Yanvarın 13-dən Türkiyənin Antalya şəhərində təlim-məşq düşərgəsi qurmuş "Xəzər Lənkəran” nəhayət bu prosesə də yekun vuraraq, bu gün vətənə qayıdır. Yəqin axşam saatlarında Bakıya çatacaq komandamız günün qalan hissəsini yol yorğunluğunu üzərindən atmaq üçün istirahət etməli olacaq. Lakin əldə etdiyimiz bilgilərə görə fevralın 7-də komanda Bakıda olmaqla iki dəfə məşqə çıxacaqsa, bu sabahısı gün, yəni fevralın 8-də bir dəfə səhər məşqi ilə kifayətlənməklə yekunlaşacaq ki, ardından komanda doğma Lənkərana yola düşüb, "İnter”lə növbəti çempionat oyununun hazırlıqlarını doğma şəhərdə davam etdirməli olacaq.

            Təlim-məşq düşərgəsindən ara-sıra məlumatlar versək də amma gedişatı çox diqqətlə izlədiyimizi deyə bilərik. Hər hansı tələm-tələsik münasibət olmasın deyə toplanışın yekununu gözləmək tərəfimizdən daha məqsədəuyğun hesab edildi və bunda yanılmadığımızı düşünürük. Çünki, təlim-məşq toplanışı öncəsi klub rəhbərliyi ilə görüşüb müəyyən məsələləri öyrənməyə, müzakirə etməyə, daha sonra özümüzün və bütün azarkeş kütləsinin istək və arzularını, həmçinin tələblərini çatdırmaq kimi məsuliyyətli bir işin təşəbbüskarı olmuşduq ki, artıq bununla hər bir futbolsevər tanışdır.

            Bu təlim-məşq ərəfəsində komandamızın necə bir acınacaqlı vəziyyətdə olduğu yəqin ki, yaddaşlardadır. Ardıcıl məşqçi dəyişiklikləri, özü də bunun get-gedə komandanı böhran həddinə çatdıran səhv forma və kadrlarla həyata keçirilməsi və sair, və ilaxır problemlər. Həmin dövrlərdə klub rəhbərliyində müəyyən fikir də formalaşmışdı ki, komandanın baş məşqçisi, yalnız yerli mütəxəssis olmalıdır. Mirça Rednik kimi dahi bir mütəxəssisin ardınca, "Xəzər Lənkəran” azarkeşi isə yalnız və yalnız əcnəbi bir mütəxəssisin komandaya  gətirilməsi tələbindəydi. Bu çox vacib bir amil idi ki, "Xəzər Lənkəran” azarkeşi bu yöndə klub rəhbərliyinə təsir edə bildi və onları əcnəbi mütəxəssisin gətirilməsinə razı sala bildi.

            Bütün bunlarla, "Xəzər Lənkəran” azarkeşi yerli mütəxəssislərimizə hər hansı ümidsizlik və ya hörmətsizlik göstərmək niyyətində deyildi. Hələlik bu yeganə çempionluğumuz və MDB çempionluğumuz və bir çox uğurlarımızın memarı olan Ağasəlim Mircavadov kimi yerli mütəxəssisimizin adıyla bağlıdır. Bunları unutmaq bəlkə də nankorluq olardı. "Xəzər Lənkəran” azarkeşi bunları unutmur. Qoy kim nə deyirsə, desin. Sadəcə indiki məqamda yerli futbol məşqçiləri institutu heç də ürəkaçan deyil, bəlkə də bərbad vəziyyətdədir desək daha düz olar. Bununla futbol qurumları məşğul olmalıdır deyə üstündə dayanmırıq, həm də bu başqa yazının mövzusudur.

