V turun mərkəzi oyunu "Böyük Oyun” idi. Böyük oyunda bir sıra statistik göstəricilər dəyişə biləcəkdi. Belə ki, bu iki komanda arasında 22-ci oyun keçiriləcəkdi. Ümumi götürdükdə çox az fərqlə "Neftçi” komandamızı üstələyirdi. "Xəzər Lənkəran” bu oyunlarda 5 qələbə qazanmışdısa, "Neftçi”nin bu göstəricisi 6 idi. Bu komandaların arasında keçirilən oyunlarda ən çox qeydə alınan nəticə heç-heçə sayılır ki, bunların da sayı 10-a bərabərdir. Qaldı ki, top fərqinə, bu göstərici də 19-19 bərabərliyində idi. Belə ki, V turda "Xəzər Lənkəran”ın qazanacağı qələbə, əvvəlki, qələbələr sayını bərabərləşdirəcəkdi və aydın məsələdir ki, istənilən hesablı qələbə, top fərqində komandamızı Böyük Oyunlarda statistik olaraq önə keçirəcəkdi.

Çox şadıq ki, bu belə də oldu. Sevimli komandamızın "Neftçi” üzərindəki 1:0-lıq qələbəsi, bu üstünlüyü ələ keçirməyimizə şərait yaratdı.  Belə ki, bugünə olan nəticəyə görə 22 oyundan sonra balans "Xəzər Lənkəran”ın xeyrinə dəyişdi: 22-Oyun, 6-Qələbə, 6-Məğlubiyyət, 10-Heç-heçə, 20-vurulan top, 19- buraxılan top. Ümid edirik ki, növbəti Böyük Oyunlarda bu nisbət həm qələbələrin sayında, həm də vurulan topların sayında böyük ölçüdə komandamızın xeyrinə dəyişəcək.

Böyük oyun öncəsi, bir sıra yaddaqalan məqamlar da olmuşdu ki, bu da hər iki komandanın baş məşqçilərinin iddialı açıqlamaları və söz atışması kimi mətbuatda işıqlandırılmışdı. Belə ki, komandamızın baş məşqçisi Mirça Rednikin bu oyuna xüsusi olaraq hazırlaşırıq. Çünki, azarkeşlərimiz "Neftçi” ilə oyunlara xüsusi yer verir və yalnız qələbə istəyirlər deməsi deyəsən, rəqib baş məşqçi Böyükağa Hacıyevi hövsələdən çıxarmışdı. Əvəzində o da buna bu cür reaksiya vermişdi: ”Mən çox istərdim öyrənim, Mirça Rednik xüsusi hazırlıq deyəndə nəyi nəzərdə tutur? Futbolçular eninə, ya dal-dala qaçır?”

Yox, Böyükağa müəllim futbolçular nə eninə qaçır, nə də dal-dala. Onlar futbolda ən arzuolunmaz məqamlardan biri kimi, öz qapılarına qol vuraraq avtoqol müəllifi olurlar. Bunu sizə Mirça Rednik yox, öz futbolçunuz Ruslan Abışov başa saldı. Bundan inciməyin belə hallar futbolda olan şeylərdir. Sizlərə bizdən başqa komandalarla keçirilən oyunlarda uğurlar arzulayırıq.

"Xəzər Lənkəran” bu mühüm qələbəsi ilə şəriksiz liderliyini də qorumuş oldu. Belə ki, komandamız 5 oyundan 13xal toplayaraq, ilk pillənin sahibi kimi mövqeyini qorumuş oldu. Bu beş oyunda cəmi bir heç-heçə edən komandamız qalan görüşləri qələbə ilə başa vurub və məğlubiyyət acısı yaşamayıb. İnşAllah növbəti çətin Quzanlı səfərindən də qələbə ilə qayıdarıq və liderliyimizi yenə də davam etdirərik.