Bu gün İslam Cabbarlının doğum günüdür. Bu gün ən xoş arzularımızı bu insana diləməyin və çatdırmağın əsl vaxtıdır. Çünki, onun simasında,  "Xəzər Lənkəran"ın ətrafında belə, sözün bütün müsbət mənalarında layiqli insanlar olduğunu görürük. "Xəzər Lənkəran" camiəsi niyə böyükdür? Ona görə ki, bu komandanın ətrafında onun kimi insanlar toplanıb.

İslam Cabbarlı ac qaldı, susuz qaldı, bir an gözünü belə yummadan yuxusuz qaldı, sağlamlığını təhlükə altında saxladı, lakin nəinki bir dəqiqə, heç bir an belə "Xəzər Lənkəran"sız olmadı. Bəzən yanlış olaraq bəzilərimiz onu başa düşmədik. "Xəzər Lənkəran"a göstərdiyi əvəzsiz xidmətlərində hansısa maraqlarının olduğunu düşündük. Bu təbii ki, belə də olmalıdır. Çünki hər kəs öz arşını ilə ölçür. Amma ölçü vahidlərini təyin edən bütün dünyada qəbul olunmuş etalonlar var. Bəli, bu mənəvi etalon bütün mənalarda hamımıza nümunə ola bilər. Onun "Xəzər Lənkəran”a olan məhəbbəti, onun "Fırtınalar Meydanı”na yolunu bağlasa da, "Xəzər Lənkəran”a olan ürək sevgisini bağlaya bilməyib. Bu insan özünü nə qədər zərbə altına qoysa da, "Xəzər Lənkəran”ın ağ günü üçün döyüşməyi, onun dünya və Avropa komandası olması üçün həyatını qurban verməyə belə hazır olduğunu dəfələrlə sübut etdiyini görmüşük. Təsəvvür edin ki, o, ad gününün ən böyük hədiyyəsi kimi "Xəzər Lənkəran”ın varlığını görür və bu günə təsadüf edən matçda qələbə qazanaraq, gümüş medallara sahib olmasını və Avropa Liqasına komandasının vəsiqə əldə etməsini, bir daha ən böyük hədiyyə hesab edir. Burada qazanc hər hansı madiyyat deyil, yalnız mənəvi qazancdır. Belə mənəviyyatlı tərəfdarları olan komanda isə xoşbəxt olmalıdır. Bu xoşbəxtlik hisslərini isə hamı başa düşməlidir.

Sənə uzun ömür, cansağlığı, həmişəki kimi döyüşkənlik və bol-bol uğurlar arzulayırıq. Hamımız sizdəki düşüncə ilə komandamızın arxasında olsaq, əlbəttə "Xəzər Lənkəran” bir dünya markasıdır!

"Bosman” fanklubu 11 May 2012