2010-2011ci ilin futbol mövsümü sona yaxınlaşır. Mövsümün  lap başlanğıcından azarkeşlərdə həmçinin futbol ictimaiyyətində müəyyən narahatlıqlar var idi. Bu narahatçılıqları həm təbii olaraq mövsümə hazırlaşan hər kəsdə, klublarda, futbol qurumlarında, Azərbaycan futbolunu uzun illər çiyinlərində daşımış insanlarda, demək mümkünsə, komandalarına bağlılığı, sözlə ifadə edilməsi mümkün olmayan azarkeşlərdə və futbolla maraqlanan bütün insanlarda sezmək mümkün idi. Çempionatın formatının bu il, keçən mövsümdəkindən daha fərqli keçirilməsi və bunun özünü necə doğruldacağı yuxarıda göstərilən hər kəsi narahat edirdi. Kimi buna qarşı çıxaraq daha fərqli format təklif edir, kimi isə bunun bugünki Azərbaycan reallığı üçün daha yaxşı model olduğunu isbatlamağa çalışırdı.

            Bəli, bu mövsümün sonuna artıq üç tur qalıb. Bu formatda keçirilən çempionatın müsbət və mənfi cəhətlərini söyləmək üçün kifayət qədər aydınlaşmaların şahidi olmuşuq. Amma onu deyə bilərik ki, şəffaf və ədalətli keçirilən hər hansı bir natamam format, eybəcərliklərlə həyata keçirilən ən mükəmməl formatdan qat-qat üstündür.

Yuxarıda narahatlıqlarla bağlı fikirlərə bu da aid idi. Həmçinin o da aid idi ki, kim sonda qalib olacaq, kim necə çıxış edəcək, kim mükafatçılar sırasına düşəcək, Premyer Liqa adlandırdığımız elitanı hansı klublar tərk edəcək. Artıq bunların bir çoxuna aydınliq gəlib. Çempionatda və kubok oyunlarında kim uğurla çıxış edib və edirsə, kim Avropa miqyaslı yarışlarda ölkəmizi layiqincə təmsil edə biləcəksə, elə indidən onlara uğurlar arzulayırıq. Kim elitanı tərk edir, kimi də mövsümü uğursuz keçirirsə onlara da növbəti mövsümdə Azərbaycan futbolu naminə güclənməyi arzu edirik.

Bəli, mövsüm sona yaxınlaşsa da narahatlıqların hələ ki, sonu görünmür. Bu vəziyyət növbəti mövsümdə də davam edəcəksə, sanki indidən insanın damarlarındakı qan hərəkətdən dayanıb donmaq istəyir. Bu mövsüm nə qədər eybəcərliklərlə və bütün bunların əsasən hakimliklə həyata keçirilməsinin şahidi olduq. Kimlər hansı nəticələri göstərə biləcəkləri ilə bağlı normal narahatçılıqlar keçirdi, kimlər də mövsümün lap əvvəldən planlarını cızdı və bu planlarının necə həyata keçirə bilib, bilməyəcəkləri ilə bağlı narahatlıq keçirdi. Budur, mövsüm sona çatmamış onların narahatçılığı artıq bitmiş oldu. Azərbaycanın futbol hakimliyi bu mövsüm hər kəs qarşısında özünü qurban verdi. Bunu daxildə də gördülər, bunu bütün dünya və Avropa da gördü. Nə idi bizim futbolun suçu ki, bütün dünyada onu rəzil etdiniz?

Yəqin belə gedərsə, kubok oyunlarında və gələn mövsümdə də bu müəyyən formada davam edəcək. Amma çempionatda müəyyən planlar həyata keçirildiyindən və artıq aydınlaşmalar olduğundan çox güman ki, daha nələrəsə ehtiyac duyulmayacaq. Bu halda biz sizə bir müjdə verə bilərik. Yerdə qalan son üç turun normal hakimliklə idarə olunacağını gözləməyə dəyər. Həmçinin bu üç turda Azərbaycan futbol hakimliyinin heç də çox geridə olmadığının şahidi ola bilərik. Bununla da əvvəlki turlardakı mübahisə doğuran "bu səhvdir yoxsa qərəz?” sualına da aydınlıq gəlmiş olacaq, yəqin ki. Hakim ədalətsizliyi səbəbindən futboldan və stadionlardan küsmüş azarkeşləri isə yenidən stadionlara dəvət edirik. Əlbətdə, "Xəzər Lənkəran” azarkeşləri olaraq haqsızlıq oldu ya olmadı biz həmişə komandamızın yanındayıq!