Komandamızın baş məşqçisi Mirça Rednik Rumıniya mətbuatına, son günlər öz ölkəsinin millisini çalışdırmaq variantı barədə açıqlama verib.

            Açıqlamasında komandamızın baş məşqçisi Mirça Rednik yığmanın indiki çalışdırıcısı Razvan Luçeskunu Rumıniya millisinin baş məşqçi postunda vəzləmək istəmədiyini qeyd edib:-"Rumıniya yığmasının hazırkı baş məşqçisi Razvan Luçesku çox yaxşı bir mütəxəssisdir. Onunla münasibətlərimiz də qaydasındadır. İndi onun işdən çıxarılması haqda danışmağım da düz çıxmaz. Aydın məsələdir ki, hər bir mütəxəssis öz ölkəsinin yığmasında çalışmaq istəyər. Lakin mən "Xəzər Lənkəran”dakı fəaliyyətimdən çox razıyam. Bizim üçün hər cür şərait yaradılıb, şikayətlənməyə heç bir əsasım yoxdur. Mən də öz işimə köklənmişəm. Mənim "Xəzər Lənkəran” klubundan ayrılmaq fikrim yoxdur. Hazırda komandamdan başqa heç nə məni maraqlandırmır”.

            Əlbəttə ki, bu açıqlaması ilə Mirça Rednik,  biz "Xəzər Lənkəran” azarkeşlərinin bu barədə yaranmış narahatçılığımıza müəyyən mənada son qoymuş oldu. Biz Mirça Rednikin hələ "Xəzər Lənkəran”la əsasən Avropa arenasında çox uğurlara imza atacağı qənaətindəyik.