"Kimlər gəldi, kimlər getdi bu klubdan, bu klubdan” mahnısının sədaları altında yazı

Ölənin və vəzifədən gedənin arxasınca danışmaq yaxşı əməl sayılmır. Bu üzdən Yunis Hüseynovdan heç nə yazmaq istəmirəm. Yunis bəy ölməyib, şükür Allaha, sağ-salamatdı. "Xəzər Lənkəran”a etdiyi bütün pisliklərə rəğmən, ona uzun ömür arzulayıram. Qoy o qədər yaşasın ki, bir zamanlar çalışdırdığı "Karvan”ın Çempionlar Liqasında, "Standart”ın isə Avroliqada oyunlarını stadiondan izləsin.

"Xəzər Lənkəran” baş məşqçi Yunis Hüseynov üçün sonuncu iş yeri oldu. Bir yerli məşqçi də belə "öldü”. Bundan sonra hansı prezident Yunis bəyə öz klubunu etibar etsə, həmin adamın ağıllı olmasına məndə möhkəm şübhə yaranacaq.

İndi "Xəzər Lənkəran”da yeni bir dönəm başlayıb. Baş məşqçi postuna hər kəs üçün "sirli qutu” sayılan ispan Bakes gətirilib. Özü də "Barselona”dan. Düzdü, gənc ispan bizim tərəflərə gələnə qədər heç bir klubda baş məşqçi maaşını almayıb, necə deyərlər, rəqib komandanın toyuğuna "kişşş” deməyib. Həmişə "Xəzər Lənkəran”a ya bəh-bəhlə baş məşqçi gətirəndə, ya da onu zurna-qavalla qovanda yanlış addım atan klub rəhbərliyini qalanın açarlarını təcrübəsiz Bakesə təhvil verdikləri üçün topa tutmağa dəyərmi? Yanlış və doğru olmasının fərqinə varmadan hər addımlarına bərbəzəkli don geydirməyi ustaca bacaran klub başbilənləri "Made in Spain” yarlıqlı "Sirli qutu”ya da asanca söz tapacaqlar. Götürək elə Bakesin öz ölkəsində Pro kateqoriyası almasını. FİFA reytinqində lap başda gedən İspaniyada bu dərəcəni alması, üstəlik xarici məmləkətlərdə baş məşqçilərin başına ağıl qoyması onu göstərir ki, Bakesin başında nəsə var.

Amma və lakin yazının bu yerində şappadan kimsə künc zərbəsi vurulan yerdən çıxıb deyə bilər ki, Yunis Hüseynov da Pro kateqoriyası almışdı özü də Ukraynada. Bəli, məhz almışdı. Rus və ukrayn dillərini bilməyə-bilməyə. Bu mübahisəni uzatmaq istəmirəm. Bayaq ötəri də olsa dedim axı, ölənlərlə gedənlərdən yazmaq istəmirəm.

"Ağ-yaşıllara” cani-dildən könül verən birisi kimi şəxsən mən Barselonalı balası Bakesə və onun Lənkərana gəlməsi üçün aviabilet alan klub rəhbərliyinə zaman tanınmasının tərəfdarıyam. Ən azından baş məşqçi qış fasiləsindən yararlanıb normal bir komanda formalaşdırsın. Bunu bacarsa nə yaxşı. Onun özü də, arxasında duran klub yönətiçiləri də azarkeşlərin ürəyinə pulsuz bilet qazanar. Allah eləməsin, bacarmasa... İspanlar demişkən, ağa da durur, ağacan da. Tənqidin biri bizim pulla havayı olacaq.

İndi isə hər kəs üçün yox, Bakes üçün bəzi deyəcəklərim var.

Sayğıdəyər Karles Martorell Bakes bəy əfəndi. "Xəzər Lənkəran” gəmisinə yeni qədəm basdığın üçün sənə uğurlar arzulamaqla yanaşı bəzi mətləbləri də anlatmaq istəyindəyəm. İspaniyalı bir dəliqanlıya futbol dərsi keçmək fikrim yoxdu. Amma və lakin burası Azərbaycan. Bəzi vacib məsələləri bilmədən burlarda çalışmaq zor.

