Bəli, arzuladığımız kimi bu ilin ilk səfər qarşılaşmasından, 2-ci tur çərçivəsində Zaqatala şəhərinin "Simurq” klubuna qarşı keçirilən matçda komandamız iki cavabsız top vuraraq üç xalla dönməyi bacardı. Bununla da "Xəzər Lənkəran” evdə bu mövsümə uğurla başladığı kimi, səfər oyunundan da uğurla döndü. İndi 21 avqustda yenə evdə keçirəcəyi son çempion "İnter”ə qarşı oyunda komandamızdan daha sanballı bir oyunun nəticəsində qələbə gözləyirik. Bununla da elə ilk turlardan cəmi bir top fərqinə görə liderlik edən "İnter”i taxtdan salıb, ən yüksək pillədə oturmaq və sonacan da ilk pilləni heç kimə güzəşt etmədən, orada qərarlaşmağı hədəf seçməliyik. Baş məşqçimizin də fikirləri deyəsən buna yaxın fikirlərdir. Bu oyunun əhəmiyyətini dəyərləndirərək Mirça Rednik Zaqatalada oyundan sonra verdiyi açıqlamada azarkeşlərin dəstəyinə də güvəndiyini vurğulamaqla, komandanın azarkeşlərinə səslənib: - "Bugünki nəticəyə görə sevinirəm. Ancaq oyunumuz heç də asan keçmədi. Açığı "Simurq”un belə çıxış edəcəyini gözləmirdim. Komandamızın oyununda müəyyən çatışmazlıqlar var. Bu xüsusilə hücum xəttinə aiddir. Kosta Rika yığmasının hücumçusu Parksla sabah müqavilə imzalayacağımız nəzərdə tutulub.

          Bu oyunu unudub "İnter”lə oyunu düşünməliyik. Lənkəranlı azarkeşlərin həmin qarşılaşmada tribunaları dolduracağına inanıram”.   

          Komandamızın get-gedə məzmunlu oyun sərgiləməsi, ardıcıl iki qələbə qazanması və yeni futbolçuların cərgəyə qoşulması onsuz da say və keyfiyyət etibarı ilə ölkədə sayılıb-seçilən azarkeşlərimizdə hədsiz maraq oyatmış və Rednikin arzuladığı kimi, nəinki "İnter”lə oyunda bundan sonrakı bütün oyunlarda tribunaların tam dolması gözləniləndir. Odur ki, siz layiqli, məzmunlu oyununuzu davam etdirməklə qələbələr seriyanızı davam etdirin. Azarkeşlər həmişə səninlədir- "Xəzər Lənkəran”!