sonra yüzlərlə azarkeş əsasən yeni futbolçularla fotoşəkil çəkdirdilər.”

            Sonra İslam bəy əsas meydanın vəziyyəti ilə də maraqlandıqlarını dedi. Onun sözlərinə görə komandanın oyunlarında yaranmış fasilədən stadionun personalı maksimum istifadə edərək həm təmizlik baxımından və həm də ot örtüyü baxımından ideal vəziyyət yaratmağa nail ola biliblər.