Ölkənin aparıcı idman nəşri olan "Futbol+” qəzetinin bugünki, 27 Oktyabr 2011-ci ildə işıq üzü görən sayında köşə yazarı Amal bəyin növbəti maraqlı yazısı dərc olunub. Səkkizinci səhifədə yer alan bu yazıda Amal bəy Azərbaycan futbolundan , yaxın və uzaq illərdəki ölkə futbolundan söz açıb və bizcə haqlı olaraq "Xəzər Lənkəran”ı Azərbaycan futbolunun "Yeni etalon”u adlandırıb. Məntiqlə yazılmış bu yazını oxuduqda doğrudan da "Xəzər Lənkəran” fanatı olmaqdan qürur duymamaq mümkün deyil. Məqalə böyük olduğundan onu elə qəzetdən oxumağı məsləhət bilərdik. Lakin Amal bəyin qəzet səhifələrinə həkk etdirdiyi bir neçə cümləni elə burada sizlərin diqqətinə çatdırırıq. Bu xəbərimizi heç də qəzetin reklamı yox, sadəcə "Xəzər Lənkəran” haqda həqiqətin olduğuna görə sizlərə çatdırırıq. Ən azından hamınız bilirsiniz ki, "Futbol+” qəzetinin reklama ehtiyacı yoxdur. Beləliklə yazıdan bir neçə cümləni diqqətinizə çatdırırıq:

"Biz gözümüzü açandan radionun xırıltılı səsiylə, televiziyanın ağ-qara ekranıyla "Neftçi”nin oyunlarının həyəcanını yaşamışıq. Düzdü, yaşım imkan vermədiyindən bizimkilərin ittifaq birinciliyində yaxşı günlərini görə bilməmişəm. Azərbaycan müstəqilliyini bərpa edəndən sonra keçən zaman ərzində isə ölkə futbolunun flaqmanı saydığımız "ağ-qaralar”ın nə vaxtsa qitə səhnəsində üzümüzü ağardacağına inanaraq yaşayırıq.”

Daha sonra müəllif  bugünki futbolumuzdan yazaraq bunları deyir: "Turnir  cədvəlində ən yaxın izləyicisini 4 xal qabaqlayan Rednik və komandası cari mövsümdə işini meydanda görməklə məşğuldu... "...Son turda öz meydanında cənublulardan 1 xal almasına sevinən "Bakı”nın düşərgəsində yaşananlar isə artıq Azərbaycan futbolunda yeni etalonun olmasından xəbər verir. Əvvəllər klublarımız özlərini daha çox "Neftçi”ylə müqayisə edib,”ag-qaralar”dan xal almağa sevinirdisə, indi həmin rolda Rednikin komandasıdı. Hətta "Neftçi”nin özü də digər rəqibləri buraxıb, gecə-gündüz "Xəzər Lənkəran”ı düşündüyünü tez-tez biruzə verir. Belə olmasaydı, komandanın çalışdırıcısı az qala hər oyundan sonra rəqib düşərgəyə ismarıclar göndərməzdi.”

Daha sonra çoxlu dəyərli müqayisə və fikirlər olan yazını tam olaraq adıçəkilən qəzetdən oxumanızı məsləhət görürük.