Bojidar Bandoviçə qapını göstərdilər. Serb mütəxəssis "Bakı”ya gələndə də ona qapını göstərmişdilər. Həmin vaxt "Bakı”nın qapısından içəri daxil olmuşdu. İndi isə həmin o qapını çöldən bağlamalıdı. Çünki başqa yol qalmadı.

Yola saldığımız futbol mövsümündə "Bakı” klubunu baş məşqçi kimi oyunlara çıxaran Bandoviç işdən çıxarıldı. Yəqin şəxsi əşyalarını toplayıb "Bakı”dan və Bakıdan getməyə hazırlaşır.

Con Benjamin Toşak görən çamadanlarını hazırlamır ki? Birdən birə "Bakı”dan "Xəzər Lənkəran”a keçid etməyim sizə qəribə gəlməsin. Futbola böyük pullar yatıran, Azərbaycanın tanıdılması, gənc oyunçuların hazırlanması yolunda uğurlu işlər görən "Bakı” klubu əsas komanda ilə uğur qazana bilmir. Hər dəfə baş məşqçi seçimi klub rəhbərliyini "yandırır”. Boşa verilən mövsüm sonunda istefa məsələsi qaçılmaz olur.

"Bakı” klubundan "Baş məşqçimizi istefaya göndərdik” xəbəri yayılınca canıma vicvicə düşür. Dərhal "Xəzər Lənkəran” klubunun ofisi tərəfə boylanıram. Deyirəm birdən...

Yəqin ki, yadınızdadı. "Bakı” Biçərə də qapını göstərmişdi. Klubdan demişdilər ki, əfəndi, zəhmət olmasa, qapını çöldən bağla. Elə o ərəfədə "Xəzər Lənkəran”da türkiyəli üçün qapı açılmışdı. Özü də geniş qapı. Cənub klubunun rəhbərliyi qapını açıb demişdi ki, abi, buyur, yuxarı başa. Biçər də Mirça Redniki yolasalma mərasimində iştirak edib keçmişdi lap yuxarı başa. Ömründə görə bilməyəcəyi günləri görmüşdü. Düşmüşdü cənnətə. Ye-iç, kef elə.

Düzdü, bu proses çox uzun çəkmədi. Biçər də qapını o üzdən bağlayıb kəndinə qayıtdı. İndi də idman sahəsində fəaliyyətini davam etdirir. Deyilənə görə, Türkiyənin hansısa rayonunun hansısa kəndindəki idman malları mağazasında satıcı köməkçisi kimi çalışır.

Mağaza müdiri deyib ki, Biçər əfəndi, çalışmaqda belə davam etsən, 2 ildən sonra səni satıcının baş köməkçisi görəvinə alacaq, maaşına da zam yapacam.

Bojidar Bandoviçin "Bakı”dakı qapısı bağlanandan sonra yaman narahatlıq keçirirəm. Deyirəm birdən...

Deyirəm birdən, "Xəzər Lənkəran” rəhbərliyi yenə səhv edib serb məşqçini bazanın qapısından içəri buraxalar. Con Toşak da qapını çırpıb gedə. Toşak da elə-belə adam deyil, yaşlı-başlı, ağır çəkili birisidi. Allah eləməmiş, Allah eləməmiş, qapını çırpıb getsə, "Xəzər Lənkəran”ın bazası bir neçə ay silkələnər.

İndi oturub narahatlıqla "Bakı”ya tərəf boylanıram. Görən Bandoviç bilet aldımı? Biletdə nə yazılıb? Təsadüfən Lənkəran olmaya?