Artıq ikinci təsnifat mərhələsindəyik. Birinci təsnifat mərhələsini keçəcəyimiz təqdirdə  bilirdik ki, növbəti rəqibimiz elə "Lex” olacaq. İlk etapda illər boyu arzuladığımız mərhələ adlamaq düşüncələrinə elə qapılmışdıq ki, sanki hər şey yaddan çıxmışdı. İkinci mərhələnin startına bir həftə interval olduğundan bunun təxminən üç gününü sevinc hissləri ilə yaşamış olduğumuzdan, bir də ayılıb gördük ki, "Lex”lə oyuna da cəmi üç gün qalıb. Polşa təmsilçisi isə Estoniyanın "Nomme Kalyu”su deyil deyə, adamın bir anda sanki nəfəsi qaraldı. Silkələnib özümüzü ələ almağa çalışdıq. Yadımıza ilk mərhələni keçəcəyimiz təqdirdə, növbəti daha məsuliyyətli ikinci mərhələ üçün, bir-iki, komandanın gücünə güc qatacaq transferlərin olunacağı sözü düşdü. Özümüzə gəldiyimiz andan gözlərimizi dörd açaraq, qulaqlarımızı daha uzaqlara köklədik. Amma sifariş ərizəsinin tərkibinin yenilənməsinə saatlar qala nə gözlərimizlə bu transferləri gördük, nə də rəsmi olaraq hansısa adlar qulaqlarımızı cingildətdi. Bu arada qulaqlarımızın tam sakit qaldığını da deyə bilmərik. Çünki, rəsmi olmasa da, bir çox məşhur adlar qulaqlarımızı qeyri rəsmi də olsa cingildətmişdi. Gözlərimiz isə yalnız "youtube”dakı kadrları izləməyə, bir də "vilkipedia”dakı məlumatları oxumağa enerji sərf etmişdi. Kimisi, kiminsə məsələsinin ciddi ölçüdə həll olunduğunu deyirdisə, başqa birisi elə həmin futbolçuyla qeyri-ciddi olaraq maraqlandıqlarını deyirdi. Beləcə vaxt artıq bitmək üzrədir. Türk qardaşlarımız demişkən geri sayım başladı artıq. Əslində buna bizsayağı, "geridə sayım” demək daha düzgün və məntiqli alınır. Komanda ilə nəfəs alan insan kimi hələ də düşünmək, bəlkə də özünü aldatmaq istəyirsən ki, ola bilməz, yəqin ki, söz verilən futbolçular alınıb. Sadəcə biz azarkeşlərə xoş sürpriz olaraq bunu demirlər ki, əvvəlcə bu futbolçuları gözlərimizlə görək, sonra da adlarını müzakirə edək. Azarkeşin arzuları, xəyalları bəzən çox uzağa da gedə bilir. Təki bu düşüncəmiz klub tərəfindən bizlərə, sabah meydanda xoş bir reallıq, xoş bir sürpriz olsun.

            Əgər bu belə olmayacaqsa, əlbətdəki bunun da yəqin səbəbləri var. Amma bu da o demək deyil ki, biz "Lex” qarşısına əlləri aşağı sallanmış vəziyyətdə çıxmalıyıq, xeyr! "Xəzər Lənkəran”ın çox gözəl oyunlar nümayiş etdirmiş heyəti əsasən qorunub saxlanılıb. Bu özü də az əhəmiyyətli deyil. Əgər rəıqib ciddi qəbul olunarsa, əlbətdəki buna şübhəmiz yoxdur və ya çox güclü olduğundan qorxmaq kimi axmaq düşüncələr yoxdursa, onda mübarizə aparmağa dəyər. O mübarizə ki, vaxtında əsasən bu heyətlə xarüqələr yaradıb. Heyətimizin kasad olmasına da fikir vermək lazım deyil. Yalnız və yalnız əldə olan heyətlə qorxmadan meydana döyüş üçün atılmaq gərəkdir. Birə iki güc sərf edib meydanda fantastik bir komanda və döyüşkən üzvlər olduğumuzu göstərməliyik. Nə olur-olsun, öldü var, döndü yoxdur düşüncəsi sabahkı oyunumuzda dadımıza çata bilər. "Lex” güclüdür, bir neçə futbolçusu son Avropa çempionatının həyəcanını ev sahibi olaraq böyük meydanlarda yaşayıb və sair düşüncələri bu dəqiqə yaxına buraxmaq lazım deyil. Biz daha güclüyük, azarkeşlərimiz önündə oynayırıq, sənətimizin adı futboldur və futbolçu mənliyimiz var deyə düşünməliyik.

            Buradan Yunis Hüseynova və köməkçilərinə, futbolçularımız olan kapitan Rahid Əmirquliyevə, Kamran Ağayevə, Kamal Bayramova, Orxan Sadıxlıya, Elnur Allahverdiyevə, Elnur Abdullayevə, Ruslan Abışova, Alim Qurbanova, Kamran Abdullazadəyə, Akif Tağıyevə, Manuel Skarlatakeyə, Adrian Pitsə, Eder Bonfimə, Sadio Tounkaraya, Rikardo Alvizə, Rikardo Qomeşə, Rendal Brenesə, Radomir Todorova və Branimir Subaşiçə müraciət edərək demək istəyirik ki, sabah ölüm dirim savaşına çıxın! Qorxmayın ən yaxın olan azarkeşləriniz sizinlədir! Qoy "Lex” elə "Lex” olsun. Siz də Lənkəran Elinin Xilaskarları olun (LEX)! Sizə inamımız böyükdür! Əgər siz bizləri və öz futbolçu mənliyinizi düşünsəniz, onda "Lex” balaca, biz isə böyük "LEX” olduğumuzu sübut edə biləcəyik. Dualarımız sizinlədir! Siz də bizim dualarımıza və öz inanclarınıza söykənin. Hələlik bu qədər. Haydı, "LEX”lər Allah amanında!