            Son illər belə bərbad vəziyyəti elə komandamızın taleyində də görmüş olduq. Hər halda Mirça Rednik kimi bir mütəxəssisi yaxından tanımış "Xəzər Lənkəran” azarkeşi ona tay ola biləcək yerli mütəxəssis görmürdü deyə bu istəkdə idi. Televizorda "Xəzər Lənkəran” azarkeşlərinin də iştirak etdiyi futbol verlişlərinin birində aparıcı Elnur Əşrəfoğlu onlara rəğmən belə bir sual ünvanladı:-"Sizcə, Bakes nə etməlidir ki, Rednik mifini dağıtsın?” Açığı həmin verilişdə qatı Rednik tərəfdarları da var idi ki, biz onlardan müəyyən cavab verəcəklərini düşünsək də bu baş vermədi. Gec də olsa bu mövzuya qayıdarkən bizim Elnur bəyə cavabımız elə onda da belə olacaqdı: Elnur bəy, Rednik mif deyil ki, onu dağıdasan. O böyük REALLIQDIR! Məgər bu reallığı siz sual verdiyiniz vaxtda da və elə indinin özündə də görmək o qədərmi, çətindir? O bir Avropa futbolunun reallığıdır!

            Söhbət heç də təsadüfən bu məqama gəlmədi. Onu demək istəyirik ki, "Xəzər Lənkəran” azarkeşinin bu dönəmdəki ilk uğuru kifayət qədər böyük futbol məktəbinin nümayəndəsi olan Karles Martorell Bakesin şəxsində komandaya əcnəbi baş məşqçi təyinatına klub rəhbərliyini inandıra bildi. Bu ana qədər belə demək mümkündürsə, ölü nöqtəyə düşmüş komandada müəyyən irəliləyişlərə ümid yarandı. Burada klubun sahibinə olunan müraciətin də kifayət qədər rolunun olduğunu deməliyik. Bu fikrin təsdiqi üçün isə müraciətdən əvvəlki və sonrakı dövrləri xatırlamalıyıq.

            Mirça Rednikdən sonra ölü nöqtəyə yuvarlanmaqda olan komandanın təlim-məşq və transfer ərəfələrindəki fəaliyyətini, daha doğrusu fəaliyyətsizliyi səbəbindən meydana buraxmağa 11 futbolçu tapmaq az qala müşkülə çevrilmişdi. Bunun ən böhranlı vəziyyəti son yay transfer dövrü idi. Böyük məsrəflərə rəğmən uzaq Avstriyada təlim-məşq düşərgəsi quran komandamız oradan əliboş qayıtmışdı. Kimisi baxışda futbolçu sınamaq iddiasında idi, kimisi futbolçunu belə bir qısa zamanda tapmağın qeyri-mümkünlüyündən danışırdı, kimlərsə də filan futbolçu ilə anlamağa yaxınıq, lakin son anda nədənsə bu alınmadı. Filan futbolçu artıq yoldadır, lakin son anda həyat yoldaşı buraya gəlməyə ona mane olub, filankəsin atası onu bura gəlməyə qoymadı, filankəsin uşağı ona mane oldu, bəsmankəsin anası və ya bacısı və ya da az qala xalsı oğlu son anda onun bura gəlməsinə mane oldu. Bütün bu çıxılmazlıqların içində adam az qala fikirləşirdi ki, balam dünyadakı bu futbolçu ailələri nə yaman insafsızdırlar! Niyə bizim sevimli komandamıza gəlmək istəyənlərə mane olurlar, özü də son anda.

            Deyəsən bu il futbolçu ailələri insafa gəliblər. Əslində bu insaf məsələsi tamam başqadır. Yay transfer dövrü ilə indikini müqayisə etdikdə, yaxşı mənada nələri deyə bilərik: Onu demək mümkündür ki, heç nə birdən-birə olmur və bu mənada komandamız bu dövrdə bir neçə futbolçunu heyətə qata bilib. Bunların arasında kifayət qədər səs-küylü sayıla biləcək "Saraqosa”lı ispan qapıçı Toni Doblas, onun həmyerlisi "Malaqa”lı müdafiəçi Alvaro Silva, az-çox ümid vəd edən xorvat Marin Orsuliç, birvaxtlar "Beşiktaş” kimi Türkiyə nəhənginin heyətində uğurla çıxış edən Gökhan Güleç, perspektiv vəd edən Uğur Pamuk kimi futbolşular yer aldı. Son məlumata görə Kosta-Rikalı Vilyam Filips Farley də komandamızın heyətinə cəlb olunub. Bütün bunlar birmənalı şəkildə ötənilkindən yaxşı mənada fərqli durum yaradıb. Əlbəttə azarkeşlərimizin gözləntiləri həmişə fantastik olub. Necə ki, bu dəfə də belə idi. Amma onu da bir daha deməliyik ki, heç nə birdən-birə olmur. Bəzən komandanın azarkeşi kimi daha fərqli olmasını istəyirik. Amma belə məqamda bayaq dediyimiz kimi ölü nöqtədən indiki məqama gələ bildiyimizi yada salanda təskinlik tapmaq və hətta gələcəyə doğru ümidlərin yarandığını hiss etmək mümkün olur.

