Oktyabrın 5-dən Antalyada qısamüddətli toplanışda olan "Xəzər Lənkəran” Türkiyədə olduğu sonuncu gündə "Mardan Palace” otelinin yardımçı meydançasıında ikinci yoxlama matçına çıxdı. Əvəlcədən planlaşdırıldığı kimi, rəqib superliqa komandalarından "Kasımpaşa” oldu. Matç yerli vaxtla saat 15:00-də başladı. Türkiyəli hakimlər briqadasının idarə etdiyi oyunu "Xəzər Lənkəran” bu heyətlə keçirdi: Denis Romanovs, Ruslan Poladov (Stelian Stanku), Adrian İordaçe, Veqa, Todorov, Simao (Asif Məmmədov), Katalin Doman (Alim Qurbanov), Ramazan Abbasov (Kristian Kabral), Konstantin Arbanas, Xaqani Məmmədov (Uinston Parks), Dieqo Ruis (Allan Lalin).

            "Xəzər Lənkəran”ın ilk dəqiqələrdən oyuna tam köklənməkdə çətinlik çəkdiyi hiss olunurdu. Məhz bundan yararlanan rəqibin ispaniyalı futbolçusu Valera Ramos müdafiənin diqqətsizliyindən sonra hesabı açdı. Sonrakı dəqiqələrdə, demək olar, meydanın mərkəzi uğrunda mübarizə getdi və "Kasımpaşa”lı futbolçuların kobud oynaması cənublu futbolçuları özlərini zədədən qorumaq məcburiyyətində qoydu. İlk yarıda yaddaqalan epizod kimi İordaçe və Arbanasın zərbələrinin dirəkdən və tirdən döndüyünü qeyd edək. Fasilədən sonra hər iki çalışdırıcının heyətdə əsaslı dəyişiklik etdiyini də vurğulayım. Bundan bəhrələnən isə "Xəzər Lənkəran” oldu. Açıq-aşkar rəqibindən üstün oynayan və topa daha çox nəzarət edən cənublular ikinci yarıda, demək olar, "Bakı” ilə məlum oyunun aqibətini yaşadı. Futbolçularımız ardıcıl 5 dəfə təkbətəkdən yararlana bilmədi. Xüsusi ilə Parks və Lalin şansları boşa verdi. Oyundan sonra rəqibin çalışdırıcısı, Türkiyənin tanınmış məşqçilərindən olan Yılmaz Vurala yaxınlaşıb bəzi suallara aydınlıq gətirməsini xahiş etdim. İki gün öncə Rumıniya "Panduri”sinə 4:0 hesabıyla yenilən komandanın çalışdırıcısı suallarımızı məmuniyyətlə cavabladı: "Qısa fasilədən mümkün qədər yararlanmaq istəyirik. Çempionata çox bərbad başlamışıq. Amma inanıram ki, uğursuzluq zolağından çıxmağı bacaracağıq. Nəticə mənim üçün önəmli deyil. Əsas olan taktiki cəhətdən bəzi gedişlərin yoxlanması idi. "Xəzər Lənkəran” ikinci yarıda çox yaxşı oynadı. Klubun sahibi Mübariz Mənsimov yaxın dostum və çox hörmət etdiyim şəxsdir. Bəli, mənə baş məşqçilik işi təklif olunmuşdu. Səhv etmirəmsə, onda komandanın başında Ponomaryov soyadlı rus məşqçi vardı. Amma burdakı işləri yarımçıq qoya bilmədim. Sizdə də əcnəbi məşqçilərə üstünlük verirlər. Türkiyədə həmişə bunun əleyhinə çıxmışam və hələ də çıxıram. Elə millinin başında bir almanın olması da düzgün deyil. Sizdə baş məşqçilik edəcək layiqli məşqçi yoxdu? Baxın, bizim başımıza Hiddink nə oyun gətirir (söhbət millilərin oyunundan öncə olub).

             "Xəzər Lənkəran” Antalya toplanışını böyük hesablı qələbə və minimal hesablı məğlubiyyətlə başa vurub çərşənbə axşamı vətənə döndü. Birgünlük istirahətdən sonra cənub klubunun "Gəncə” ilə oyunun hazırlığına başlayacağı planlaşdırılıb.

Hüseyn Cəbrayıloğlu.                      

"Futbol+” qəzeti 14 oktyabr 2010.