PFL hakimlər üçün mühafizə qrupu yaratdı

           Peşəkar Futbol Liqası Unibank Premyer Liqasını idarə edən hakimlərin təhlükəsizliyini qorumaq üçün bəzi yeniliklər etməyə hazırlaşır. Qol.Az-ın məlumatına görə, ədalət təmsilçilərinin müxtəlif oyunlardan öncə və sonra bəzi klub nümayəndələri, azarkeşlər tərəfindən təzyiqlərə məruz qalması PFL rəhbərliyinin buna qarşı əks tədbirlərə əl atmasını zəruri edib. PFL prezidenti Ramin Musayev Qol.Az-ın müxbiri ilə söhbətində bildirib ki, belə xoşagəlməz halların qarşısını almaq məqsədilə bundan sonra xüsusi mühafizə qrupu yaradılacaq: "Bu mühafizə qrupunun üzvləri təyinat alan bütün hakimlərin təhlükəsizliyini təmin edəcək. Həm bölgələrdə, həm də paytaxtda keçirilən görüşlər zamanı, hakimlərlə yanaşı mühafizəçilər də göndərəcəyik ki, belə olaylarla qarşılaşmayaq”.

           Qeyd edək ki, cari mövsümün gedişində Lənkəranda keçirilən "Xəzər Lənkəran” – "İnter” oyunundan sonra ev sahibi olan klubun rəsmilərindən Höccət Hacıyev hakimlərin otağına daxil olaraq, onları təhqir etmişdi. Buna görə, klub rəsmisi kifayət qədər sərt cəzalara layiq görülsə də, PFL rəhbərliyi belə halların təkrarlanmaması üçün müvafiq tədbirlərə əl atmağı da vacib sayır.

 Bizim münasibət:

          Hər bir vətəndaşın hüquqlarının və təhlükəsizliyinin qorunması əlbəttə təqdirəlayiq haldır. Təsadüfi deyil ki, bu bütün dünyanın demokratik dövlətlərinin öz vətəndaşlarına yanaşma tərzidir və hər bir dövlətin konstitusiyasında təsbit olunur, eləcə də bizdə. Biz bunu öz ölkəmizin təcrübəsində də görürük. Hətta ölkə Prezidenti andiçmə mərasimində, hər bir ölkə vətəndaşının hüquqlarını və təhlükəsizliyini qoruyacağı barədə təminat verir və buna əməl edir.

          Bizim mövzumuz idman və xüsusən futbolla bağlı olduğu üçün və məhz Prezidentimizin idmana bağlı insan olduğunu nəzərə alaraq, onun ölkəmizdə idman sahəsində xeyli irəliləyişlərə nail olduğunu, futbolun inkişafı üzrə Dövlət Proqramını təsdiq edərək, 2015-ci ilə qədər bu proqramın həyata keçirilməsini müvafiq qurumlara həvalə edib, şəxsən nəzarətdə saxlaması futbolsevərlərdə nəhayət, Azərbaycanda da futbolun inkişaf edəcəyinə böyük ümidlər yaratmışdır.

          Azərbaycanda futbolla bağlı olan əsas qurumlar AFFA və PFL də bu proqramdan irəli gələn vəzifə və öhtəlikləri həyata keçirməyə borcludurlar və deyərdik ki, çalışırlar da. Futbolun inkişafı böyük proseslərin məcmusudur və bir çox amillərdən asılıdır. Bunlardan biri də Futbol Hakimliyidir. Futbol hakimliyi ölkəmizdə AFFA nın nəzdində fəaliyyət göstərən əsasən Hakimlər Komitəsi, Hakim İnspektorlar Komitəsi tərəfindən həyata keçirilir. Onların isə bunun öhtəsindən nə dərəcədə gəlmələrini pis, yaxşı hamımız bilirik.

          2010/2011 mövsümünün dörd turu arxada qalsa da biz hələki, bir matçda, 3-cü turda Fariz Yusifovun baş hakim kimi idarə etdiyi "Xəzər Lənkəran” – "İnter” oyunundan narazı qalmışıq. Çox güman belə "idarəetmə” Fariz Yusifovun 4-cü tur oyunlarına təyinat almaması və eyni zamanda Premyer liqanın 5-ci turuna da təyinat almayıb, Birinci Divizion oyunlarını idarə etməyə göndərilməsinə gətirib çıxarmışdır.