            Burda bir neçə fərqi də qeyd etməliyik. Təlim-məşq toplantısı öncəsi istirahətə yollanan komandanın baş məşqçisi artıq hansı transferlərin ona lazım olacağı adlardan ibarət siyahısını klub rəhbərliyinə təqdim edib ki, bu da bu işdə Mirça Rednikdən sonra ilk professionallığın əlaməti kimi qiymətləndirilməlidir. Yuxarıda adları çəkilən yeni futbolçularımız olan Toni Doblas, Alvaro Silva və Marin Orsuliç həmin siyahıda adları olanlardır. Digər bir məsələ də vardır ki, müəyyən mənada adamı narahat edir. Bu da ondan ibarətdir ki, yeni gələn bəzi futbolçular eniş dövrünü yaşayanlar siyahısındadır. Amma burada da bir şeyi yada salmaq lazımdır ki, oyunçu var yaxşı məşqçinin əlinin altında əsl futbolçuya çevrilir, futbolçu da var ki, pis mütəxəssisin əlində adi bir oyunçuya çevrilir. Uinston Parks kimi artıq avropada kökdən düşmüş bir oyunçunu  Mirça Rednik necə bir canavara çevirmişdi. "Bakı”ya keçəndən sonra isə Parks yenə tənəzzülə məruz qaldı. Ümid edək ki, gənc və məşhurlaşmaq üçün alışıb-yanan və buna potensial imkanları olan Bakes də bunun öhtəsindən gələcək.

            Daha iki məsələni də qeyd etmək istərdik. Biri qapıçı məsələsidir ki, komandanın əvvəl 22-yaşlı xorvat qapıçı İvan Çoviçlə ilkin müqavilə bağlayaraq, sonradan bu fikrindən daşınmasıdır. Əslində Toni Doblas ismi olan yerdə bu anlaşılandır. Digər tərəfdən isə bəlkə də alqışlanasıdır. Çünki komandamızdakı son məqamlardan biri Kamran Ağayevin göndərilməsi məsələsi idi. Onun gedişindən sonra hər qapımızdan buraxdığımız topa görə bəziləri hətta minnətsayağı "Kamran qalsa idi” kəlməsini işlədirdilər və bundan sonra da belə davam edəcəyi şübhəsiz idi. Amma Toni Doblas ismi bütün bu qaragüruhun üstündən xətt çəkir. Bunun üçün klub rəhbərliyi bizcə alqışlanmalıdır.

            Digər məsələ isə Antalya təlim-məşq toplanışı ərəfəsində, klubun sahibi Mübariz bəyin şəxsən baş məşqçi Karles Bakesi İstambula dəvət edərək onunla birlikdə "Fənərbağça” klubunun prezidenti də daxil bu klubun əvəzedicilər komandasının oyununa baxması və bu klubla futbolçuların qarşılıqlı mübadiləsinin müzakirələri də sıradan bir məsələ olmamalıdır. Bu həm də azarkeşlərə bir mesajdır ki, yəni mən özüm bilavasitə komanda ilə maraqlanır və problemləri ilə şəxsən tanış oluram. Mübariz bəyin son dövrlər hər hansı baş məşqçimizi, hər hansı təsadüfi görüşdə yox, bilavasitə dəvət etməsi nadir bir haldır. Klubun sahibi bununla yəqin müraciətdən sonra özünün klubla maraqlandığının sanki mesajını verir.