Deməli belə, "Xəzər Lənkəran”ın sükanı arxasına keçən nə birinci futbol adamısan, yəqin ki, nə də sonuncu. Bizlərdə özünü dünya estradasında sübut edə biləcək Mirzə Babayev adınada bir müğənni vardı. Tam 90 yaşına qədər oxudu. Nə oxudusa hamısını düz "doqquzluğa” vurdu. Repertuarındakı mahnılardan birini Soltan Hacıbəyov, Zeynal Xəlilin sözlərinə yazmışdı:

           Kimlər gəldi, kimlər getdi,

           Bu dünyadan, bu dünyadan...

"Xəzər Lənkəran”a kimlər gəldi, kimlər getdi. Hələ kimlər gələcək və gedəcək. Sənə dostyana məsləhətim odur ki, klub rəhbərliyindən özünü qoru və işində möhkəm ol. Bir də ayılıb görəcəksən ki, ayaqların göydədi, İspaniyaya uçursan. Arxanca da min cür söz-söhbət buraxmısan. "İçirdi, çəkirdi, rüşvət alırdı, filan futbolçunun nişanlısı ilə lətifə danışırdı, Bəşər Əsədə mesaj yazırdı” və sairə və sairə bu kimi söhbətlər.

Klubun futbolçuları ilə üsulluca davran. Kamran Ağayevdən söhbət düşəndə özünü eşitməzliyə vur. Ruslan Abışovu çox ora-bura qaçırma. Saç düzümü pozular, Sevda Yəhyayevanın klipinə çəkilə bilməz. Elnur Allahverdiyev NATO hərbi qüvvələri tərkibində Bosniyadakı əməliyyatların ön cərgəsində getdiyindən bir az əsəbidi. Subaşiçdən yazmıram. Təxminən səninlə yaşıddı, Alla Puqaçovanı taxtda görüb, Validə Abbasovanı qundaqda.   

"Böyük oyun”a -"Neftçi”ilə qarşılaşmaya çıxanda başına papaq qoyma və hakimin hansısa səhvindən sonra o papağı yerə çırpma. AFFA prezidentinin tapşırığı ilə səni elə qavalıyarlar ki, nöyüt iyi verərsən. Qış transfer "pəncərəsi” açılanda ətrafa diqqətlə bax. Nə badə kluba İspaniyadan oyunçu gətirəsən. Bir də gördün ki, PFL prezidenti "Qovun bu ispan qaraçılarını”-deyib iki ayağını yarım qaloşa dirədi. Onun bu işarəsindən sonra "Xan Lənkəran” fanklubu başlayacaq "Böyük bazar”da qaraçı axtarmağa, bəzi idman nəşrləri, saytlar səndən elə şeylər yazacaq ki, gələcəkdə heç Nikaraquada da çalışa bilməyəcəksən.

Bakes abi, Gəncədə, Tovuzda stadionlarımızı gördün. Tanrı heç düşmənimə də göstərməsin. Hansısa oyunda tamaşaçıların arenalara az gəldiyini görsən təəccüblənib eləmə, bizdə AFFA nümayəndələri oyuna gələn azarkeşləri barmaqla saymağa öyrəşiblər.

Əfəndi, lənkəranlı azarkeşlər tamam başqa aləmdi. İnşallah bazar günü ilk dəfə "Fırtınalar meydanı”nda çılğın və tələbkar fanatlar önündə imtahan verəcəksən. Sənə uğurlar arzulayıram. Yuxarıda dediklərimə önəm versən yaxşı olar. Hər halda özün bilərsən. Bizdə qonağa məcburiyyət yoxdu. İspaniyadan xüsusi ilə də "Barselona”dan gələnə "tem bole...”