Beləliklə, XI tur oyunları ilə 2011/2012 mövsümünün birinci dövrəsinə yekun vurulur. Bu turda "Xəzər Lənkəran” doğma divarlar arasında Gəncənin "Kəpəz” komandası ilə görüşürdü. Onsuz da oyunun nəticəsindən asılı olmayaraq, "Xəzər Lənkəran” klubu topladığı xal ehtiyatı ilə birinci dövrəni lider kimi başa vuracaqdı. Çünki ən yaxın izləyicisindən dörd xal irəlidə idi. Lakin komandamız adına layiq olaraq yenə növbəti qələbəsini qazandı və ilk dövrəni 26 xalla yekunlaşdırdı. Mümkün olan 33 xaldan 26-sını toplayaraq turnir cədvəlinin lideri kimi ilk dövrəni bitirmək heç də pis nəticə sayılmamalıdır. Yəni bu 26 xalı komandamız 11 oyunda 8 qələbə (24 xal), 2 heç-heçə (2 xal), 1 məğlubiyyət (0 xal) hesabına qazandı. Rəqib qapılarına 17 top vurmağı bacaran komandamız, öz qapısında 7 top gördü.

XI tur ərəfəsində bəzi məqamlar da var idi. Belə ki, ölkə ərazisində və xüsusən cənub regionunda ən çox da Lənkəranda 4 gündür yağan aramsız yağışlar hətta o dərəcədə idi ki, bu oyunun təxirə salınması da gözlənilirdi. PFL oyunun keçirilməsində israrlı olsa da "Xəzər Lənkəran Mərkəzi Stadionu”nun rəhbərliyi oyunun baş tutmaya biləcəyini də istisna etmirdi. Yalnız 15:00-da başlayan və "İdman Azərbaycan” telekanalı ilə canlı yayımlanan "Qarabağ”-"Bakı” görüşünün ikinci hissəsində reportajı aparan diktorun: "indicə aldığımız məlumata görə güclü yağış yağmasına baxmayaraq "Xəzər Lənkəran”-"Kəpəz” oyunu baş tutacaq” deməsindən sonra hər şeyə aydınlıq gəldi. Bununla əlaqədar bütün çətinliklərə baxmayaraq gərgin əməyi sayəsində meydanı oyuna hazır vəziyyətə gətirə bilən "Xəzər Lənkəran Mərkəzi Stadionu”nun rəhbərliyinə və bütün işçi personalına təşəkkürümüzü bildiririk.

Başqa məqam isə X turda yaşanmış və bir çox qüvvələrin lazımı həddən çox şişirtdiyi Kamran Ağayevin cəzalandırılması məsələsi idi. Hətta çoxları onun əvəzedici heyətə göndərilməsi məsələsindən danışırdı. Ən azı isə ehtiyatda oturub yerini Kamal Bayramova verəcəyini sanki artıq dəqiqləşdirmişdi. Məsələ gündəmi zəbt etsə də yenə özünəməxsus siyasəti və ağlı ilə komandamızın baş məşqçisi Mirça Rednik, Kamranı əsas heyətdə meydana buraxmaqla, sanki həm dedi-qoduçuların və həm də məsələni şişirdənlərin cavabını vermiş oldu. Bunu zatən biz də belə proqnozlaşdırırdıq. Əks halda məsələni böyütmək istəyənlərin dəyirmanına bir az da su tökülmüş olacaqdı. Bununla da Rednik onun əleyhinə danışanların əsassız olduğunu və öz müdrikliyini göstərə bildi. Burda sanki avropalı taktikasından çox, bizim milli müdrikliyimizin çalarları belə hiss olundu. Belə çıxır ki, gözəl mütəxəssis olan Mirça həm də xarakteri ilə mentalitetimizə uyğun, ağıllı bir insandır.

