-Azərbaycan kubokunun finalında baş verən qalmaqal sizcə nəyin nəticəsi idi?

- Bildiyiniz kimi kubokun finalı Azərbaycanın dövlət kimi elan olunması yəni müstəqllik gününə təsadüf edirdi və bu xoş gündə vətənini sevən heç kimsəyə hər hansı məsələ, qalmaqala əsas verən səbəb ola bilməzdi. Amma çox təəssüf ki, bu baş verdi və həm də dostluq vasitəsi sayılan idman sahəsində. Bu, az əvvəl "Bakı”, "Qarabağ” və digər klublarla "Neftçi” klubu arasında baş verən oxşar halların, belə demək mümkünsə, cəzasız qalmasının nəticəsidir. Söhbət bir-iki oyunluq və ya maddi cəzadan getmir. Burda xəsarət, idmançılar arasında və yarış zamanı baş verməyib deyə, yuxarıda sadaladığım cəzalar yetərsizdir. Oyundan sonra klubun işçisi digər klubun idmançısına, konkretləşdirsək, mühafizə xidmətinin əməkdaşları digər klubun futbolçusuna xəsarət yetiribsə, bu artıq hüquq mühafizə orqanlarının səlahiyyətində olan bir məsələdir. Yadınızdadırsa, bir müddət əvvəl ölkə prezidenti yol hərəkəti pozuntuları zamanı cərimələrin artırılması ilə əlaqədar göstəriş verəndə belə bir kəlmə işlətmişdi: Bir adamın ki, altında əlli min, yüz minlik avtomobili varsa, əlbəttəki o qaydanı pozacaq və kiçik olan 10-15 manatlıq cəriməni asanlıqla ödəyəcək.

- Lənkəranlı futbol veteranları və fan klublar ölkə ictimaiyyətinə müraciət etdi. Nəyinsə dəyişəcəyinə ümid varmı?

- Hər halda bu müraciət əlbəttə təsirsiz ötüşməyəcək. Çünki haqlı və insanpərvər bir müraciətdir. Müraciəti daha da kəskin etmək olardı. Lakin bildiyimizə görə hüquq mühafizə orqanlarında da bu iş araşdırılır və istintaqa təzyiq olmasın deyə yumşaq formada tərtib olundu.

- Baş verən hadisələrin qarşısını almaq üçün günahkar tərəf, yəni "Neftçi” klubu rəsmən üzr istəməyib. Düzdür klubun iki təmsilçisi yalnız öz adından baş verənlərə görə, üzr istəyib. Buna münasibətiniz necədir?

- Əslində üzr istəmək insanlığın və mədəniyyətin bir növüdür. Bunu təqsirini anlayan hər hansı bir özünə hörmət qoyan tərəf etməlidir. Ya bunun yoxluğudan ya da özlərini təqsirkar bilmədiklərindən bunu etməyiblər. Edənlər də çox sağ olsun və digərlərini də bu yola dəvət etsinlər ki, əks tərəf də bağışlaya bilsin. Yəqin özündən yuxarılara yaxın olmanın eqoizmi kimlərəsə bu addımı atmağa imkan vermir.

- Kubokun final oyunundan əvvəl "Bosman” fan klubu Respublika günündə keçirilən qarşılaşmada hər iki komandanın azarkeşlərlərini bayram günündə bir-birinə hörmətlə yanaşmasına cağırmışdız. Bildiyimiz qədəri ilə "Neftçi” azarkeşləri bu təşəbbüsə soyuq yanaşıb. Buna aydınlıq gətirməyinizi xahiş edirəm...

- Biz "Bosman” fanklubu olaraq həmişə sağlam münasibətin tərəfdarıyıq. Bəzən buna görə bizi qınayanlar da olur. Amma son final hadisələri bir daha onlara göstərdi ki, biz düz yoldayıq. Oyndan bir neçə gün əvvəl fanklubumuzda toplantı keçirmişdik. Qərara alınmışdı ki, rəqib tərəfin azarkeşləri ilə də görüş keçirək və bu bayram gününə kölgə salacaq heç bir hərəkətə yol verməyək. Mən "Flaqman” fanklubunun rəhbəri Ceyhun bəylə telefon əlaqəsi yaradaraq fikirlərimizi ona çatdırdım. Ceyhun bəy də bunlarla tam razı olduqlarını həm ilk, həm də ondan sonrakı telefon əlaqəsi zamanı bildirdi. Sizin də gördüyünüz kimi azarkeşlər arasında həmin gün heç bir xoşagəlməz hal yaşanmadı. Yaşananlar "Neftçi” klubu səviyyəsində oldu.

- Bizə çatan məlumatlara görə, rəqib komandanın fan klublarının sizin təşəbbüsə dəstək verməməsi "Neftçi” rəhbərliyinin tapşırığı olub. Bu nə dərəcədə düzdür?

- Bu barədə bir söz deyə bilmərəm, yanlarında olmamışam. Biz sadəcə vaxt azlığından görüşə bilmədik, amma telefon əlaqəsi zamanı razılığa gələ bildik. Onu da deyim ki, bu razılıq heç bir israrsız oldu və isti qarşılandı.

