"Xəzər Lənkəran” klubunun yenə də iddialı olaraq yaşayacağı haqqında fəxri prezident Mübariz Mənsimovun azarkeşlərin ürəyincə olan qərarından sonra komanda yeni mövsümün hazırlıqlarına başlamaq üçün doğma Lənkəran şəhərinə qayıtdı. Komandamızın əksər üzvləri dünən paytaxtda bir araya gəldikdən sonra bu gün səhər saat 11 radələrində Bakıdan Lənkərana klubun avtobusu ilə yola düşmüşlər. Saat təxminən 14 radələrində avtobusun Lənkəran şəhərinə çatacağı haqqında məlumat alan azarkeşlər, şəhərin girəcəyindəki böyük Samovar simvolunun yanında yığışaraq komandanın gəlişini gözləmişlər. Qarşılama mərasiminə çıxan xeyli sayda "Xəzər Lənkəran” azarkeşi burada toplaşmış, lakin bəzilərinin səbri çatmadığından komandanın gəldiyi istiqamətdə, hətta Masallıya qədər hərəkət etmişlər. Burada onlar komandanı gözləyən Masallı "Xəzər” sevərləri ilə birləşərək avtobusu qarşılamış və birlikdə Lənkəran istiqamətində hərəkət etmişlər. Lənkəran şəhərinin girəcəyində bayaqdan gözləyən azarkeşlər komandanın avtobusunu saxlayaraq avtobusa daxil olmuş, komandanın futbolçuları ilə görüşmüşlər.

            Daha sonra maşın karvanı ilə "Fırtınalar Meydanı”na hərəkət etmişlər. Burada da onları gözləyən xeyli sayda azarkeş komanda üzvlərini mehribanca qarşılamışlar. Komandanın yenidən doğma məkana qayıtması sevinci qarşılayanların üzündəki sevinc və məmnunluq hissindən aydın görünmüş olub. Onu da qeyd edək ki, komandanı qarşılayan xeyli sayda azarkeşlərin içərisində "Bosman” fan klubunun üzvləri də iştirak etmiş və xüsusi banner ilə buna rəng qatmışlar. Onlar, avtobusun "Fırtınalar Meydanı”na gedən yolunun üstündə şəkildə gördüyünüz banneri açmışlar.