Müsəlman aləminin ən müqəddəs bayramlarından biri olan Ramazan bayramı bu il də öz gözəlliyi və bərəkəti ilə xalqımıza öz sirrlərini ərməğan etdi. Uzun və isti yay günlərinə təsadüf edən bu gözəl günlər, çox-çox insanların ruhlarını saflaşdıraraq, Allah qarşısında borclarını verməyə, günahlarından azad olmağa kömək etdi. Bu uzun və isti yay günlərində günün böyük hissəsini ac, susuz və orucluğun tələb etdiyi bir çox məhrumiyyətləri insana yaşatdıqca, çətin günlərin və çətinlikdə yaşayanların hisslərini hamıya duyurdu. Uzaqda, zindanda və başqa məhrumiyyətlərlə həyat sürənlərin hisslərini yaşatdı. Bundan tərbiyəvi əhəmiyyət dərk edərək, insanları başa sala bildi ki, pis əməllərdən çəkinsinlər ki, hansı məhrumiyyətlərin onları gözlədiyini anlasınlar. Daha neçə-neçə sirlərini açdı bəşər övladına. Sonda isə nemətləri düzdü onların qarşısına. 

            Bütün Azərbaycan xalqını və bütün müsəlman dünyasını bu müqəddəs bayram münasibəti ilə təbrik edir, onlara can sağlığı, uzun ömür və firavan yaşayış arzu edirik. Allah bu müqəddəs bayramınızı mübarək eləsin!

            Allah Mirzə Ələkbər Sabirin də ruhunu şad eləsin. Bu müqəddəs ayın hikmətlərini başa düşməyənlər haqqında yazdığı, "Mahi-Rəmazandır, yenə Meydan Da Bizimdir” şeirini təqdim edərək, onları da ibrət götürməyə çağırırıq.   

              Mahi-Rəmazandır, yenə Meydan Da Bizimdir

Mahi-rəmazandır, yenə meydan da bizimdir!

Meydan da bizim, ərsədə cövlan da bizimdir!

Sərsüfrədə ərbabi-niəm məhzərimizdə,

Ezaz ilə, ikram ilə dövrü bərimizdə,

Min neməti-əlvan düzülüb qənşərimizdə,

Sövdayi-plov, şuri-çığırtma sərimizdə,

            Firni və tərək, dolma, fisincan da bizimdir!

            Boşqabda müsəmmavü badımcan da bizimdir!

Sail, qapıdan baxma bizə, pis göz atarsan!

Çox qanqıma, durram, elə vurram ki, batarsan!

Ruzi sənə hər yerdə müqəddərsə çatarsan!

Bir şey əlinə keçməsə, sən ac da yatarsan!

            Biz nazü niəm əhliyik, ehsan da bizimdir!

            Ehsan da bizimdir, şərəfü şan da bizimdir!

Səbr eylə hələ, yağlı qarınlar dolar isə,

Dövridə plov qalmağa imkan olar isə,

Gər sür-sümüyündən bu təamın qalar isə,

Bir şey yetişər həm sənə qismət olar isə;

            Şimdi hələlik süfrə də, qazğan da bizimdir!

            Şərbət də bizim, kasə də, fincan da bizimdir!

Sən hər qapıda min kərə yahu da deyərsən,

Bir köhnə libas olmasa, cecim də geyərsən,

Bir paslı çörək düşsə yavansız da yeyərsən,

Gər düşməsə, ac qalmağı da məşq eləyərsən;

            Biz möhtərəmik, neməti-əlvan da bizimdir!

            Qaymaq da bizim, qəhvə də, qəlyan da bizimdir!

Asudə burax bizləri öz halımız ilə,

Zəhmət çəkib iş görmüşük əqvalımız ilə,

Ruzi deşiyi açmışıq iğfalımız ilə,

Zidd isə də əqvalımız əmalımız ilə,

            Əlyövm yenə sərvətü saman da bizimdir!

            Tacir də bizim, bəy də bizim, xan da bizimdir!

Əyan da bizimdir!

Fərman da bizimdir!

Çünki rəmazandır,

Meydan da bizimdir!