Dünyanın müxtəlif idman saytlarını izlədikdə müxtəlif xəbərlərlə tanış olmaq mümkündür. Bu xəbərlər içərisində Azərbaycan futbolu ilə əlaqədar başlıqlara rast gəldikdə, istər –istəməz fəxr edirsən ki, futbolumuzla bağlı məsələlər dünyanın idman portallarını bəzəyib. Ancaq bu fəxarət hissi xəbəri oxuyana qədər insana qürrə verir. Di gəl ki, xəbəri oxuduqda fəxarət hissi hansı hisslərlə əvəz olunur, siz də görün.

Azərbaycan futbolu ilkə imza atır

            -Son zamanlar ölkə futbolunda meydanlarda futbolçulara göstərilən vərəqələrin statistikasını aparan qitənin ali futbol qurumu olan UEFA maraqlı bir halın şahidi olmuşdur. Belə ki, Premyer Liqasında oniki klubun yarışmasına baxmayaraq, ən çox vərəqə alan ağ-yaşıl geyimli bir klub diqqət çəkib. UEFA araşdırmalara qərar verib. Əgər araşdırmaların nəticəsində həqiqətən bu klubun futbolçularının çox kobud olaraq vərəqələrə layiqliyi təsdiq olunarsa, onda Avropa futbolunda daha bir yeniliyin şahidi olacağıq. Belə ki, futbolda sarı və qırmızı vərəqələrin tətbiq olunduğu hamıya məlumdur. Lakin bu iki rəngli bəsit cəza vərəqələri Azərbaycan hakimləri üçün çətinlik törətdiyindən, UEFA onların işini yüngülləşdirməyi planlaşdırır. Bu məqsədlə UEFA bugünə qədər futbolda rast gəlinməyən iki rəngli cəza vərəqələri tətbiq etmək fikrindədir. Əlbəttə bu ikirəngli vərəqələrin bir hissəsinin ağ, digər hissəsinin isə yaşıl olması planlaşdırılıb. Bununla da ölkədə fəaliyyət göstərən hakimlərin işi xeyli asan olacaq və qurumun tələblərinə uyğun olaraq, oyunlarda vaxtın çox getməməsinə şərait yaradacaq. Bu üsulun effektiv olacağı təqdirdə UEFA, Avropanın digər ölkələrində də bunun tətbiq olunmasını planlaşdırıb. Digər yandan bu fikir FİFA rəhbərliyinin də çox diqqətini çəkib. Onlar da bunun necə nəticə verəcəyini gözləyirlər. Belədə bu üsul Azərbaycandan başlamaqla, bu ölkənin ilkə imza atmasına və bütün dünyada tətbiq olunmasına gətirib çıxaracaq. Digər ölkələrdə və hətta millilərin oyunlarında hansı rənglərin tətbiq olunması üzərində baş sındırılır.

Azərbaycanda tətbiq olunacaq yeni formalar aparıcı idman şirkətlərini  çətin vəziyyətdə qoyub

-Stadionlarda asayişi qorumaq üçün müxtəlif vasitələrdən və qüvvələrdən istifadə olunduğu bütün idman ictimaiyyətinə məlumdur. Belə ki, bunun üçün klubların mühafizə sisteminin işçiləri, hüquq mühafizə orqanlarının əməkdaşları, Daxili Qoşun hissələri və sair qüvvələr iştirak edir. Bütün bu qüvvələr azarkeşlərin qorunması üçün nəzərdə tutulur. Çünki, stadionlarda əsasən azarkeşlər yer alır. İdmançıların isə sayları məhdud olduğundan, elə də böyük qoruma qüvvələrinə ehtiyac duyulmur. Lakin Azərbaycanda bəzi klubların azarkeşləri vəhşi olduğundan yeni qüvvələrin yaradılmasına ehtiyac duyulub. Bunun üçün əvvəllər digər qüvvələrdən istifadə olunsa da, indi bunun ayrıca qurum kimi yaradılması nəzərdə tutulub. Bu o qədər də çətin məsələ deyil. Lakin bu məsələdə çətinlik törədən elementlər də var. Belə ki, yeni yaradılacaq mühafizə sistemi vahid formada olmalıdır. Bu vahid formanın versiyası da ölkə futbolu başbilənləri tərəfindən aparıcı idman malları hazırlayan şirkətlərə sifariş olunub. Belə ki, bu formanın geyim dəstlərinin ağ-qara rəngdə olması nəzərdə tutulsa da, bu formanı geyəcək əməkdaşların əlindəki "dubinka”nın rəngi isə ağ-yaşıl olmalıdır. İlk baxışdan belə dəstlərin istehsalı nə "Adidas”, nə "Puma”, nə "Umbro”, və nə də digər aparıcı idman geyimləri istehsal edən firmalar üçün heç də çətin deyil. Bu məşhur firmaların bu işdə qazancı olsa da, tərəddüdlərinin başqa səbəbi var. Onların fikrincə daim idmançılar və sağlamlıq baxımından fəaliyyət göstərdiklərinə və istehsal etdikləri malların yalnız idmanın inkişafı üçün nəzərdə tutulduğundan, azarkeşləri döymək üçün nəzərdə tutulan belə qurumun formalarını hazırlamaqda tərəddüd edirlər. Bu tərəddüd qəti olacağı təqdirdə, onda dünyanın bir çox "Geydirmə Mal” istehsal edən firmalarının biri ilə müqavilə bağlanacaq. Çünki ölkə futbol qurumu bu qərarında israrlıdır.

