"AZAL”la oyunda meydana sonradan çıxan Elvin Beqirinin möhtəşəm cərimə zərbəsi sayəsində 3 xal qazanan "Xəzər Lənkəran”ın çalışdırıcısı Mirça Rednik yetirmələrinin, ilk növbədə komandaya özünün cəlb etdiyi həmyerlilərinin çıxışından narazı qalıb. Hətta oyundan sonra komandanın məskunlaşdığı oteldə Stelian Stanku, Katalin Doman, Adrian İordaşe və daha bir neçə futbolçunu otağına çağıran rumıniyalı çaləşdırıcı onlarla yüksək tonda və sərt şəkildə danışıb.

          Rednikin narazılığının başlıca səbəbi odu ki, komandaya şəxsən cəlb etdiyi futbolçular "ağ-yaşıllar”ı gözlənilən səviyyədə gücləndirməyib. Topla əla rəftar etməyi bacaran Domanın fərdi oyuna həddən artıq aludə olması, Stankunun "AZAL”la qarşılaşmada bir dəfə də rəqib üçün təhlükə yarada bilməməsi, Dieqo Ruisin meydanda varlığı ilə yoxluğunun bilinməməsi, Parksın iki real qol şansını qaçırması məşqçinin həyəcan təbili çalmasına səbəb olub. Rednik futbolçulardan işə münasibəti dəyişməyi və məşqlərdə daha əzmlə çalışmağı tələb edib. 48 yaşlı məşqçi başa düşür ki, komandanın oyununda keyfiyyət dəyişikliyini yeni futbolçular yaratmalıdı. Hələlik isə nəticələrə baxmayaraq, "Xəzər Lənkəran”ın oyunu sönük təsir bağışlayır və Rednik bu problemi aradan qaldırmaq fikrindədi.

          Yeri gəlmişkən, təsadüfi deyil ki, təxminən bir ay öncə transferə çıxarılmış Emeka Opara yenidən komandaya qaytarılıb. Aldığımız bilgiyə görə, rumıniyalı mütəxəssis "AZAL”la oyunda hücumun "dişsizliyini” gördüyündən klub prezidentindən nigeriyalını heyətə qaytarmağı xahiş edib.

          Mənbə: "Futbol+” qəzeti   (04-05 sentyabr, 2010)