- Sizə elə gəlmirmi, "Neftçi” rəhbərliyi təşəbbüsünü dəstəkləməməklə bayram günü dava-dalaşda maraqlı olduğunu göstərib?

- Yox, məncə onlar da heç vaxt istəməzdilər ki, bayram günündə belə bir şey olsun. Ən azı özündən yuxarıdakıları pis vəziyyətdə qoydular. Burda sadəcə kiçik vəzifəli şəxslərin özündən böyüklərə yaxın olma hissinin verdiyi eqoizm və bir də deyirəm ki, əvvəl olan oxşar hadisələrə görə cəzasızlığın verdiyi arxayınlıq rol oynadı.

- Bu hadisələrin cavabı kimi Lənkəranda keçirilən "Böyük oyun”da analoji hadisələrin təkrarlanması mümkündürmü?

- Çox gözəl və yerində verilmiş sualdır. Əlbəttə, bunun baş vermə ehtimalı o halda qalır ki, məsələnin üstündən elə belə keçmiş olsunlar. Burda inzibati cəzalar olmalıdır. O halda hamı anlayar ki, qanun var və bundan qaçmaq mümkün deyil. Əks halda bəzi məsul şəxslər deyir ki, unudun getsin və ya odun üstünə benzin tökməyək, su tökək. Onlar niyə bəs deyəndə bunu fikirləşmirlər ki, bir-birinin üstünə yığılan potensial narazılıq sonradan daha da şiddətli nəticələrə səbəb ola bilər. Bizdə bəzən futbol rəsmiləri orta əsrlərdəki kimi danışır, idarə edirlər. Bu hadisələr elə bu davranışın nəticəsidir. Əgər bu işlərdə müəyyən günahı olan insanlar cəza alsalar və ya işdən götürülsələr, inandırıram ki, xoşagəlməzliklərin qarşısı alınmış olar. Həmçinin hüquq sərhədlərinin də bilinməməsi buna yon açır. PFL təhlükəsizliyi təmin edə bilmir. İntizam komitəsi fotoqrafa görə klubu cərimə edir və ona bir neçə oyunluq cəza verir. Bu hüquq sərhədlərinin bilinməməsinin ucbatından olan işdir. Məsələnin bu yerinə çatanda İK deməliydi ki, biz oyundan sonra baş verən fotoğrafın və ya bu kimi şəxslərin əməllərinə görə cəza verə bilmərik. Bunu hüquq mühafizə orqanları araşdırmalıdır. Bax bunu bilməyənlər bizim futbola rəhbərlik edir.  

- Fan klub rəhbəri kimi sizcə "Xəzər Lənkəran” klubunun baş verənlərə münasibəti yetərli idimi? Klubun idman direktoru Babək Quliyevin vəzifəsindən çıxarılmasını necə qarşıladız?

- Mətbuatdan bildiyimiz qədərincə klubun sahibi, prezidenti, vitse-prezidenti, mətbuat katibi kifayət qədər sərt münasibət bildiriblər. Bir də apelyasiya şikayəti vermək barədə qərarlarını açıqlayıblar. Klubla şəxsi əlaqələrimiz olmadığından daha nə planları olduğundan isə xəbərim yoxdur. Məncə hələlik bu mərhələdə hüquqi cəhətdən bunları yetərli sayıram. Bir də onu da deməliyəm ki, digər klubların dost fanklubları da bizimlə əlaqə saxlayıb, bu haqq yolunda dəstəklərini verəcəklərini nəzərimizə çatdırıblar. Babək Quliyev haqqında da təəssüf hissi keçiririk. Bunu obrazlı desəm, nə yatdım ki, nə də yuxu görəm.

- "Xəzər Lənkəran”ın yeni tarnsferləri azarkeşləri qane edirmi? Növbəti mövsüm klub qarşısına qoyduğu məqsədlərə çatmaq üçün nələr dəyişməlidir?

- Mənə elə gəlir ki, komandanı gücləndirmək baxımından Mirça Rednikin vaxtını çıxmaq şərti ilə əvvəlki illərdən daha fəal transfer yanaşması göstərilir. Hələlik edilən transferlər orta səviyyəlidir. Bir də istedadlı oyuncu əsl mütəxəssis əlində gözəl futbolcuya çevrilir. Bunu Rednikin vaxtında Uinston Parks və digərlərinin misalında göstərə bilərəm. Sonrakı Parks artıq unudulub. Bir də bu hələ transferlərin tamamı deyil. Toşakın böyük təcrübəsini və tanınmış olmasını nəzərə alsaq, bundan sonrakı mərhələdə daha güclülərini gözləyirik. Hər halda klubun qarşıya qoyduğu məqsədlərinə görə də hərəkət etdiyini düşünürəm. Bildiyimə görə Con Toşak istirahətə gedərkən yolüstü klubun sahibi ilə də görüşüb. Əgər bu belədirsə, onda sualınıza müsbət cavab verə bilərəm. Nələrin dəyişməsinin lazım olduğuna gəldikdə, bu bizim klub rəhbərliyi ilə aylar əvvəlki görüşümüzdən başlayıb. Mübariz müəllim səxsən diqqətini kluba ayırıbsa, inanıram ki, hər şey yaxşı olmalıdır.

Mənbə: Avrofutbol.com