"Makkabi”
Hayfa görüşü üçün "Xəzər Lənkəran” İsrailə
erkən gəldi, məşqlər keçirdi. Gözlənilənlərin əksinə olaraq oyuna heç də lazımi
dərəcədə motivasiya olunmamış bu komanda
baş məşqçi Con Benjamin Toşakın ümidlərini doğrultmadı. Çünki Toşak səfər
ərəfəsində demişdi ki, mən bu komandaya inanmasaydım bura gətirməzdim. Amma
görüş bittikdən sonra, "Mən 30 illik baş məşqçilik təcrübəmdə hər hansı
komandamdan bu qədər zəif oyun görməmişdim”-dedi. Hansı ki, bu 30 ili Avropa
futbolunun ən uca dağlarında keçirib cənab Toşak. Məgər 30 illik belə təcrübə
bəs etmirmi ki, komandada hücum xəttinin zəif olduğunu görəsən? Bəs orta
xətdəki çatmamazlığı? Müdafiə də Avropa yarışları üçün gücsüz deyilmi? Hələ
bazarlıqları demirəm. Daxili bazar məhsullarından Nildonu oyundan sonra əraziyə
yaxın olan Nil çayına atmaq lazım idi və sonra da Braziliya şəkər qamışı ilə
onu orda sıxıb batırmaq lazım idi. Elə soyadı qəliz Zohairi də. Afrikaya yaxın
ərazilərə getmişkən Tounkaranı da Maliyə göndərmək lazım idi ki, gedib orada
qalmış başını tapsın. Futbolçu nə qədər başsız olarmış? Topu götürüb ayaqları
ilə hara daşıdığını, sonra onunla nə edəcəyini bilmək üçün futbolcuda baş
lazımdır, baş! O baş ki, Tounkarada yoxdur. Elə bugünki "Xəzər Lənkəran” da Tounkaradan
fərqlənmir. Tounkara topu götürüb rəqiblərlə mübarizəyə girişirsə, sonda
vəziyyətdən necə çıxacağını bilmirsə, nəticədə ya topu itirir, ya da qapının
hansı tərəfdə olmasını bilmədən sadəcə zərbə vurursa, elə komanda da həmin
vəziyyətdədir. Topu ələ keçirmiş komanda rəqiblərlə vurnuxur, hücum xəttində "baş”
olmadığı üçün sonda ya top itirilir, və ya da istiqamət bilinmədən hara gəldi
vurulur.
Toşak
bunları görmürmü? Və ya 30 illik təcrübə bunları bilməyə yetmirmi? Bu ola
bilməz! Onda bəs niyə layiqli futbolcular komandaya cəlb edilmir? Toşak buna
necə dözür? Yəqin komandaya gələndə o hansısa öhdəliklər götürüb.
Bəs
klub rəhbərliyi bunlara necə dözür? Bu 10 ildə neçə-neçə milyonlar, hətta
onmilyonlar xərcləndiyi bu komanda niyə belə vəziyyətdədir? Nədir bunun səbəbi?
10 illiklə əlaqədar olaraq Avropada sayılan "Fənərbağça” kimi nəhəngi Lənkərana
gətirməyi bacaran bir klub rəhbəri, bir neçə oyuncunu komandaya gətirə
bilmirmi? Bilir! Bu 10-illik tarixdə neçə-neçə ulduzu komandaya gətirməklə bunu
çoxdan sübut edə bilib. Dərəlioğlu kimi futbolçunu 10 il öncə Lənkərana
gətirməyə razı salmışdısa deməli puluna minnət. İndi o dövrdən daha on il keçib
və deməli daha 10 illik təcrübə var. Üstəgəl Toşakın da 30 illik təcrübəsin.
Deməli iş bunda deyil. Bu 10 ildə iddialı olan və çempion olmaq üçün yatırılan
onmilyonları Əfqan Həmzəyevin, Anar Salmanovun və neçə-neçə hakimin
vicdansızcasına çalınan fitləri ilə qəpik-quruşa çeviriblər. Onlar da özbaşına
deyil ki, bu milyonları heçə döndərsinlər. Deməli futbol qurumlarında daha kimlər
və daha nələr çəkilən zəhmətləri heçə döndərir. Bəziləri futboldan qovulub,
bəziləri də qovulmasa yəqin ki, belə olacaq. Axı bizlərdən hər hansı birimiz
bizə lazım olmayan işə müəyyən qədər pul xərcləsək və bu paranı kimlərsə heçə
döndərsə, heç artıq bir manat da xərcləmərik. O saat hər şeyə tüpürərik.
Haqlı-haqsız milyonlarından keçən kimləri isə qınamaqda nə qədər haqlıyıq?
Vallah, idmanın şahı adlandırılan futbolu o qədər çirkaba bulaşdırıblar ki,..
Məni
heç kim qınamasın. Qınayana bir sualım olacaq əgər sənin müəyyən qədər para
xərcləyib düzəltdiyin bir şeyi haqq-nahaq vurub dağıdırlarsa, onda daha sonra o
istiqamətdə pulunu xərcləyərsənmi? İnsan öz bir neçə manatından keçmirsə,
başqasının milyonlarına xor baxmalıdırmı? Mirhafiz Babayev
|