Bu gün, daha iki şad xəbərlə yadda qalacaq. "AZAL”la matçın ortalarında zədələnmə səbəbindən əvəzlənməyə məruz qalan komandamızın qapıçısı və həm də kapitanı Kamran Ağayevin zədəsinin ciddi olmadığı aşkar olub. Komandamızın baş həkimi B. Xetaqurovun verdiyi məlumatda, millinin də qapısını qoruyan K.Ağayevin ümumiyyətlə "AZAL”la oyunda zədələnmədiyini deyib. Həmin oyunda K. Ağayevin əvəzlənməsinə onun köhnə zədəsinin süni ot örtüyü ucbatından ağrıdığını söyləyən baş həkim millinin heyətində K. Ağayevin Almaniyaya qarşı meydana çıxa biləcəyini bildirib.

          İkinci şad xəbər isə, bir müddət əvvəl komandamızdan uzaqlaşdırılan Nigeriyalı futbolçu Emeka Oparanın yenidən "Xəzər Lənkəran”a dönməsi ilə bağlıdır. Görünür istədiyi transferi reallaşdıra bilməyən M. Rednik yenidən E. Oparanın xidmətinə ehtiyac duyub. Oynadığı qısa müddətdə azarkeşlərin əksəriyyətinin rəğbətini qazanan Opara komandamızda özünəməxsus oyun tərzi və vurduğu qollarla "Xəzər Lənkəran”a az xeyir verməyib. Həm də biz onu da düşünürük ki, komandamızın yeni transferi olan Vinston Parksla onun oyunu uyğun gələrək böyük nəticələr verəcək. Hələ E. Opara "Xəzər Lənkəran”da oynayarkən bəzən onun oyununun alınmamasını biz, onun oyun tərzini komandamızda tamamlayacaq başqa bir futbolçunun olmaması ilə əlaqələndirirdik. İndi bu boşluğu V. Parks doldurur və bu tandemin "Xəzər Lənkəran” üçün hücumda böyük işlər görəcəyinə ümid edirik. Bizim qənaətimizcə, "QARA ŞİMŞƏK” və "BİZİM DİDYE” rəqib komandalar üçün əsl başağrısına cevriləcəklər.