          Amma keçən mövsüm və ondan əvvəlki mövsümlərdə isə bərbad və qərəzli hakim idarəçiliyinə az rast gəlinməyib. Bu müxtəlif hakimlərin ifasında özünü çox göstərib ki, indi həmin hakimlərin bəziləri ümumiyyətlə hakimlikdən uzaqlaşdırılıb.

          Konkret olaraq, bütün görüşlərini izlədiyimiz "Xəzər Lənkəran” klubunun dəfələrlə hakimlər tərəfindən sıxışdırıldığının çoxları şahidi olmuşdur. Belə misalları çox çəkmək olar. Lakin ötən mövsümün Lənkəranda keçirilən və Əfqan Həmzəyev tərəfindən idarə olunan "Xəzər Lənkəran” – "Neftçi” qarşılaşması yəqin ki, futbolsevərlərin yaddaşlarından silinməyəcək. "Xəzər Lənkəran” azarkeşlərinin ard-arda müxtəlif instansiyalara müraciətini nəzərə alaraq və AFFA prezidenti cənab Rövnəq Abdullayev tərəfindən haqlı olaraq, bu matçla bağlı Əfqan Həmzəyev üç oyunluq diskvalifikasiya olundu və həmçinin müəyyən şəxslər də müxtəlif formalarda cəzalandırıldı.

          Düzdür  bu matçda müxtəlif formalı qalmaqallar və hakimin təhqir olunması belə qeydə alınmışdı. Amma gəlin görək belə qalmaqal həmişə baş verirmi? Ümumiyyətlə, normal idarə olunan neçə-neçə matçlarda azarkeşlərimiz hakimlərin təmiz idarəçiliyini qiumətləndirmiş, onlar meydanı tərk edən zaman azarkeşlərlə sağollaşarkən, uzun uzadı əl çalmaqla azarkeşlər tərəfindən alqışlanmışlar. Ümumiyyətlə əxlaq və başqa qayda-qanunlara görə kim nə edirsə, o da başına gəlir. Bunu dahilər bir çox misallarla və ya təmsillərlə qələmə almışlar. Məsələn, məşhur "Durna və Tülkü” timsalında, sonda tülkünün dili ilə deyilən məşhur kəlam olan "Nə tökərsən qarşına, o çıxar qaşığına” deyimini hər kəs xatırlamamış deyil.

          Son günlərdə PFL hakimlərin qorunması ilə əlaqədar mühafizə qruplarının yaradılmasına qərar verib. Yuxarıda göstərdiyimiz kimi hər kəsin qorunması təqdirəlayiq haldır. Amma bu o demək olmamalıdır ki, hakim özbaşınalığı və ədalətsizliyi, qorunmalarına arxayın olaraq baş alıb getsin. Əlbəttə, PFL və Hakimlər Komitəsi yəqin ki, bundan sonra hakimlərin işlərinə daha diqqətlə yanaşacaq lazım gəldikdə isə lazımi cəza tədbirləri tətbiq edəcəklər. Amma hər matçın komandalar üçün bəlkə də həyati əhəmiyyət kəsb etməsini futbol qurumları anlamalıdırlar. Çünki sonda bu gün edilən hakim səhfi və ya qərəzi sonda hansısa klubu çempionluqdan edə bilən xal itkisi ilə üz-üzə qoya bilər.

          Hakim qorunursa arxayınlaşmamalı, əvəzində onun hakimlik həyatına təsir edən cəzalarla üz-üzə qalmalıdır ki, mövsüm sonunda hansısa komandanı çempionluqdan və ya başqa uğurdan edib, ona həyati zərbə vurmasın.

          Bizim sağlam hakimlik ənənələrimiz əvvəl də olub, indi də var. Lakin cənab hakimlər, gəlin bu sağlam ənənələri siz də davam etdirin ki, heç olmasa özbəkistanlı hakim Ravşan İrmatov kimi, fitinizin səsi dünyanın məşhur turnirlərindən eşidilsin. Ravşan İrmatovu isə son Dünya Çempionatının bir neçə məşhur oyunundan, onun verdiyi ədalətli və düzgün qərarlardan bütün dünya tanıdı.