Bu gün komandamız daha bir sınaqdan çıxmış oldu. Əslində əvvəlki illərdən fərqli olaraq, builki vəziyyətinə görə elitada qalmaq üçün mübarizə aparan "Simurq”la oyunu "Xəzər Lənkəran” üçün sınaq adlandırmaq düzgün olmazdı. Amma nə yazıq ki, əsasən hücumçularımızın xəstə və zədəli olmaları bunu deməyə əsas verir. "Simurq”la oyunda legioner hücumçularımızdan cəmi biri, Allan Lalin meydana çıxa bilmişdi. O, da keçən tur oyununda xəstə olduğu üçün meydanda deyildi. Həmin "Qəbələ” ilə oyunda yeganə hücumçumuz, Uinston Parks da beyin silkələnməsi diaqnozu ilə sağlamlığında problem əmələ gələrək o biri zədəlilərə qoşuldu. Beləliklə, "Simurq”la oyun üçün təcrübəli sayılan hücumçularımızdan biri Allan Lalin xəstəlikdən sonra hazır vəziyyətə gəlmişdi. Nə Emeka Opara, nə Uinston Parks, həmçinin komandadan ayrılan Dieqo Ruisin yoxluğunda "Simurq”la bu tur oyununu sınaq adlandırmaq olardı.

            Bugünki oyun bunun, yəni hücumçu probleminin olduğunu bir daha göstərmiş oldu. Bütün komponentlərdə rəqibini böyük ölçüdə üstələməsinə, çoxlu real qol vəziyyətlərinin yaradılmasına baxmayaraq, bunlardan cəmi birindən istifadə edə bildi. Amma təcrübəli hücumçularımız "iş başında” olsaydılar, kim bilir hesab neçə olardı. Komanda meydan boyu oynayır, ustunluk qazanır, qol vəziyyətləri bir-birinin ardınca gəlir, lakin qol olmur ki, olmur. Nəhayət üç xalı gətirən Alim Qurbanovun qolu hamını sevindirir, turnir cədvəlindəki yerimiz qorunur, cədvəldəki qonşularımızın bizdən daha da aralanmasına imkan vermir. Əvvəla zədəli hücumçularımız sağalaraq meydana dönənə qədər, daha sonra qış transferlərinin uğurlu alınması ümidiylə biz sevimli "Xəzər Lənkəran”ımızın belə çətin qələbələrinə şahidlik etmək zorundayıq. Təki qələbə olsun. Belə çətin vəziyyətlərdə qazanılan qələbə asan qələbələrdən qat-qat şirindir. Başqa bir məsələ də "Simurq” tərəfinin də "Xəzər Lənkəran”ın bu dediyimiz problemli tərəflərini çox yaxşı bilmələri idi. Onsuz da Lənkəran səfərindən bir xalla dönmək qonaqlar üçün sərfəli nəticə sayılırdı. Həm də bizim bu problemlərimizi bildiklərindən onlar xal aparmaq üçün bütünlüklə müdafiədə oturmağı üstün bilmişdilər. Belə müdafiədə oturan komandaya qol vurmağın özü də asan iş deyil, hətta tam heyətlə çıxış etdikdə belə.

            Bütün bunlara baxmayaraq, "Xəzər Lənkəran” azarkeşlərini təbrik edirik. Komandamız çətin vəziyyətdə də olsa azarkeşlərini sevindirməyi bacardı. Elə azarkeşlər də bu komandanı sevməyi bacarır. Çünki, "Xəzər Lənkəran” bu sevgiyə layiqdir, necə ki, azarkeşləri sevinməyə layiqdir.