Bildiyiniz kimi "Xəzər Lənkəran” azarkeşləri olaraq komandamıza müxtəlif yönlü dəstək nümayişi tərəfimizdən daim həyata keçirilib. Lazım gələndə isə bu etiraz formasında da ortaya qoyulub ki, düzgün aparılan işlər formasında "Xəzər Lənkəran” daha irəli gedə bilsin. Bu məqsədlə bilirsiniz ki, bir neçə dəfə klub rəhbərliyi ilə də görüşlərimiz təşkil olunub. Bu görüşlərdə məqsəd isə öz fikir və təkliflərimizi, yeri gələrsə tənqidlərimizi klub rəhbərliyinə çatdırmaq olub. Əlbəttə bir fanklub kimi, həm də azarkeşlərin bilavasitə içərisində olduğumuzdan onları da narahat edən məsələləri klub yönəticilərinə çatdırmağı özümüzün ümdə vəzifəmiz hesab edirik.

            Son bir müddətində komandada geriləmə hallarının bəlkə də son həddində "Bosman” və "12-ci Oyunçu” azarkeş qrupu rəhbərlərinin birgə imzası ilə klubun sahibi olan Mübariz Mənsimov cənablarına birgə müraciət imzalanaraq göndərilmişdi. Bu müraciətdən sonra isə adı çəkilən fanqurum nümayəndələri, "Caspian Ultras” fanklubunun vasitəçiliyi ilə 09 oktyabr 2012-ci ildə klub rəhbərliyi tərəfindən görüşə dəvət olunmuşdu. Göstərilən tarixdə baş tutan görüşdə müraciətdən doğan məsələlər müzakirə olunmuş və bütün incəliklərinə qədər dərhal klubun sahibinə çatdırılmışdı. Həm də adıçəkilən görüşdə belə toplantıların tez-tez keçirilməsində klub rəhbərliyinin də maraqlı olduğunu rəhbərlik adından Tuyqun Nadirov bildirmişdi.

            Biz isə tez-tez yox, lazımi məqamlarda görüşməyi və son görüşün məntiqi nəticəsindən, yəni görüşdə qaldırılan məsələlər reallıqda əksini tapdıqdan sonra, daha yeni məsələlərin həllinin vacibliyi məqamlarında və hər hansı hesabat dövründə yeni görüşlərin keçirilməsinin tərəfdarı olduğumuzu dilə gətirmişdik.

            "Bosman” fanklubu olaraq növbəti görüşün vaxtının yetişdiyini düşünürük. Çünki 09 oktyabr 2012-ci ildə baş tutan görüşdən sonra demək olar qaldırılan əsas məsələlər həllini tapmışdır və qış fasiləsi ilə əlaqədar yeni bir hesabat dövrü gəlib çatmışdır. Həmçinin "Xəzər Lənkəran” azarkeşləri kimi daim transfer zamanlarında diqqət çəkən bir komandanın ötən uyğun məqamdan yararlana bilməməsi və bunun nəticəsi olaraq, bu gün heyət baxımından əziyyət çəkməsi növbəti görüşün əsas məqamlarındandır.

Məhz bütün bunları nəzərə alaraq "Bosman” fanklubu kimi klub rəhbərliyi ilə görüşmək fikrinə gəldik və müraciət etdik. Həmçinin digər fanklublara da  görüşmək üçün təkliflər göndərilməsini klub rəhbərliyinin ixtiyarına buraxdıq. Rəhbərlikdən bizə bildirildiyinə görə, onlar da öz sözlərinin və görüş ənənələrinin saxlanılmasında maraqlı tərəfdirlər. Həqiqət naminə biz onu da bildirməliyik ki, 09 oktyabr görüşündən sonra bir neçə dəfə özləri buna təşəbbüs göstərmişdilər. Belə ki, artıq növbəti görüşün vaxtı Dekabrın 26-na, yeri və saatı müəyyənləşdirilməklə təyin olunub. 09 Oktyabr görüşünün davamı kimi həmin görüşdə iştirak edən fanat qurumlarının iştirakının vacibliyini buradan onların diqqətinə çatdırırıq. Həmən görüşdə bu və ya digər səbəbdən iştirak edə bilməyən digər fanat qurumlarının da iştirakını təklif edən tərəf kimi arzulayırıq.

"Bosman” fanklubunun İdarə Heyəti             24 Dekabr 2012.