İndi ən çətin iş oyunçu tapmaqdı. FİFA-nın dəyər cədvəlində geri qalsaq da bəzi məsələlərdə öndə gedənlərdənik. Klublarımızın az qala hamısı xaricdə təlim-məşq keçir. Ona görə də gözəlim Azərbaycanda futbolçu gözə dəymir. Türkiyənin Antalya bölgəsi isə… Bu başqa məsələ…

 Dəli şeytan adamın qulağına pıçıldayır ki, boş durma, böyük Səməd Vurğunun məşhur beytini dəyişdir

   Antalya çölündə qatar düz gedir,

  "Xəzər Lənkəran”dan xəbərsiz gedir.

 "Xəzər Lənkəran”da digər bərk yürüyən klublarımız kimi toplanışı Antalyada davam etdirir. Klubdan maaş alan futbolçular orada tər tökür, buradakı azarkeşlərin fikir çəkməkdən saç-saqqalı ağarıb.

Qış fasiləsi ərəfəsində cənub klubunun rəsmiləri hər fürsətdə biz azarkeşləri arxayın edirdilər ki, narahat olmayın, əvvəlki səhvlərdən nəticə çıxarmışıq. Bu dəfə transfer məsələsi tam fərqli qurulub. Menecerlərimiz neçə aylardı dəmir çarıq geyinib dünyanı gəziblər. Yeni Zelandiya, Avstraliya, Qvineya, daha nə bilim haralarda oyunçu bəyəniblər. Deyirdilər yanvarın 15-dən sonra düşərgəyə o qədər oyunçu gələcək ki, bir otaqda 8 nəfər qalası olacaq.

İnsafən, ilk günlər klub rəsmiləri haqlı görünürdü. Fasilə yaranan kimi, futbolçularımızın təri soyumamış bir neçə yeni oyunçu transfer olundu. Amma və lakin günlər ötdükcə məlum oldu ki, 8 futbolçumuz bir otaqda yatası olmayacaq. Vəssalam. Yəni Yeni Zelandiya, Avstraliya, Qvineya… nağılı elə oralarda ilişib. Necə deyərlər, yenə köhnə hamam, köhnə tasın "Yeni köhnə sauna, köhnə vedrə” versiyası…

İş o yerə çatıb ki, bizim ispan məşqçisi Bakes də həyəcan təbili səsləndirib. Baş məşqçi transfer məsələlərində gecikdiyimizi açıq mətnlə dilə gətirib. Əsas idman portalları da bu mesajı el-aləmə yayıb.  

"Xəzər Lənkəran” Antalyadadı. Klubun minlərlə çılğın azarkeşi kimi mənim də ürəyimin tən yarısı bu dəqiqə Türkiyənin bu əsrarəngiz bölgəsində döyünür. Ürəyimin o tərəfdə qalan tən yarısının verdiyi məlumata görə son dəqiqələrdə klubun düşərgəsinə xeyli yeni sima gəlib. Onlardan biri Con Bekman çox təcrübəli və məşhur personadı. Uzun müddət NASA-da çalışıb. Uğurlu fəaliyyətindən sonra Pentaqona dəvət olunub. Son illər orada silahlanma və ətraf mühit məsələlərinə cavabdehdi.

Riçard Harer də Amerikadandı. 8 il Texas ştatında gənc ailələrə yardım şurasının əsas rəhbərlərindən olub. Bir neçə ildir ki, ABŞ Konqresində qlobal iqlim məsələlərini araşdıran elmi mərkəzdə icraçı direktordu. İndoneziyada, Malidə, Hondurasda balinaların yemlənməsi üzrə ekspert kimi mühazirələr oxuyub.

Yeni gələnlərdən İvan Topmasski də "Xəzər Lənkəran” üçün tapıntı sayıla bilər. Polşada doğulsa da Bolqarıstanda yaşayıb. Fikir Müxtəlifliyi və İnsan Haqları üzrə Ümumavropa Təşkilatının Baş ofisində kreativ direktor kimi fəaliyyəti ilə bütün MDB məkanında tanınır. İki ildir ki, ATƏT-in təbiətin qorunması üzrə Belçika iqamətgahında baş ekspertdi.

Mənə elə gəlir ki, düşərgəyə bu təzə qoşulanlar klubun gücünə güc qata biləcək.

Daha iki yeni transfer isə hələ göydə olduqları üçün adlarını açıqlamaq istəmirəm. Düşər düşməzi olar...