Bildiyimiz
kimi artıq bu mövsüm komandamızın Avropa Liqasındakı rəqibi İsrail təmsilçisi,
paytaxt Tel-Əviv klubu "Makkabi”dir. II təsnifat mərhələsində qarşılaşacağımız
bu klub haqda çox söz demək olar. Belə ki, 1906-cı ildə təsis olunan bu paytaxt
klubu ölkəsinin ən titullu komandasıdır. Çempionlar Liqası qrup mərhələsində də
çıxış etmiş bu komanda evdə İtaliyanın məşhur "Yuventus” klubu ilə 1:1 bərabərə
qalmağı bacarıb. Bundan başqa ”Makkabi” ölkəsində 20 dəfə çempionluq və 22 dəfə
kuboka sahib çıxmanın sevincini yaşayıb. Həmçinin 2 dəfə ölkə superkubokuna da
sahib çıxıb. Komandanı birvaxtlar İngiltərənin məşhur "Çelsi” klubunu da
çalışdırmış tanınan mütəxəssis Avraam Qrant baş məşqçi kimi çalışdırmışdır. Hal
hazırda isə komandanın sükanı arxasında 47-yaşlı mütəxəssis Motti İvanir dayanıb.
Sizləri bu
qısa informasiya ilə tanış etdikdən sonra rəqibimiz olan "Makkabi” klubunun
hal-hazırki baş məşqçisi Motti İvanirlə "Futbol+” qəzetinin səhifələrində yer
almış müsahibə ilə tanış edirik. Qeyd edək ki, bu musahibə adıçəkilən qəzetin
bugünki (N:118
(2301)) 21-22iyun 2011 sayında dərc olunub və qəzetin əməkdaşı Həbib bəyə məxsusdur. Onu da qeyd edək ki, həmişə operativliyi ilə şeçilən bu qəzet
artıq püşkatmanın nəticəsi bəlli olduqdan 2 saat sonra İvanirin telefonunu əldə
edərək, ondan müsahibə götürə bilib.
-Cənab İvanir, sizi Azərbaycandan, "Futbol+”
qəzetindən narahat edirik.
-Lap yaxşı. Deməli,
azərbaycanlılardan ilk ünsiyyət qurduğum siz olacaqsız (gülür).
-Yəqin ki, Avroliqanın ikinci təsnifat mərhələsində
qarşılaşacağınız "Xəzər Lənkəran”ın Azərbaycan təmsilçisi olduğunu bilirsiz.
-Əlbətdə.
-Rəqibiniz haqda hansı məlumatlara sahibsiz?
-Sözün düzü, heç nə
bilmirəm. Yəqin ki, yaxın 1-2 gündə nəsə əldə etməyə çalışacağıq.
-Püşkatmanın üstündən artıq 2 saat ötüb,
Geridə qalan vaxt ərzində nə öyrənə bildiz?
-Yalan danışmağı
sevmirəm, heç nə bilmirəm və heç nə də öyrənə bilmədim. Püşk atılan ərəfədə
komandanın məşqi başlayırdı. Bu xəbəri avtobusda aldım. Bu üzdən hələlik məlumatsızam.
Yalnız onu bilirəm ki, Azərbaycan təmsilçisidi. Hansı ki, həmin ölkədə futbola
böyük pullar yatırılır.
-"Xəzər Lənkəran”ın avrokuboklara çempionat,
yoxsa kubokdan vəsiqə qazandığını da bilmirsiz?
-Sizdən bir neçə dəqiqə
öncə dostum zəng vurmuşdu. Dediyinə görə, rəqibimiz son mövsümü ikinci pillədə başa vurub.
-Lənkəranlılar həm də ölkə kubokunu başı üzərinə
qaldırıb.
-Doğrudan? Bunu sizdən
eşitdim. Deməli, daha ciddi hazırlaşmalıyıq. Sizdən bir söz soruşum: onlar daha
çox yerli futbolçulara, yoxsa legionerlərə güvənirlər?
-Heyətdə azərbaycanlı futbolçular olsa da,
baş məşqçi əsasən gəlmələrə güvənir. Komandanı Mirça Rednik çalışdırır. 5 il
öncə Buxarest "Dinamo”su onun rəhbərliyi altında İsrail "Beytar”ını mübarizədən
kənarlaşdırmışdı. Onu tanıyırsız?
-(fikirləşir) Hələ ki, tanımıram.
Oyundan öncə mütləq tanış olacam (gülür).
-Bəs Kosta-Rika yığmasının heyətində
DÇ-2002-nin iştirakçısı olan Uinston Parksı tanıyırsız?
-Xatırlaya bilmirəm.
Hansı mövqedə çıxış edir?
-Hücumçudu, komandanın "vuran ayağı”
sayılır.
-Lap yaxşı. Görünür
güclü heyətləri var. Siz mənə deyin görüm, "Xəzər Lənkəran" bizimlə oyuna kimi
nə vaxt yoxlama oyunu keçirəcək?
-Bu haqda sizə dəqiq məlumat verə bilməyəcəm.
Yalnız onu deyə bilərəm ki, təlim-məşq toplanışını Avstriyada keçirəcəklər.
-Maraqlıdı.
-İlk oyun səfərdə baş tutacaq. Bunu xeyrinizə
saymaq olar?
-Hər matça ciddi
yanaşmaq lazımdı. Oyunun harda keçirilməsi önəmli deyil. Ancaq səfərdəki oyunda
rəqibi daha yaxından tanıyacağıq.
-Mərhələ adlamaq şanslarını faizlə qiymətləndirə
bilərsiz?
-İndiki halda 50-nin 50-yə deyərdim. Ancaq Azərbaycandakı oyundan sonra yaxınlaşsaz, fərqli rəqəmlər
söyləyə bilərəm (gülür).
-Heyətinizdə çox sayda hücumçu var. Düşünmək
olarmı ki, "Makkabi” əsasən hücum futboluna üstünlük verir?
-Yetirmələrimin əksəri
gəncdi. Belədə onlardan daha çox qaçmağı, meydanda can qoymağı tələb edirəm.
Komanda gəncdisə, deməli, daha çox qol vurmalıyıq. Narahat olmayın, lazım
olanda müdafiəyə çəkilməyi də bilirik (gülür).
-Avroliqada qarşınıza hansı tələb qoyulub? Məsələn,
"Xəzər Lənkəran” qrup mərhələsinə vəsiqə qazanmaq istəyir.
-Elə bizim də niyyətimiz
eynidi. Ancaq dildə "istəyirəm” deməklə iş bitmir. Bunun üçün qarşına çıxan rəqibləri
məğlub etməlisən. Bunu bacarsaq, bir neçə ay sonra qrupda olacağıq.
|