Futbol çempionatımızda yaranmış fasilə yekunlaşmaq üzrədir. Futbolu az-çox yaxından izləyənlər bilirlər ki, Avropada bu fasilə milli komandaların oyunları ilə əlaqədar olaraq yaranmışdı. Belə ki, Polşa və Ukraynada keçiriləcək olan Avro-2012-nin final mərhələsinə vəsiqə verən bir çox yerlər məlum olsa da, qalan yerləri seçmə mərhələdə qruplarında ikinci yer tutan komandalar arasında keçirilən oyunlar müəyyənləşdirəcəkdi. Bu mənada Azərbaycan millisinin də yer aldığı qrupda ikinciliyi əldə etmiş Türkiyə milli komandası Xorvatiya sınağından qalib ayrılmalıydı. Bir daha qeyd edək ki, kimi Avro-2012-nin final mərhələsinə vəsiqə üçün çalışaraq, milli çempionatlarına fasilə vermişdi, kimi də "böyüklərin” yaratdığı bu fasilədə kölgədə qalaraq yaranmış imkandan istifadə edib yoldaşlıq görüşləri keçirməyə ya imkan tapmış, ya da vadar olmuşdu.

            Bu "pley-off” yarışlarında Azərbaycanda ən çox maraq göstərilən oyun isə Türkiyə-Xorvatiya matçı idi. İki qarşılaşmadan ibarət olan bu raunda niyə matçları yox, matçı dediyimizin də səbəbi odur ki, artıq ilk qarşılaşmada, səfərdə oynamasına baxmayaraq, elə birinci görüşdə 0:3 hesabı ilə qalib gələn Xorvatiya millisi demək olar ki, məsələni həll etmiş sayılırdı. Ona görə də cavab qarşılaşması özündə elə də maraq saxlamamışdı.

            Oyunların keçiriləcəyi tarix 11. 11. 2011-ə təsadüf etdiyindən, mətbuatda 11. 11. 11 kimi işıqlandırılan bu matçlardan birincisi bizim yerli vaxtla gecə saat 11-ə təsadüf etdiyindən bura daha bir "11” əlavə etmişdilər. Türkiyə millisinin çətin də olsa, bu matçlarda qələbə qazanmasını istəyərək, biz də bura daha başqa iki "11” əlavə etmişdik. Belə ki, hər iki komandanı uğura daşıya biləcək 11 futbolçunu qeyd etmək istərdik. İkinci "11” isə bir qədər əvvələ, yəni 2008-ci ilə qayıtdıqda yada düşürdü. Belə ki, bu komandalar arasında 2008-ci il Avropa Çempionatının ¼ final mərhələsində qalibi oyunsonrası penaltilərlə, yəni 11 metrlik zərbələrlə müəyyən etmək mümkün olmuşdu. O zaman Fatih Terimin başçılıq etdiyi Türkiyə millisi çətinliklə də olsa, gənc Slaven Biliçin komandasına qalib gələ bilmişdi. Elə o zaman tək Türkiyə ilə oyunda yox, keçirdiyi bütün qarşılaşmalarda Slaven Biliçin məşqçi kimi də böyük bir istedad olması hamımıza məlum olmuşdu. Bu dəfəki Türkiyə ilə ilk oyunda Slaven Biliçin başçılıq etdiyi komanda 0:3 hesablı səfər qələbəsinin final fiti səslənən zaman adamın fikrindən "Sən nə etdin? oy Biliç” ifadəsi keçdi.

            Bu həmin Biliçdir ki, futbolçu karyerasına vətənində, "Hayduk” komandasında başlayıb. Sonradan alman klubunda və daha sonra İngiltərənin tanınmış klublarında çıxış etməklə davam edib. Məşqçilik karyerası isə öz vətənində "U-21”-ə başçılığı ilə başlayıb. Burada da uğur qazandıqdan sonra əsas milliyə dəvət olunub. Slaven Biliçin əsas millidə də uğurları göz qabağındadır. Hətta onun istedadlı bir mütəxəssis olması bütün dünyada qəbul olunduğu kimi Almaniya klublarını da özünə cəlb etmişdi. Belə ki, məşhur alman klubu olan "Şalke” bir qədər əvvəl ona təklif də göndərmişdi. Lakin Biliç bu təklifi belə cavablandırmışdı: "Mən fəxr edirəm ki, belə bir böyük klub mənimlə maraqlanır. Bunun üçün onlara təşəkkürümü bildirirəm. Amma mənim bütün arzu və planlarım bütün bacarığımı sərf edərək, doğma milli komandada işləmək və uğur qazandırmaqdır.”

            Başqa tərəfdən yanaşsaq,  ölkəmizin ərazisində bu matçın canlı yayımlanması futbol reportajından çox, kommersiya maraqlarına sanki xidmət edirdi. Reportaj zamanı futboldan çox futbol proqnozundan necə qazanmaq olar və bunun üçün ölkəmizdə hansı vasitələrin olduğu və mobil operatorların sanki bütün tarif paketləri və sair dəqiqələrlə sadalanırdı. Buna əlavə olaraq Türkiyədən birbaşa danışan şərhçimiz isə yanında olan və bir zamanlar Türkiyə futbolunun əfsanələrindən sayılan Rıdvan Dilmənin millinin hal hazırki çalışdırıcısı Qus Hiddinkdən narazılığını bizim efirə də çatdırması, diqqətlərdən yayınmadı. Həm də ona görə yayınmadı ki, bizim şərhçinin dediyinə görə, Rıdvan Dilmən, Hiddinkin yerinə Türkiyə millisinin başına Berti Foqtsu gətirməyin lazımlılığından danışdı. Görəsən həqiqətənmi belə bir dəyişiklik Türkiyə millisini gücləndirə bilər? Belə çıxır ki, Türkiyə üzərində 1:0-lıq qələbəmiz, Rıdvan bəyi bu qənaətə gətirib. Nə demək olar? Təki qardaş ölkənin millisi güclənsin. Qaldı ki, bizim millinin də güclənməsində Biliçli Xorvatiya millisinin təcrübəsindən yararlanmaq olar. Məsələn, yaş fərqi ilə təxminən Biliçlə eyni olan Azərbaycan futboluna və potensialına bələd istedadlı yerli mütəxəssislərimizdən biri Qurban Qurbanova bu postda güvənmək olar. Ən azı Biliçli Xorvatiya təcrübəsindən istifadə etməklə. Yəni əvvəlcə heç olmasa, Qurban bəyə milli təcrübəsi artsın deyə "U-21”-i tapşırmaq olar. Özünü doğruldacağı təqdirdə isə əsas milli komandanın başına gətirmək mümkündür. Bu bütün şübhələrə də son qoyar ki, bizdə bu postda işləmək üçün milli kadr yetişir yoxsa, yox.