Kölgə sözü çox mənalarda işlənilir. Bu mənaların yaşxı yozumu da olur, pis yozumu da. Əslində, kölgə sözünün ilk anlamı günəşin yandırıcı şüalarından qorunmaq üçün hər hansı ağacın və ya predmetin həmin şüaların qarşısını kəsməklə əmələ gətirdiyi sərin bir sahə kimi başa düşülür. İstidən yorulan və bezikən insan üçün bu kölgə sanki, həyat əhəmiyyətli olur, dincini alır, yorğunluğunu yeni qüvvə yığmaq üçün dəf edir. Elə bəşər övladının müəyyən xüsusiyyətləri də bu saf sözün, pis mənalara yozularaq, öz leksikonuna daxil etməsidir. Məsələn, kimsə, kiminsə kölgəsində yaşayır. Filan iş kölgəyə düşdü və sair. Sərin kölgəliyi, gur işıqla gözü yorulan və hansısa predmetin yaratdığı az işıqlı kölgəliyə ani olaraq qaranlıq kimi baxan bəşər övladı bu mənada da sanki çaşqınlığa yol verir. Biz, kölgə sözünün yaxşı məna kəsb edən tərəfindən danışmaq istəyiriksə də...

            Bütün dünya futboldan zövq alaraq, bu oyuna tamaşa etdikdə sanki dincəlmiş olurlar. Düzdür, sevdiyin komanda çətin məqamlara düşdükdə əsəbi və narahat olursan. Amma bu ki, daimi belə olmur. İşlər görülür, dəstəklər verilir və nəhayət azarkeş də oyuna yenə zövq alaraq, xoş həyəcanlar yaşayaraq ömrünün neçə-neçə saatından keçirərək tamaşa edir. Tək tamaşa etmir, oyunlara qabaqcadan hazırlaşaraq, oyuna köklənir, alqışlayır, oturur-durur, komandasını irəli səsləyir, bəzən hətda söyüş də söyür. Qısası bu bir neçə saatı ətraf mühitdən ayrılaraq, sadəcə futbolla yaşayır. Azərbaycan adlı məmləkətin azarkeşlərini isə gəlin görək futbolla yaşamağa qoyurlarmı? Meydandan kənar və nəhayət meydanlarda bu idman növünə nifrət ediləcək səviyyədə çoxşaxəli və çoxtərəfli oyunlar oynanılması və sair və ilaxır.

            Azərbaycan azarkeşinin futbola olan marağını sındırdıqdan sonra, onların niyə stadionlarımıza gəlməməsindən gileylənən bəzi başbilənlərimiz heç də səbəbi obyektiv olaraq özlərində axtarmırlar. Nəticəsi əvvəlcədən bilinən "tamaşaya” futbolsevər hansı marağı göstərsin, əgər orada həyəcan yaşamayacaqsa. Bunun beynəlxalq aləmdə tutaq ki, bir komandanın həddindən artıq güclü olması və ya ilk matçda böyükhesablı məğlubiyyət qeydə alındığı halda obyektiv, bizdə isə hakimin hansısa komandaya tərəfkeşlik edərək, sonda onun qalibiyyətini təmin edəcək, hansısa futbolçunun qəsdən komandasına xəyanət edərək onu uduzduracağı kimi subyektiv səbəbləri var. Bəs niyə eyni komandalarımızın beynəlxalq oyunlarına azarkeşlərimiz daha çox sayda gəlirlər. Ən azı burada hakim iyrəncliklərinə şahid olmayacaqlar deyə. Baxmayaraq ki, rəqibin güclü olması və qələbə qazanacağı gözlənilirsə, belə. Azarkeş bu oyuna həyəcan yaşayacaq deyə, gəlir, bu oyunu sevir və onunla yaşamaq istəyir deyə. 

