04 Noyabr 2012-ci il, saat 16:00 da Lənkəran şəhərində başsız atlı görünüb. Əhali bu başsız atlı haqqında müəyyən xəbərlər eşitsə də onu gözü ilə görmək, məhz həmin tarixdə müəyyən qism tərəfindən mümkün olub. İnsanları təşvişə salan bu başsız atlı haqqında çoxdan söhbətlər gəzsə də, deyilən tarixdə onun Lənkəran şəhərinin cənub-şərq tərəfində Lənkərançay sahillərinin Sütəmurdov ərazisində görünəcəyi bir çoxlarına məlum olduğundan bu mənzərəni seyr etmək üçün müxtəlif yerlərdən insanlar axışıb gəlmişdilər. Düzdür Mayn Ridin bəhs etdiyi başsız atlı XIX əsrin 50-ci illərində Amerikada Texas ştatının çöllərində tez-tez görünüb əhalini təşvişə salırdısa, indi bu başsız atlı Lənkəran əhalisini təşvişə salmaqdadır.

Təxminən bir ilə yaxındır ki, bu dəhşətli mənzərə Lənkəran əhalisini bu müddət ərzində bərk narahat edir. Minlərlə insanın gün-gündən artan narahatlığı hələ də davam edir. Bu təhlükəyə birdəfəlik son qoymaq üçün Mayn Ridin qəhrəmanı, Zebulon Stump işin üstünü açırsa, Morris Mustanger nəhayət başsız atlını kəməndlə tutmağa nail olur və Kapitan Kassi Kolxauna məxsus üzərində K.K.K həkk olunmuş güllə cəsədin bədənindən çıxarılınca, Kapitan Kassi Kolxaunun qatil olduğu və başı kəsilib əlinə verilmiş və at üzərində otuzdurulmuş Henrini nə məqsədlə öldürdüyü meydana çıxır. Əlbəttə haqq yerini tapır və Kapitan Kassi Kolxaun ifşa edilərək cəzasını alır. Bizim əhalini təşvişə salan bu başsız atlı görək əsərin qəhrəmanları tərəfindən necə yoluna qoyulacaq? Hərçənd ki, Zebulon Stumplar işin üstünü mümkün qədər aça biliblər. Qalır, Morris Mustangerin başsız atlını tutub gətirməsi və Kassi Kolxaunların cəzalandırılması.

Lənkəran əhalisinin Gözəl bir mustanqı və onu idarə edən bacarıqlı bir mustangeri vardı ki, onu da Rumıniyadan gətirmişdilər. Bu mustanger bizim mustanqın üstundən yerə salındıqdan sonra, yəhərə ardıcıl iki mustanger əyləşdirildisə də onlar başsız, quru cism kimi, başsız atlını xatırlatdılar. Nə atı idarə edə bildilər nə də özlərini. Başsız bədənlərin mustanqın üzərində əyləşməsi ilə mustanq da öz məharətini nə göstərə bilirdi, nə də yolunu səlist gedə bilirdi. Başıpozuq halda çöllərdə gəzişməklə, əhalini də təşvişə salırdı.

 "Xəzər Lənkəran” bu son bir ilə yaxın müddətdə  mənəvi olaraq başsız idisə, dünənki oyuna faktiki olaraq başsız çıxmışdı. Yəhərdəki baş məşqçinin, sonuncusu da düşürüldükdən və yerinə yenisi əyləşdirilmədiyindən, dünənki komandanı başsız atlıya bənzətmək mümkündür. Amma bu başsız atlı dünənki sıçrayışıyla çox mətləblərə aydınlıq gətirdi. Başsız Mustanq dünən elə çapıb, elə şahə qalxırdı ki,  onun çox gözəl bir mustanq olduğu ortaya çıxdı. Həmçinin o da ortaya çıxdı ki, doğurdan da təxminən bu bir ilə yaxın bir müddətdə onu idarə edənlər nə ki, professional mustangerlər, heç həvəskar çapıcı da deyilmişlər. Meydanda şahə qalxıb, müxtəlif istiqamətlərə sürətlə çapan başsız atlımız, dünən "Rəvan” kimi heç zaman qalib gələ bilmədiyi rəqibini də dörd dəfə tapdalayıb cəzalandıra bildi. Qorxuya düşmüş əhali isə onlara məxsus bu şahanə mustanqdan daha çox məharətlər gözləməyə başladı. Əksinə onu başsız vəziyyətə gətirənlər qorxuya düşməli oldular. Həm də indi mustanq rəqibləri də qorxuya sala bildi. Yetər ki, bizim Mayn Ridimiz Bu mustanqın üstünə əvvəlki kimi at çapmağı və onu idarə etməyi gözəl bilən bir mustangeri əyləşdirsin. Bunun üçün Kassi Kolxaunları yolun üstündən kənarlaşdırmaq lazımdır ki, bu mənada da Zebulon Stumpların köməyinə arxayın ola bilər. Haydı, bizim Mayn Rid! əsərdə dəyişikliklər etməyə başlamısınız və əsərin sonluğunu özünə və əhaliyə uyğun tamamlayın!