Ölkə çempionatının IV turundan təxirə salınmış "Xəzər lənkəran” – "Simurq” oyununun sentyabrın 20-də keçiriləcəyi məlum olsa da məkan məsələsi qeyri müəyyən olaraq qalırdı. Belə ki, 17 yaşlı qızlar arasında keçiriləcək dünya çempionatının oyunlarının bir qisminin Lənkəran şəhər stadionunda baş tutacağı planlaşdırıldığından, bu ərəfədə "Xəzər Lənkəran”ın ev oyunlarının taleyi açıq olaraq qalırdı. Bir müddət əvvəl, bu arada "Xəzər Lənkəran"ın Yevlaxa köçəcəyi səsləndirilsə də azarkeşlərimiz heç də bu seçimi bəyənməmişdi. Deyəsən elə buna görə də klub rəhbərliyi daha başqa variantlar üzərində işləməyə başlamışdı. Bu variantlardan biri isə sözügedən dünya çempionatı oyunları ərəfəsində "Xəzər Lənkəran” birinci dövrəyə düşən ev oyunlarının rəqib meydançasında keçirilməsi təklifi ilə çıxış etmişdi ki, əvəzində ikinci dövrədə bunun əksini istəmişdi. İndiyə qədər ölkə futbolu praktikasında belə hallara rast gəlsək də bu dəfə oyunların təşkilinə məsul olan PFL nədənsə tərəddüd edirdi. Deyəsən bunun üçün rəqib komandanın razılığının alınması məsələsi PFL-i çətin vəziyyətdə qoymuşdu.

            Nəhayət bu məsələnin müəyyən hisəsinə aydınlıq gəlmiş sayılır. Belə ki, daim dost əlaqədə olduğumuz "Simurq” azarkeşləri bu gün bizimlə iki dəfə əlaqə saxladılar. Birinci telefon əlaqəsində onlar da bizdən oyunun harada keçiriləcəyi haqqında məlumat öyrənmək istəsələr də, cavab məlum olmadığından sual açıq qalmışdı. Cəmi 10-15 dəqiqə sonra "Simurq” azarkeşlərindən Maqsud bəy təkrarən əlaqə saxlayıb artıq bu məsələyə aydınlıq gətirildiyini dedi. Onun sözlərinə görə "Simurq” rəhbərliyindən aldıqları məlumata görə bu təxirə salınmış oyun Sentyabr ayının 20-də saat 18:00-da Zaqatala şəhər stadionunda baş tutacaq. Biz onlardan məlumatın nə dərəcədə dəqiq olduğunu soruşduqda, Maqsud bəy xəbərin klub rəsmilərindən alındığını bir daha söylədi və artıq oyunun hazırlıqlarına start verdiklərini də diqqətimizə çatdırdı. Həmçinin, sizi ayın 20-də Zaqatalada gözləyirik, fikrini də çox qonaqpərvərliklə söylədi. Biz də onların klubları naminə belə operativ hərəkətlərini alqışladıq və təşəkkür etdik.