Razmer anlayışı milli dərk qavramında ölçü deməkdir. Nə isə biz o qədər öyrəşmişik ki, dükan-bazara gedib bir şey almaq istəyəndə, "bunun ölçüsü neçədir” əvəzinə, çox vaxtı "sizdə filan razmez, filan şey” var? Deyə soruşuruq. Bir də nə isə, şimallı və qərbli olmaq yanğısındandır, nədəndirsə, nəinki ölçünü razmer etmişik, hətda onun parametrlərini də itirmişik. Burda parametr sözünü, riyazi anlamı olduğundan işlətsək qəbahət etmərik. Necə ki, futbola "ayaq topu” yox, elə futbol deyirik. Beynəlxalq terminlərin də öz yeri var.

            Razmer məsələsinə gəldikdə isə çox maraqlı faktlar ortaya çıxır. Məsələn, futbol meydançasının FİFA tərəfindən qəbul olunmuş razmerləri, bağışlayın ölçüləri, iki standartda olur. Ölçülər aşağıdakı kimi qəbul olunub: Futbol meydanı düzgün dördbucaqlı şəklində olub yan xətlərinin uzunluğu digər iki tərəf olan qapı xəttinin uzunluğundan daha çox olmalıdır. 

Uzunluq: ən az 100 yard (90 metr), ən çox 130 yard (120 metr)

En:          ən az  50 yard (45 metr),   ən çox 100 yard (90metr)

Beynəlxalq matçlarda isə:

Uzunluq: ən az 110 yard (100 metr), ən çox 120 yard (110 metr)

En:           ən az 70 yard (64 metr),    ən çox  80 yard (75 metr) olmalıdır.

 Təbii ki, futbolun yaradıcısı İngilislər olduğundan ölçülər də onların vahidləri ilə hesablanır. Bu meydançanın uzununa hər iki əks tərəfində müəyyən edilmiş ölçüdə qapı deyilən 4 tərəfi torla, bir tərəfi torpaqla, yəni ot örtüyü ilə və nəhayət 6-cı tərəfi də açıq olur. Açıq olur deyəndə ki, start fiti anından final fitinə qədər bu açıq tərəfi qolkiper, yəni qapıçı qoruyur. Qapı, qapı xəttinin tam ortasında olmaqla, iki, maksimum 12 sm qalınlıqda dördbucaq və ya dairəvi, 24 fut (7.32 metr) aralıqda, dirəklərdən ibarət olub, üstdən yerlə məsafəsi 8 fut (2.44 metr) eyni qalınlıqda və yan dirəklər formasında tirlə birləşdirilir. Bu 17.8 metr kvadrat sahəni qorumalı olan qapıçının isə ölçüləri təbii ki ingilisləri maraqlandırmayıb. Bu ölçüləri onlar məşqçilərin ixtiyarına buraxaraq onlara seçim imkanı veriblər. Təbii ki, məşqçilər də digər futbolçuları seçərkən fikir verdikləri ölçülərə, futbolçunun bacarıfını, peşəkarlığını və həmçinin baş (ağıl) ölçülərini də nəzərə alırlar. 

Bundan başqa oynanılan topun ölçüləri, qapıçı meydançasının, cərimə meydançasının və hətda cərimə zərbələri zamanı canlı çəpərin cərimə zərbəsi vurulacaq nöqtədən hansı məsafədə olamsı, penalti nöqtəsinin qapı xəttindən hansı məsafədə, hansı yerdə olması da hamısı rəsmi ölçülər vasitəsi ilə tənzimlənir.

Futbolda müxtəlif ölkələr təmsil olunduğundan onların futboldakı "ölçüləri” heç də bu ölkələrin ərazi ölçülərinə görə deyil. Məsələn, Hollandiya, Danimarka, Rumıniya, Xorvatiya və sair ölkələrin ərazi ölçüləri, Çin, Hindistan, Qazaxıstan, Türkmənistan və Azərbaycanın ərazi ölçülərindən xeyli kiçik olsa da, futbolundakı "ölçülər” xeyli böyükdür. Bu ölçü deyilən zat alisi elə bir şeydir ki, müxtəlif ölkələrdə futbolu idarə edən və futbolla məşğul olan zat alilərinin futbol biliyinə də tətbiq olunmalıdır ki, həmin ölkələrin futbol "ölçüləri” də böyüyə bilsin.      Azərbaycan və bəzi ölkələrin futbolunda başqa ölçülər də tətbiq olunur ki, bu barədə ingilislər məlumatsız olduğundan heç bir ölçü vahidi də tətbiq etməyiblər. Əgər tətbiq etsəydilər bu yəqin ki, mil və ya daha böyük ölçülərlə hesablanmalı idi.

Müxtəlif yerlərdə tətbiq olunan müxtəlif ölçülü torbaların  olduğu da məlumdur. Torba yumşaq materialdan olub, hər tərəfdən bağlı, yalnız ağzı büzülən iplə məhdudlaşan bir vasitədir. Bundan müxtəlif məqsədlər üçün istifadə olunduğundan razmerləri, bağışlayın ölçüləri də müxtəlif olur. Futbolda tətbiq olunan belə torbaların faktiki materialı olmasa da xəyali, möhkəm və zəif "materialdan” hazırlanmış əsasən isə müxtəlif razmerləri, bir də bağışlayın ölçüləri olur. Bu məşq zamanı istifadə olunan topları yığmaq üçün işlədilən torba olmasa da, hətda məşq zamanı da tətbiq olunan bir vasitədir. Bu xəyali torbaları tikən "dərzilər” heç vaxt tək olmur bu işi "dərzilik sexi”ndə birlikdə görürlər. Futboldakı "ölçüləri” bizdən qat-qat böyük olan ölkələrin böyük ölçülü futbol biliklərinə malik olan mütəxəssisləri də, bizim "dərzilik sexi”nin hazırladığı bu torbalara rahatca da olmasa, güclə, xeyli köməkçilərlə birlikdə yerləşdirilə bilir. Ancaq haqq və ədalət ölçüsü deyilən bir meyar da var ki, bir çox torbaları boşaldıb büzüşdürərək daha başqa bir torbaya yığır və ağzının ipini də bərk bağlayır.

Razmer bir də bağışlayın, ölçü məsələsi daha çox yerlərdə tətbiq olunur ki, bunu transfer işinə də aid etmək olar. Məsələn, transfer məsələsi vaxtla açıldığı kimi vaxtla da bağlanır ki, bu vaxt da ölçü ilə hesablanır. Transfer məsələsi parayla həll olunduğundan burda da bir çox ölçü vahidləri öz sözünü deyir. Bir də qaldı pəncərənin öz ölçülərinə, bu da müəyyən vahidlərlə ölçülür. Bizimkilər də pəncərədən toz və milçək gələ bilər deyə torla məhdudlaşdırıblar. Amma deyilənə görə transfer etmək istədikləri Dəhşət Superinyo və Super Dəhşətoviçlərin razmerləri, bağışlayın bu dəfə pardon, ölçüləri o qədər böyükdür ki, transfer pəncərəsini yox, transfer qapılarını da taybatay açsan, ordan keçib bura gələ bilmirlər. İndi hamı fikirləşir ki, bu lənətə gəlmiş ölçüləri necə böyüdək ki, qapı-pəncərə bağlanana qədər onları bu tərəfə keçirmək mümkün olsun. Bir də ki, tutalım ki, keçdi, bəs onların baxışdan keçə bilmədiyi halda geri qaytarmaq kimi müşkül bir məsələ də açıq qalıb ki, bu açıqlığın razmeri, pardon ölçüsü də hər hansı vahidə sığmır.