Tanrı biz tərəflərdən səxavətini
əsirgəməyib. Altı neftlə dolu dəniz, 9 iqlim qurşağı, göydələnlər tikmək üçün bərəkətli
torpaq. Bərəkətli torpağımıza göz dikənin gözünü oymağa hazır sərkərdə Səfər
Əbiyev. Dünya mədəniyyətinə meydan oxumaq üçün Səməd Səmədov, Ədalət Şükürov, Rəqsanə.
Bəşər övladının televiziyaya münasibətini tam dəyişmək üçün Az.TV, içində də
bir "İdman Azərbaycan”. Daha nə verəsiydi ki...
Kim bu səxavətdən
narazılıq edirsə,
getsin Mazandarana. Mazandarana çatan
kimi ayağını aşırtsın ayağının üstünə və şellənsin özü üçün. Bir-iki naşükürün
Mazandarana getməsi bizə vız gəlir. Nə dənizimiz quruyandı, nə neftimiz
azalandı. Nə iqlimimiz dəyişəndi, nə də Az.TV-miz.
Məni yaxından-uzaqdan
tanıyanlar Az.TV aşiqi olduğumu bilirlər. İndi də Az.TV-nin kiçik övladı "İdman
Azərbaycan”a vurulmuşam. Əsl kefdi e!.. Nə zaman baxırsan ekranda eyni mənzərədi-
ya kimsə öküzü minir, ya da öküz kimisə.
Ölkənin futbol
klubları- "Xəzər Lənkəran”, "Neftçi”, "İnter” Avropa miqyaslı yarışlarda mərhələ
adlayırlar, amma bu kanalın heç umurunda deyil. Günün çox hissəsini öküz
yarışını göstərməyə ayırır.
Dünən bu barədə "İdman
Azərbaycan” kanalında çalışan dostumla söhbətləşirdim. Öküz yarışından reportaj
hazırlamağa tələsdiyindən söhbətimiz yarımçıq qaldı. Bu gün tezdən nə görsəm
yaxşıdı? Dostum elektron ünvanıma "İdman Azərbaycan” kanalının sabah üçün nəzərdə
tutduğu proqramı göndərib. Yəqin sizlər üçün də maraqlı olar...
12.00-da "İdman xəbərləri”.
12.08-də Öküz döyüşündən reportaj. (canlı)
14.00-da "İdman xəbərləri”.
14.12-də Avropada öküz döyüşünün tarixindən.
16.30-da Öküz
döyüşü üzrə dünya çempionatının təsnifat mərhələsi. (yarımcanı)
18.00-da "İdman xəbərləri”.
18.08-də Asiyada öküz döyüşünün tarixindən səhifələr.
18.45-də Az.TV-nin sədri millət vəkili Arif
Alışanovun parlamentə təqdim etdiyi "Azərbaycanda öküz döyüşləri barədə qanun
layihəsi”nin müzakirəsinə həsr olunan dəyirmi masa. (canı dildən canlı)
20.00-da "İdman xəbərləri”.
20.08-də Avroatlantik məkanda öküz döyüşlərinin
tarixindən səhifələr.
21.15-də "Mən hələ uşaq yaşlarından öküz döyüşlərini
çox sevirdim”. "İdman Azərbaycan” kanalının rəhbəri, əməkdar jurnalist Elsevər
Dünyamalıyevin kanala eksklüziv müsahibəsi. (təkrar canlı)
23.15-də "Siz oynayın, biz oxuyaq” Xalq artisti Səməd
Səmədovun idmançılarla görüşü (elə-belə canlı) Fasilədə "Öküz döyüşü” (heç bir
sənədi olmayan sənədli film)
00.45-də "Mööö” (uşaqlar üçün idman proqramı)
01-15-də "İdman xəbərləri”
Sabah bu proqramı əlimdə
bərk-bərk tutub "İdman Azərbaycan” kanalını izləyəcəm. Görüm dostum zarafat
edir. Yoxsa həqiqətən bu verilişləri göstərəcəklər...
Mənbə: "Avrofutbol.com” saytı
| 