Bəziləri Kamranı cəzalandırmaqla onun milli karyerasına da zərbə vurulmuş olduğunu belə iddia etməkdə idi. Bu cəzadan sonra Rednikin onu ehtiyatda saxlayacağına və oyun praktikasından məhrum olacağına dair fikir səsləndirənlər Rednikin cəza qərarını düzgün saymırdılar. Lakin belə fikirlərin sahibləri onu düşünmürdülər ki, komandasında oynayan milli üzvü istədiyi ərköyünlüyü edə bilməz və ona daim güzəşt olunmalıdır. Onda daim güzəşt görən futbolçu ərköyünləşib pis xarakterə sahib olacaq və elə özünü milli komandada da həmin xarakterdə aparacaq. Bununla da milliyə ərköyün futbolçu verməkdə yenə klub məşqçisi tənqid olunacaqdı və deyiləcəkdi ki, millini pis vəziyyətə qoyan ərköyün futbolçunun klub məşqçisi hara baxırdı. Vaxtında klubda onun cəzası verilsəydi, indi o millini də ərköyünlüyü hesabına pis vəziyyətdə qoymazdı. Bəli, millinin futbolçusu milli üzvü olduğu üçün klubunda at oynada bilməz. Hamı başa düşməlidir ki, nizam-intizam çox gözəl şeydir və harada tətbiq olunursa, orada uğur var. Nizam-intizam olmayan yerdə isə xaos hökmranlıq edər və bu da məlumdur ki, ən azı uğursuzluqla nəticələnər. Bunun həm milliyə və əsasən də cəzadan nəticə çıxaran futbolçunun özünə və gələcək karyerasına daha çox xeyri var. Belə ki, o, gələcəyini şıltaqlığına qurban verməkdən qurtulmuş olur. Bununla da sanki Mirça Rednik bu məsələdə onun əleyhinə olanların tutarlı cavabını vermiş oldu. Məhz bütün bu keyfiyyətlərinə görə Mirça Rednik "Xəzər Lənkəran” azarkeşləri və futbolu anlayanlar tərəfindən sevilir.

Birinci dövrəyə yekun vurularkən onu da deməliyik ki, keçən bu dövr ərzində ötən mövsümdən fərqli olaraq Hakimlikdən o qədər də danışılmadı. Çünki əksər matçlarda hakimlərimiz oyuna çıxıb normal idarəçilik etmək bacarıqlarını nümayiş etdirə bildilər. Zatən onların əksəriyyəti bunu əvvəllər də bacarırdı. Lakin məlum olan və olmayan səbəblərdən qərəzçilik halı baş alıb gedirdi. Bunu "Xəzər Lənkəran”nın dövrəni lider kimi başa vurmasına görə demirik. Elə ötən mövsüm əksər komandaların  baş məşqçiləri, hətta rəsmiləri də bunu dəfələrlə dilə gətirirdi. Lakin bu il hələki belə şikayətlərin eşidilməməsi hakimliyimizin obyektivliyinin qaydasında olnasından xəbər verir. Düzgün, şəffaf və obyektiv keçirilən çempionat əlbətdə futbolumuzun səviyyəsinin artması üçün lazım olan əsas amildir. Təki futbolumuzda hər şey obyektiv olsun və sonda layiq olan qalib olsun. Bu il də ən layiq olan komanda "Xəzər Lənkəran”dır.

Altılıq sistemi ilə keçirilən çempionatımızda birinci dövrə ilə ikinci dövrə arasında böyük fasilə yoxdur. Komandamıza elə ikinci dövrədə də ən azı bu templə davam etməsini arzulayırıq. Həmçinin hakimliyimizə də həm təşəkkür edib, həm də obyektiv templərini bundan sonra da davam etdirmələrini arzulayırıq. Qoy keçən mövsümdəki kimi nə televiziya ekranlarında, nə qəzet səhifələrində, nə internet saytlarında və nə də hər yerdə hakim özbaşınalıqlarından və qalmaqallarından danışılmasın. Belə olacağı təqdirdə heç olmasa bu məsələdə keçənilkinə görə bu il inkişaf etdiyimizlə öyünə bilərik. Aid olan bütün hər kəsdən futbolumuzla öyünməyi əlimizdən almasınlar deyirik. Azərbaycan futboluna uğurlar arzu edirik.  

Mirhafiz M. Babayev