Yenə may ayı, yenə gilasın yetişən vaxtı və yenə anbarda qalan səbət yada düşdü. Bizlərdə ağacdan gilası dərib səbətə yığırlar. Kimisi elə özü üçün istifadə edib meyvə kimi yeyir və ya mürəbbə bişirir. Kimisi də çox gilas dərdiyindən elə əvvəlcədən onu bazar üçün nəzərdə tutur. Qısası əmtəə kimi istifadə edir. Səbətlərin də bəzən seyrək toxunuşlu olmasından və ya köhnə olmasından, o qədər yerə qoyulub götürülməsi səbəbindən dibi nazikləşir ki, nəticədə də açılmış olur. Belə olanda bazara aparılan gilas yolda səbətin dibindən dağıla-dağıla gedir və bazara müəyyən çəki itkisi ilə çatır. Bu o qədər də böyük itki sayılmadığından, ona oqədər də fikir vermirlər, əhəmiyyətsiz itki kimi qəbul edirlər. Ona görə də böyüklərimizdə, kimsə danışanda ona fikir verilməyəndə "səbət g....... gilas tökülmür!” kimi etiraz növü var. Yəni danışılanlar boşuna deyil a bala...

            Nə isə deyəsən xalqlarda bir sıra ümumi mədəniyyət yaxınlığı burada da özünü göstərir. Yoxsa, niyə həmişə gilas yetişən vaxtı UEFA səbətlərini çıxarıb qoyur ortaya ki, görək səbətlərdən hansı daha çox gilas tutur və hansından hansı növ gilas çıxacaq. Bunun üçün əvvəl gilasları dəyərləndirirlər ki, hansını, hansı səbətə qoymalıdırlar. Əvvəlcə ən yaxşılarını seçib birinci səbəti doldururlar ki, bunu da bazarda baha qiymətə satsınlar. Sonra birinci səbətdə olan gilaslardan az fəırqlənənləri ikinci səbətə yığırlar. Ondan zəiflərini və nəhayət ən zəiflərini ardıcıl olaraq üçüncü və dördüncü səbətə yığırlar. Burda da fikir verirlər ki, əvvəlki iki səbət dolduqdan sonra, bir yerə yığılıb səpələnmədən qalanları üçüncüyə, o tərəf bu tərəfə səpələnmiş malları isə dördüncüyə yığırlar. Qısası malları çeşidləyirlər. Bu il isə çeşidləmədə bir az çox fikirləşirlər hələ. Çeşidləyici yerdə az miqdar qalmış mallara baxaraq, soruşur ki, ay bala bu səpələnmişləri hansı səbətə yığım?  Hələki malı bazara çıxarandan səs çıxmır ki, çıxmır.

            İşin də pisi ondadır ki, bizim tərəfin məhsulu olan mallar dan bir hissəsi yerdə qalıb. O biri dadsız, yalnız dekorativ gözəlliyi olan gilasları artıq səbətlərə yerləşdiriblər. Amma cənubun dadlı növü olan və çox vitamini ilə seçilən məhsulu səbətə hələ də yığmayıblar. İndi gəl bunlara başa sal ki, ay qardaş, bu mal, sən gördüyün o birilərindən deyil. Bu çox dadlı, çox vitaminli və xarab olmayan məhsuldur. Nə olsun ki, bizdən sizə göndərilən o biri mallara güclü xarakteristika verib, gözəl də etiget yapışdırıblar. Bu sizi aldatmasın. Özünüz araşdırın görün hansı daha layiqlidir. Onda bilərsiniz malların əsl fərqin. Deyəsən bu çağırış orada kiminsə ağlına batıb deyə yaman labarator analizlərə başlayıblar. Əşşi, düzünü təyin etsələr də, etməsələr də bazara çıxarılandan sonra bilinəcək ki, hansı məhsul daha uzun ömürlüdür və çox davam gətirəcək. UEFA-nın səbətləri bazara gedincə bəzi mallar da elə yolda dağılacaq.