XV tur ölkə çempionatında maraqla gözlənilirdi. Bizim üçün bu maraq daha da güclü idi desək heç də yanılmarıq. Bir tərəfdən zirvə uğrunda yarış baxımından bu turun əhəmiyyəti böyük idisə, digər tərəfdən komandamızın və ölkə futbolunun keçən mövsüm "yaddaqalan” məqamlarından biri olan "Bakı” ilə oyunla bağlı idi.

            Bu tura qədər zirvə ilə cəmi bir xal fərqimiz var idi. Həm də bu turda zirvədə qərarlaşan "Neftçi” komandasının "Qarabağ”la çətin oyunu var idi ki, burda da liderin xal itirmə ehtimalı böyük idi. "Qarabağ” klubu bu matçı rəqibindən üstün keçirsə də nə yazıq ki, məğlubiyyətlə üzləşdi. Rəqib komandaya nisbətən daha istəkli görünən və bunu öz oyunu ilə də ortaya qoymağı bacaran, həmçinin rəqib qapısı önündə kifayət qədər qol vəziyyətləri yaratmasına baxmayaraq "Qarabağ” bunlardan heç birindən istifadə edə bilmədi. Amma müdafiəsinin səhvi ucbatından qapısından bir top buraxmaqla məğlubiyyətə düçar oldu. Son zamanlar müəyyən problemlərinin olması aydın sezilən "Qarabağ” hesabda olmasa da oyun planında bu matçı üstün keçirməyi bacardı. Məğlubiyyət isə təbii ki, rəqibə üç xal qazandırmış oldu.

            Beləliklə, bundan bir gün əvvəl komandamızın "Bakı” ilə səfər bərabərliyindən əldə etmiş olduğu bir xal, zirvə rəqibimizin isə "Qarabağ” üzərindəki qələbəsi sayəsində əldə etmiş olduğu üç xal birinci pillə ilə bir xallıq fərqimizi yenə böyüdərək üç xala çatdırmış oldu. Hələ onu da deyək ki, "AZAL”ın da bu turdakı qələbəsi sayəsində xallarını bizimlə bərabərləşdirməsi vəziyyəti bir az da mürəkkəbləşdirmiş oldu. Lakin hələ qarşıda çox matçlar var və hər iki komanda ilə öz aralarındakı oyunda qazanılan qələbə "Xəzər Lənkəran”ın zirvəyə yerləşməsinə bəs edər.

            Keçən mövsümün komandamız üçün yaxşı olmayan mənada, həm çempionluğun son anda əldən verilməsi, həm də məlum "Fair Play kubok finalı” "Bakı” klubu ilə münasibətlərin aydınlaşması baxımından bizim üçün çox əhəmiyyət daşıyırdı. Amma bu mövsüm təsnifat mərhələsinin Lənkəranda keçirilən ilk oyununda olduğu kimi yenə də şanslı "Bakı” məğlubiyyətdən yaxa qurtara bildi. Birinci hissəni üstün keçirən "Xəzər Lənkəran” Stellian Stankunun gözəl ötürməsi ilə Uinston Parksın eyni gözəlliklə vurduğu qol sayəsində önə keçməyi bacardı. Birinci hissə elə bu hesabla da bitmiş oldu.

            İkinci hissədə təzyiqi nisbətən azaldan komandamız get gedə oyunda təşəbbüsü rəqibə vermiş oldu. Görünür hesabda rəqibin geridə olduğunu düşünən komandamız, onların istər istəməz hücuma atılacağını fikirləşərək bir neçə belə momentdə əks hücum taktikasını həyata keçirmək niyyətində idi ki, bununla da növbəti qolunu vurub oyunu qalib bitirmək istəyirdi. Amma həmişə istədiyin, düşündüyün kimi olmur deyimi burda da öz işini gördü. Beləliklə, "Bakı” ilə olan haqq-hesab yenə də uzanmış oldu. İndi biz "Xəzər Lənkəran” azarkeşləri kimi "Bakı”nın "6-lığ”a düşməsini arzulamalıyıq ki, onlarla daha iki oyuna çıxa bilək və gözəl qələbələr sayəsində keçən mövsümün haqq hesabını "çürütmüş” olaq. Yoxsa hesab məhşərəmi qalacaq? Təbii ki, "6-lıq” oyunları qış transfer dönəmindən sonraya təsadüf edəcək. Bu dönəmdə isə komandamızın uğurlu transferlər etməklə Avropa səviyyəli oyun sərgiləməsini hava və su kimi gözləyirik.

            Daha iki məqama toxunmaq istərdik. Bu məqamlardan biri hakimin rəqibə simpatiyası kimi dəyərləndirilə bilər. Digəri isə oyunu canlı nümayiş etdirən "Aztv” telekanalının yenə tamaşaçılara və idmanımıza hörmətsizliyi kimi qiymətləndirilə bilər. Belə ki, matçın son  dəqiqələrinin həyəcanını, canlı reportajı kəsib, "xəbərlər” proqramı verməklə azarkeşlərin bu həyəcandan məhrum edilməsi məsələsi də ilk belə hal deyildi. İşini peşəkarcasına qura bilməyən telekanal yenə qeyri-peşəkarlıqla yadda qaldı.