Həyatda təsadüf çox nadir hallarda olur. Baş verən hər hansı bir hadisə ondan əvvəlkinin davamı və ya növbəti bir olayın başlanğıcıdı. Bu yazıya başlayanda təqvimdə yeni gün başlamışdı -22 iyun. Yəni tarixi bir gün. Düz 72 il öncə almanlar çıxdıqları yerdən sovetlərə hücuma başladılar. Hələ o zaman çox gənc olan babalarımız dava paltarlarını geyinib getdilər nemeslərlə vuruşmağa. Çoxu heç geri qayıda bilmədi. Ailəsinin yanına dönənlərin çoxu yaralanıb gəldi. Böyük şairimiz Ramiz Rövşən demişkən

Oğul gəlib dizinəcən

Hanı dizdən aşağısı…

Nemeslərin üzündən babalarımızı doyunca görə bilmədik. Babalarımdan birini heç görmədim. Davadan dönmədi ki… O biri babam müharibə gedən yerlərdə ayaq barmaqlarını qoyub gəldi.

Həyatda təsadüf çox nadir hallarda olur. Böyük Vətən Müharibəsi deyilən bu böyük savaşın başlaması qeyd olunan günlərdə hansısa bir hiss məni dünya şöhrətli yazıçı Çingiz Aytmatovun evimizdəki kitabına tərəf çəkirdi. Və bu günlərdə yazıçının "Erkən gələn durnalar” povestini oxumağa başladım. Müharibə dövründə min bir əziyyətə qatlaşan qırğız uşaqları Almaniyadan şad xəbər gözləyirlər. Müharibənin bitəcəyinə, atalarının davadan sağ-salamat qayıdacaqlarına inanırlar.

Tarixin sonrakı gedişi bütün dünyaya məlumdu. Babalarımız nemesləri çıxdıqları yerə qədər qovub qələbə qazandılar. Almaniyadan şad xəbər gəldi. Düzdü, indi həmin o tarixi, dünyanın xəritəsini dəyişən qələbəyə münasibət birmənalı deyil. Bu mühakiməni zamanın öhdəsinə buraxıb keçək futbola…

Həyatda təsadüf çox nadir hallarda olur. Bu arda "Xəzər Lənkəran” futbol klubu yeni mövsümə hazırlıqlarına nemeslərin çıxdığı yerdə başlayıb. Klubun minlərlə azarkeşi yenə Almaniyadan şad xəbər gözləyir. Hamı orada baş verənləri diqqətlə izləyir, xırdaca detalı belə gözdən qaçırmamağa çalışır.

Babalarımız demişkən, başına gələn başmaqçı olar. Əvvəlki toplanışlarda buraxılan səhvlər, qeyri-ciddi addımlar "ağ-yaşıl” gəmini içindən yedi. Bu üzdən ən möhtəşəm tərəfdar ordusuna malik "Xəzər Lənkəran” milli çempionatda layiq olmadığı yerə gəldi. Cənublu fanatların Almaniyada başlayan hazırlıq prosesinə belə həssas yanaşmaları başa düşüləndi. "Xəzər Lənkəran” bu dəfə ötən mövsümün ağrı-acısını unutdurmalı, dostları sevindirməli, düşmənləri kədərləndirməlidi. Ona qarşı yumruq uzadanlar, şıllaq atanlar, yuxarıdan aşağı baxmaq istəyənlər yerlərini bilməlidi. "Ağ-yaşıl” gəmi elə sürətlə irəliləməlidi ki, rəqiblər ona çata bilməsinlər. Bütün bu işlərin də təməli toplanış dövründə qoyulmalıdı.

Cənublu fanatların bir öz özəlliyi də var. Onlar nə yaxşılığı unudur, nə də pisliyi. Ötən toplanışlar kimin yadında deyil ki? Azarkeşlər göyə baxmaqdan yorulmuşdu. Klub rəhbərliyi, məşqçilər transfer etmək bir yana, heç məşqə başlamağa futbolçu tapa bilmirdi. Elə hey deyirdilər ki, klub ulduz futbolçu transfer edəcək. Amma sonda məlum olurdu ki, ulduz nədi, heç "kitayski” fənər də tapılmır.

Bir neçə gündü nemeslərin çıxan yerindən yaxşı xəbərlər gəlir. Klubun məskunlaşdığı oteldə "Xəzər Lənkəran” futbolçularının əlindən tərpənmək olmur. Dünya şöhrətli baş məşqçi Toşakın ürəyinə yol tapmaq üçün futbolçular tər tökür, dəridən-qabıqdan çıxırlar. Təbii ki, bu hələ yetərli deyil. Klub Toşakla birgə Avropadan tutmuş bizim Azərbaycana qədər hər yerə adından söz etdirmək istəyirsə, hələ bir xeyli güclənməlidi.

Klub rəsmiləri indi Almaniyada ora-bura qaçan heyətin sayına baxıb aldanmamalıdı. "Xəzər Lənkəran”ın qapılarını daha səviyyəli futbolçular üçün bağlamaq hələ tezdi.

Klub rəhbərliyinin əlinə tarixi bir şans düşüb. Çəkişmələri, intriqaları bir kənara qoyub komandanı daha da gücləndirmək yolunda baş məşqçi Toşaka imkan yaratmaq lazımdı. Azarkeşlərə ötən mövsümdən qalan borcdan yalınız bu yolla qurtulmaq olar.

Görək klub rəhbərliyi bu tarixi şansdan necə yararlanacaq. Dostların yanında olacaq, yoxsa düşmənlərin?

Həyatda təsadüf çox nadir hallarda olur. Biz yenə Almaniyadan şad xəbər gözləyirik...