Bilirsiniz ki, May ayının 28-də ölkə kubokunun finalı keçiriləcək. Finalda "Neftçi” və "Xəzər Lənkəran” komandaları görüşəcəklər. "Xəzər Lənkəran” azarkeşləri kimi "Bosman” fanklubu bu oyuna hazırlıq görür və bu məqsədlə may ayının 21-də fanklubumuz öz toplantısını keçirmişdir.

         Əvvəllər kubokun final oyunu bir qayda olaraq elə bu günə təyin edilirdisə, sonradan finalın bu ənənəvi tarixi dəyişdirilərək, may ayının müxtəlif günlərinə salınırdı. Bilirsiniz ki, May ayının 28-i Azərbaycan Respublikasının müstəqil dövlət kimi elan olunduğu şərəfli bir tarixdir. Ölkəsini sevən hər bir kəs üçün bundan şərəfli bir tarix ola bilməz. Bu tarix bütün ölkəmizdə sevinclə qeyd olunan bir dövlət bayramıdır. Odur ki, final oyununun bu bayram günündə keçirilməsi futbol ictimaiyyəti üçün ikiqat bayrama çevrilir. Elə futbol ictimaiyyətinin, idman mediasının, xüsusən də "Futbol+” qəzetinin ardıcıl səyləri və davamlı yazıları sayəsində nəhayət final oyunu ənənəvi tarixinə qovuşdu. "Bosman” fanklubunun da dünənki toplantısında finala hazırlıq məsələsinə məhz bu prizmadan yanaşmaq idi.

         Hamının bildiyi kimi bu iki komanda arasında keçirilən oyunlar  özünəməxsusluğu və gərginliyi ilə seçilir. Zaman-zaman hər iki klubun azarkeşləri arasında müxtəlif söz atışmalarından tutmuş, digər xoşa gəlməyən hallar da yaşanıb.

         "Bosman” fanklubunun dünənki toplantısında bütün bunlar müzakirə olunaraq, qərara alındı ki, olub keçənləri unudaraq bu gözəl bayram günündə Azərbaycan Respublikası naminə bu gözəl bayram şərəfinə hər iki komandanın azarkeşləri bir-biri ilə hörmətlə davransın və bu əziz bayram günündə xoş ovqat yaşansın. Futbol bir idman növüdür. Qoy həmin gün meydanda əsl idman mübarizəsi getsin və kim haqq edərsə, o da qalib gəlsin. Azarkeşlərə komandalarının qalib gəlməsindən və ya məğlub olmasından asılı olmayaraq xoş həyəcan qalsın.