            Ölkəmiz müstəqilliyini əldə etdikdən sonra, yeni dövlər olduğunu nəzərə alan FİFA və UEFA, uzun müddət müxtəlif turnirlərin matçlarının canlı yayımını ödənişsiz və yardım olaraq bizlərə hədiyyə etdi. Bu hədiyyə limiti qurtardıqdan sonra isə yenə axsamalar başladı. Daxili futbol çempionatımızın yayımı isə müxtəlif vaxtlarda, müxtəlif xaoslarla hamını məyus edib. Hələ bir çempionat mövsümü olmayıb ki, normal teleyayım məsələsi həllini tapsın. Ölkənin futboluna məsul qurumlar gah bu yayım hüququ məsələsini özündə saxlayır, gah telekanalların qarşısına şərtlər qoyur, gah da klubları sıxma-boğmaya salır. İndi hansı zamandır? Məgər futbolu biz icad etmişik və ya yalnız biz oynayırıq? Yayım məsələsinin də beynəlxalq təcrübəsi var. Sadəcə uğurlu modeli tətbiq etmək lazımdır.

            Hamı bilir ki, futbolumuz rəsmi dövlət qərarlarında da nəzərdə tutulduğu kimi inkişaf mərhələsindədir. Qərarlardan da görünür ki, bu işlə dövlət özü məşğul olur. Hələ rels üstə qoyulandan sonra liberallaşma zamanına qalıb. Amma gəlin görək bunu yada salan varmı? PFL-ə sual verilir ki, "deyilənə görə matçlardan yayım almaq istəyən telekanallar sizə 600 manat ödəməlidir”. Amma PFL nə cavab verir? Mətbuat xidməti deyir ki, nə yayım?, nə 600 manat? Bizdə turun bütün oyunlarından xəbərlər proqramında göstərilmək üçün qısa icmal hazırlanması nəzərdə tutulub. Hər hansı kanal bunu əldə edib xəbərlər proqramında göstərmək istəyirsə, yalnız buna görə 600 manat ödəməlidir. Bunun oyunun canlı verilməsinə heç bir aidiyyatı yoxdur. Canlı yayımla əlaqədar isə heç bir telekanalla anlaşmamız hələ ki, yoxdur ("Futbol+” qəzeti). İndi baxaq görək futbolun inkişafı və kütləviləşməsi rəsmən dövlət nəzarətində olduğu halda, yayım məsələsində hər hansı addımı atmamaqla, bu kütləviləşmənin bir növ qarşısını alan PFL düz yoldadırmı? Hər halda futbolun inkişafına və kütləviləşməsinə bu idman növü üçün ölkəmizdə PFL, yoxsa telekanal daha məsuldur? XXI ölkə çempionatı start götürdü. Amma çoxları bilmir ki, ümumiyyətlə bizdə futbol nə vaxt başlayacaq. Budurmu futbolun inkişafına xidmət? Telekanalların da burada xidməti olmalıdır. Eyni zamanda onların bir şirkət kimi maraqları da var. Bəs PFL-in marağı futbolun inkişafı və kütləviləşməsi deyilmi? Hər süjet toplusu üçün 600 manat olmasa məgər PFL iflas edər? Beləliklə kölgə sözünün yaxşı mənasından danışmaq istəsək də, Azərbaycan futbolu belə iddiaların kölgəsində qalıb. Kölgənin qatılığı da o səviyyədədir ki, nə vaxt ora işıq düsərək aydınlaşacağı da elə güman kölgəsindədir.   

           Olimpiadanın açılışı oldu. Müxtəlif ölkələrdə müxtəlif turnirlərin açılışı ard-arda davam edir. Bizdə isə futbolun dövlət proqramlarında rəsmi inkişaf dövrü olmasına baxmayaraq XXI ölkə çempionatının açılışını heç yerdə görmədik.  Ağlınızı başınıza yığın, azarkeşlərin futbolu izləmə marağına hörmət etmirsinizsə, heç olmasa, ölkə prezidenti London Olimpiadasından vətənə dönənə qədər bunu qaydaya salın!