Rumıniyanın "Prosport.ro” saytının məlumatına görə, vətənində olan və bir sıra klub rəhbərləri ilə görüşən "Xəzər Lənkəran”ın baş məşqçisi Mirça Rednik "Qloriya” klubunun prezidenti, Jan Padureanu ilə də görüşüb. Görüşün məqsədi, "Qloriya” klubunun 25 yaşlı yarımmüdafiəçisi Andrey Mureşanın "Xəzər lənkərana” keçidini həll etmək olub.

            "Qloriya” rəhbərliyi və futbolçunun özü ilə də görüşdüyünü deyən Mirça Rednik, hər iki tərəflə görüşün anlaşıqla bitdiyini qeyd edib. "Prosport.ro” saytına verdiyi açıqlamasında Mirça Rednik artıq Andrey Mureşanın komandamıza keçidinin prinsipial olaraq həll olunduğunu deyib. Mirça Rednik həmçinin 10.01.2011-ci il tarixində Türkiyənin Antalya şəhərində başlanacaq "Xəzər Lənkəran”ın təlim-məşq toplanışı ilə əlaqədar komandasının yanında olacağını qeyd edib. Andrey Mureşanın da həmin tarixdə komandanın düşərgəsində olacağını jurnalistlərin nəzərinə çatdırıb. Mirça Rednik, Andrey Mureşanla iki il yarımlıq müqavilə imzalayacaqlarını deməklə bərabər, həmçinin onun Rumıniyanın digər klubu olan "Rapid” tərəfindən də istənildiyini vurğulayıb. Belə bir futbolçunun əldən çıxa biləcəyini deyən Mirça Rednik, Andrey Mureşanın ciddi oğlan olduğunu və həyatda nə istədiyini yaxşı bildiyini vurğulayıb.

            Eyni zamanda "Qloriya” klubunun prezidenti Jan Padureanu da bu məsələyə münasibətini bildirib. Andrey Mureşanın Mirça Rednikin komandasına keçəcəyini əminliklə bildirən Jan Padureanu təkcə incə maliyyə detallarının dəqiqləşdiriləcəyinin qaldığını qeyd edib. Lakin onun yeni komandasında tibbi müayinədən keçməsinin lazım olduğunu bildirib.

            Bu isə bəlkə də Andrey Mureşanın zədəli olduğuna bir işarədir. Əgər belə olsa onda yəqin ki, təcrübəli Mirça Rednik bütün bunları nəzərə almamış deyil. Elə isə belə istedadlı futbolçunun "Xəzər Lənkəran”a keçidinin həm komandamıza və həm də onun özünə düşərli olmasını arzulayırıq.