Bəli, bu mövsüm həm də həmişəki kimi ölkə kuboku yarışları ilə yadda qalacaq. Bu ildən ölkə kuboku yarışlarının təşkili və keçirilməsində bir sıra yeniliklər edilib. Belə ki, ölkə kuboku yarışları da Premyer Liqada olduğu kimi hansısa sponsorla birgə həyata keçiriləcək. Premyer Liqanın sponsoru "Unibank”dırsa, builki kubok yarışlarının sponsoru həm də Salyanın "Muğan” klubunun sponsoru olan "NBC Bank”dır. Bu nə dərəcədə düzgündürsə, gərək futbol qurumlarımız bunu nəzərə alaydılar. Salyanın "Muğan” klubu hələ ki, o qədər də iddialı olmadığı üçün bəlkə bu o qədər də rezonans doğurmur. Amma gəlin belə fikirləşək, hər hansı həm kuboka, həm də çempionluğa iddialı olan bir klubumuzun sponsoru eyni zamanda hansısa yarışlara sponsorluq etsəydi, onda bu həm ədalət baxımından düzgün olmazdı, həm də futbol ictimaiyyəti buna yəqin ki, kəskin reaksiya verərdi. Futbol qurumlarımızdan gələcəkdə belə nüansları nəzərə almalarını elə bu başdan tələb edirik.

            Keçək digər yeni qaydaya. Bu kubok mövsümü yarışları əvvəlkilərdən daha bir xüsusiyyəti ilə fərqlənir. Belə ki, əvvəllər kubok yarışları çərçivəsində final matçı istisna olmaqla iki, ev və səfər oyunlarından ibarət idisə, indi bu qayda yalnız 1/4 və 1/2 final mərhələsinə aid edilib. Yəni, 1/4 və 1/2 final görüşlərində komandalar ev və səfər oyunu olmaqla iki dəfə görüşərək qalibi müəyyən edəcəklərsə, kubokun finalı və ondan əvvəlki mərhələlərdə qalib yalnız bir matçdan sonra müəyyənləşməlidir. Bu yeni qaydanın da nə dərəcədə uğurlu və ədalətli olması dünya praktikasında yoxlanılıb və belə sistemdən imtina edən ölkələrin sayı da az deyil. Məsələn, bir neçə il əvvəl Türkiyədə də kubok yarışları belə bir model əsasında keçirilirdi. Amma son bir neçə ildə onlar bu modeldən imtina edərək, kubok yarışlarını komandaların püşkatma vasitəsilə qruplar üzrə bölünərək "Qrup sistemi” üzrə keçirilməsini tətbiq etdilər. Çünki, bir matçla heç cür ədalətli nəticəyə bel bağlamaq olmaz. Özü də matç neytral meydanda deyil, iştirakçı komandaların birinin meydanında keçirilirsə. Onu da nəzərə alsaq ki, bu bir matçda ən azı hakim səhvi kiminsə yarışlardan ədalətsiz formada uzaqlaşdırılmasına gətirib çıxara bilər. Azərbaycanda isə hər kəsdə hakim səhvləri olduğu qənaəti qəbul olunur desək heç də səhv etmərik.

            Nə isə belə bir qaydada keçirilən matçla "Xəzər Lənkəıran”ın rəqibi məlum olacaqdı, oldu da:  

"Karvan" – "MKT-Araz" - 1:1, (3:4 - penaltilərlə)

Qollar:       Ramil Ağayev-90 (p);  Rafiq Koçaliyev-15 

Hakimlər:  Azad Mütəllimov, Hüseyn İmanov, Rasim Əhmədov, İlqar Zeynalov

Yevlax şəhər stadionu

            Bu cütlüyün qalibi tək oyunda məlum oldu. Belə ki, "Xəzər Lənkəran”ın 1/8 final mərhələsindəki rəqibi, bu görüşün qalibi İmişlinin "MKT-Araz” klubu oldu. Bu klub vaxtı ikən yüksək liqamızın sayılıb-seçilən klublarından olmasına baxmayaraq, indi birinci divizionun daimi sakininə çevrilib. Əvvəlki illərdə həm çempionat, həm də kubok yarışlarında bu komanda ilə yollarımız az kəsişməyib. Konkret, 2006/2007-ci il mövsümündə, kubokun finalında, komandamız 1:0 hesabı ilə qalib gələrək Kuboku başı üzərinə qaldırmışdı. Ondan əvvəlki illərdə isə 1/4 final mərhələsinin qalmaqallı ""MKT-Araz”ın futbolçusu Yevgeni Şimanın saxta pasport məsələsi” üzündən görüşün təkrar keçirilməsi ilə yadda qalmışdı.

            1/8 final mərhələsində komandamız rəqibini dekabr ayının 7-si və ya 8-i nəzərdə tutulduğu kimi Lənkəranda qəbul edəcək. Bu və bundan sonrakı mərhələlərdə "Xəzər Lənkəran”a uğurlar arzu edirik.