Dünya Çempionatının seçmə mərhələsindəki iki oyunumuz arxada qaldı. İsraildən bir xal aldıq, Portuqaliya ilə oyunda canımızı üç topla yaxşı qurtardıq. İki oyundan bir xal cibimizdədi. Necə deyərlər, yoxa lənət!

Avropa stadionlarındakı oyunlara baxmaqdan gözlərimiz yoruldu. Bizim məmləkətdə baş verən oyunlara baxmağın tam zamanıdı. Qarşıdan "Böyük oyun” gəlir. Nə olsun ki, növbəti çempionatımız şair demişkən, gec açıldı, tez soldu. Təqvimdəki yerdəyişmələrə baxanda adamın başı fırlanır. Sponsorsuz çempionat belə olar da. Hələ mən söyüşü demirəm. Az.TV və onun kiçik gədəsi "İdman Azərbaycan” söyüş qoyublar. Nə özləri bizim futbolu göstərir, nə də başqasına imkan verir. Bir yandan da Peşəkar Futbol Liqasının tərs damarı tutub. PFL yayım üçün o qədər pul-para istəyir ki, elə bil Şakiranın toyundan eksklüziv reportaj hazırlayacaq.

Günlər də öz işindədi. Yola saldığımız hər gün bizi "Böyük oyun”a yaxınlaşdırır. Azərbaycan futboluna xüsusi rəng qatan əzəli rəqiblərin bu ilki ilk dueli Bakıxanov qəsəbəsi tərəflərdə olacaq. Oyun öncəsi "Neftçi” və "Xəzər Lənkəran”ın düşərgəsində fərqli ovqat var. Bakının əksər küçələrində qazıntı işləri aparıldığından mən çox da dərinə getmirəm. Görünən odu ki, "Neftçi” Avroliqanın qrup mərhələsinə vəsiqə qazandığından klubun futbolçuları küçənin tən ortası ilə gedir, maşınlara da yol vermirlər.

"Xəzər Lənkəran”ın isə  Avropa səyahəti tez başa çatdı. Avroliqa yarışlarını yelə verən klub son günlər fiziki hazırlıq üzrə məşqçi və bir neçə əcnəbi oyunçu transfer edib. Necə deyərlər, "Turan” və "Sumqayıt”la mübarizəyə tam hazırdı.

"Böyük oyun” ərəfəsində Vobay gəlib durub gözlərimin qabağında. Nə sağa qaçır, nə də sola. Rumın məşqçi Mirça Rednikin Lənkərana gətirdiyi istedadlı futbolçu təəssüf ki, indi əks düşərgədə top qovur. Rednik rumın futbolçu Domanın fırlatdığı qızla gəzdiyinə görə "Xəzər Lənkəran”dan qovulandan sonra Vobay da "Neftçi”nin düşərgəsində göründü. İndi "Neftçi”nin Avropa miqyaslı yarışlarında qol vurmamış meydançadan çıxmır.

Vobay "Neftçi”nin bazasında göründüyü ilk günlərdə hamı çaşıb qalmışdı. Axı "Xəzər Lənkəran” rəsmiləri tam əminliklə deyirdilər ki, futbolçu ilə daşdan keçən müqaviləmiz var, darıxmayın, bir-iki gündən sonra Vobay suyu süzülə-süzülə Lənkərana qayıdacaq. Cənub klubunu fırladanlardan biri- Nökərvəli Xanşükürov bu məsələdə əməlli-başlı fəallıq göstərirdi. Müqavilə məsələsində elə əmin danışırdı ki...

Nökərvəli Xanşükürov  ölənlərinin ruhuna, qalanlarının canına and içirdi. Yumru, üzlər görmüş üzünə o qədər "Bu ölsün” vururdu ki, son bir həftədə üzünün həmin ərazisində tük də bitmirdi. Qarşısına çıxan jurnalistlərə deyirdi ki, Vobayın müqaviləsi məndədi, sərmişəm çəməndədi. Kim inanmırsa, faks nömrəsini versin, iki dəqiqədən sonra müqavilənin surətini göndərim. Həmin sənədi mənə də göndərdi. Nökərvəli Xanşükürovun faksladığı sənədi dəyərli oxucuların diqqətinə təqdim edirəm:

"Arayış. Verilir Kürdəmir rayonunun Yekəxana kənd sakini Qılınc Şirvan oğlu Bəylərova ondan ötrü ki, o, həyətyanı sahəsində yetişdirdiyi 850 (səkkiz yüz əlli) kiloqram üzümü Ağcabədi rayonunun bazarında sata bilər”.

Göründüyü kimi, həmin sənəddə Vobayla bağlı bir cümlə belə yoxdu. Futbolçu isə "Neftçi”də qollarını sıralamaqda davam edir. Bir zamanlar and içən, yaxa cıran Nökərvəli Xanşükürovdan səs-səmir çıxmır ki, çıxmır.

Son günlər gözlərimin qabağından çəkilməyən Vobay "Böyük oyun”da kimin heyətində top qovacaq? Maraqlı sualdı, eləmi? Məndə olan və sizlərə ötürdüyüm xəbərə görə, növbəti "Böyük oyun” ərəfəsi Nökərvəli Xanşükürov "Neftçi”nin rəhbərlərindən sayılan Hakimqafar Hakimovla görüşüb. "Bala bildirçin” kafesində baş tutan həmin görüşdə Nökərvəli bizim milli yeməyimiz sayılan bozbaş haqqında mühazirə oxuyub və deyib ki, qardaş, goranboylular demişkən, bozbaş yaxşı şeydi, amma bir gün sizdə, bir gün bizdə. Hakimqafar Hakimov da əlüstü yuxarılara zəng edəndən sonra razılaşıb. Həmin razılaşmaya əsasən də, Vobay "Böyük oyun”da 45 dəqiqə "Xəzər Lənkəran”ın, 45 dəqiqə də "Neftçi”nin formasını geyinəcək. Amma birinci hissədə hansı komandanın heyətində oynayacağı görüşə 53 dəqiqə qalmış Dərnəgülə gedən yolun kənarındakı 6-cı işıqforun yanında atılacaq püşkdən sonra məlum olacaq.

"Böyük oyun”a baxacaq azarkeşlər futbol aləmində tarixi yeniliyin şahidi olacaqlar. Telekanallar bu yekəlikdə hadisəni çəkməməklə çox şey uduzacaqlar. Kim bu böyük olayı canlı görmək istəyirsə, özünü Bakıxanov qəsəbəsi tərəfə versin.

Şəxsən mən özüm həmin gün stadionda olmayacağam. Daha vacib işim var...

Mənbə: "Avrofutbol.com”