Mayın 24-nü səbirsizliklə gözləyən futbol ictimaiyyəti və xüsusən də "Xəzər Lənkəran” azarkeşləri ölkə kubokunun finalında Bakının "İnter” komandası ilə oyunda çox həyəcan yaşadılar. Hətta deyərdik ki, matçın start fitindən qalib müəyyənləşənə qədər bütün oyunboyu bir dəqiqə belə rahat nəfəs almaq mümkün olmadı. "İnter” komandası üçün Avropa yarışlarına vəsiqə qazanmaq üçün son şans olan bu matçın, onlar üçün nə qədər həyati əhəmiyyət daşıdığını fikirləşəndə və "Xəzər Lənkəran” üçün isə çempionluğun əlindən zorla alındığını bu oyunda qalib gəlməklə sübut etmək istəməsini fikirləşəndə matçın gərginliyi adamı silkələyirdi. Kubok matçının təşkilatçılığı ölkə futbol qurumları tərəfindən yüksək hazırlanmışdı. Bunun üçün təşəkkür etməyə dəyər. Klubların təşkilatçılığı baxımından da zövqverici anlar yaşadığımıza görə onlara  təşəkkürlərimizi bildiririk. Rəsmi rəqəmlərdə 24.000 azarkeşin izlədiyi bu final matçı əsl Avropa meydanlarında yaşanan bir gərgin gözəlliklə yaddaşlara həkk oldu. Burada baş hakim Fariz Yusifovun idarəçiliyi bir daha sübut etdi ki, Azərbaycanda hakimlik var. Bu gözəl idarəçilik həm də onu sübut etdi ki, mövsümboyu hakimlərdən narazılıq onların oyun idarəetmə bacarığının olmaması ilə əlaqədar deyil, haradansa gələn sifarişlərlə əlaqədar olub. Çünki son üç turda, kimlərsə istəklərinə çatdıqdan sonra hakimlikdə "sağlamlaşma” baş verdi. Bu da çox şeydən xəbər verir.

            Bu kubok oyununun finalında komandalar əsl mübarizə apardılar. Sona qədər hər iki komanda finala layiq olduğunu göstərdi. Gərginlik sona qədər davam etdi. Hər iki komanda istəyinə çatmaq üçün nizamlı oyun nümayiş etdirdilər. Lakin komandamız daha istəkli görünürdü. Bunu matç boyu daha çox topa və ərazi üstünlüyünə malik olmaqla və həm də real qol vəziyyətlərini daha çox yaratmaqla sübut edə bildi. Oyun nizam-intizamını sona qədər saxlamağa çalışdı və demək olar ki, buna nail oldu. Bütün bunlara baxmayaraq 90-dəqiqə ərzində yaradılan heç bir qol vəziyyətlərini reallaşdıra bilməməyimiz əsas vaxtın 0:0 bitməsini şərtləndirdi. Əlavə vaxt başlayan kimi Uinston Parksın mükəmməl zərbəsindən sonra önə keçən komandamız indi rəqibin məğlub olmaması üçün daha çox hücuma keçəcəyini, bununla da arxada boşluqlar buraxacağını və növbəti dəfə daha asan hesab arasındakı fərqi artıracağını düşünərək onlara oynamağa daha çox imkan yaratdı. Çox təəssüf ki, bu dəqiqələrdə müdafiədə buraxılan bəlkə də yeganə səhvimiz əksinə hesabın bərabərləşməsinə səbəb oldu. Bununla canlanan "İnter” yenə ümidlənərək həyəcanı ata bildi və ələ düşəcək hər hansı qol məqamını gözləməklə oyununu intizamlı davam etdirməyə başladı "Xəzər Lənkəran” da bundan sonra nizam-intizamını pozmayaraq əvvəlki kimi topa nəzarət edib qələbə qolunu vurmaq istəyində idi. Bax budur oyunun gözəlliyi. Futbolçular komandalarının intizamlı oyununu davam etdirərək məşqçilərinin tapşırıqlarını son ana qədər yerinə yetirə bildilər. Azərbaycan futbolu bu iki komandanın timsalında nəyə qadir olduğunu göstərmiş oldu. Lakin əlavə olunmuş dəqiqələr də 1:1 bitincə qalibin müəyyən olunması penaltilər seriyasına daşındı.

            Penaltilər seriyası böyük ölçüdə təsadüflərdən asılı olsa da, burada daha çox psixoloji hazırlıq səviyyəsi əsas amillərdən biridir ki görünür Mirça Rednik komandanı buna da düzgün hazırlaya bilmişdi. Penaltilərin təsadüfi olmasına bariz nümunə isə hətta uzaqdan cərimə zərbələrini çox gözəl və dəqiq yerinə yetirən komandamızın yarımmüdafiəçisi Elnur Abdullayevin topa zərbə anında sürüşərək yerdə qalmasını və ardınca rəqib futbolçunun vurduğu zərbənin tirin altına dəyərək lap qapı xəttinin önündə yerə toxunmasını göstərmək olar. Bu seriyanı daha dəqiq yerinə yetirən komandamız 4:2 hesabıyla (ümumi 5:3) kubokun qalibi oldu və azarkeşlərinə böyük sevinc yaşadaraq keçən il finalda ləkələnmiş kubokun ləkəsini bu il ½ finalda təmizlədikdən sonra onu başı üzərinə qaldırdı. Yaşa "Xəzər lənkəran”!

            Final matçına qədər bu yarışlarda "Xəzər Lənkəran” daha bir rekordla meydana çıxmışdı. Belə ki, ard-arda 4 dəfə finala vəsiqə qazanmaqla bu rekordu müəyyənləşdirən komandamız 3-cü dəfə ölkə kubokuna sahib çıxmış oldu. Komandanın rəhbərliyini, məşqçilər heyətini başda Mirça Rednik olmaqla və "Xəzər Lənkəran” azarkeşlərini bu münasibətlə ürəkdən təbrik edərək bildiririk ki, komandamız və onun azarkeşləri bundan daha artığına layiqdirlər. Bunu vəsiqə qazandığımız Avroliqa yarışlarında sübut edəcəyik. Növbəti daxili və beynəlxalq yarışlarda komandamıza dəstək olmaqla bir daha uğurlar arzulayırıq.