Azərbaycanda idman alışqanları

-Bildiyiniz kimi dünyada kibritin yeni nəsli sayılan müxtəlif növ alışqanlar istehsal olunur. Bu alışqanlar müxtəlif ölçü və formalara malik olduqları kimi qiymət cəhətdən də müxtəlif olur. Bir neçə sentdən başlayaraq min, hətta onminlərdən də yuxarı qiymətə olan alışqanlar mövcuddur. Haqqında xəbər verəcəyimiz yeni nəsil alışqanlar isə orta-yuxarı qiymətlərə hesablanaraq, yalnız idman sahəsində tətbiq olunacaq və adı "Yad Əşya” olacaq.

Belə ki, Avropa dövləti olan Azərbaycanda futbol azarkeşlərinin bir qismi tərbiyəsiz və vəhşi olduğundan yeri gəldi-gəlmədi meydana yad əşya atırlar. Bunun üçün də əsasən alışqanlardan istifadə olunur. Ölkə futbolunda da belə yad əşyaların meydana atılmasına görə futbol klubları iki min manat cərimələnirlər. Bu cərimə prosedurunun həyata keçirilməsi isə külli miqdarda vaxt tələb edir. Bunun üçün hakimlərin oyunun protokoluna qeydlər aparması, müxtəlif komitələrin yığışaraq iclas keçirməsi və qərarlar çıxarması və sair çətinlikləri gözə alan ölkə futbolunun başbilənləri alışqan istehsal edən firmalara yeni sifarişlər vermişlər. "Soğan olsun, nəğd olsun” fikrini üstün tutan komitə üzvlərinin yeni alışqan sifarişi bu formadadır: Alışqanın üzərində "Yad Əşya” sözləri böyük hərflərlə yazılmalı və içərisində nəğd olan iki min manat yerləşdirilməlidir. Bununlada cərimələr üçün xüsusi iclasların keçirilməsinə daha ehtiyac duyulmayacaq. Meydana atılmış həmin bu yeni nəsil alışqanlar hakimlər tərəfindən müsadirə olunacaq və komitə üzvləri də alışqanı sındıraraq, içindəki nəğd olan iki min manatı götürəcəklər. Onu da qeyd edək ki, bu alışqanların bir neçə ilkin versiyası hazırlanıb. Lakin uğursuz olan bu versiyaların bəziləri meydana atılarkən, bəziləri isə komitə üzvləri tərəfindən sındırılarkən alışıb, yanmağa başlayıb. Bu üzdən ziyana düşmüş və təhlükə ilə üzləşmiş komitə üzvləri daha mükəmməl versiyaların hazırlanması üçün firmalarla birgə fəaliyyətə başlamışlar. Meydana "Yad Əşya” atmaq istəyən azarkeşlərə xatırladırıq ki, belə alışqanların qiyməti iki min manat əlli qəpikdən başlayaraq, iki min manat doxsan qəpik aralığındadır.

Nə isə hələlik dünya mətbuatında ölkə futbolumuzla bağlı xəbərlərimiz bu qədər. Amma bu barədə istənilən qədər xəbərlər dünyanın idman mətbuatında yer alır. Narahat olmayın, belə xəbərlərlə sizləri yenə də tanış edəcəyik.