Yanvar ayının 13-dən Antalyada təlim-məşq düşərgəsi qurmuş "Xəzər Lənkəran”, hətta ondan da bir neçə gün əvvəl, yeni il qabağı istirahətə buraxılmışdı. Deməli, elə o vaxtdan mənəvi olmasa da komanda fiziki baxımdan öz sevimli azarkeşlərindən təxminən 1 aydan da çox bir müddətdə uzaq düşüb. Antalyadakı təlim-məşq toplanışını başa vuraraq artıq vətənə dönən komandamız, Premyer Liqada altılıq öncəsi məsul görüşlərindən birini fevralın 11-də doğma meydanda keçirəcək.

            Yenilənmiş komandanın oyununu görmək həvəsi ilə alışıb yanan və bu məsul matçda komandaya qələbə qazanması üçün bütün sivil formalarda dəstək vermək istəyən onlarla azarkeşimiz, böyük azarkeş qrupları adından bizə zəng edərək, klub rəhbərliyinə onların xahişini çatdırmağımızı istəyirlər. Əsasən müəyyən müəsisələrdə çalışan bu azarkeşlərin istəyi ondan ibarətdir ki, oyunun başlama vaxtı mümkün olarsa, iş vaxtının bitməsindən sonra, yəni təxminən 18:00 radələrində olsun. Belə olan təqdirdə belə qrup azarkeşlər özlərini vaxtında stadiona çatdıra bilərlər və komandanın oyununu görmək və cani-dildən dəstək vermək imkanları yaranar.

            Bizimlə bu mövzuda əlaqə saxlayan azarkeşlərimizə elə telefon danışığı zamanı, bu məsələnin təlim-məşq öncəsi klub rəhbərliyi ilə son görüşümüzdə "Bosman” fanklubunun üzvü Malik Muradovun tərəfindən qaldırıldığını və əksər iştirakşıların da  bu fikrə dəstək olduqlarını bir daha xatırladıb, həm də onu deyirik ki, bu barədə də klubu həmin görüşdə təmsil edən Tuyqun Nadirov qeydlərini götürdü və bu məsələnin tam olaraq klubun səlahiyyətində olmasa da   müsbət həllinə çalışılacağını dedi.

            Ümid edirik ki, transfer məsələlərinin və çempionata davamın hazırlıqlarının bu qızğın vaxtında klub rəhbərliyi azarkeşlərimizin istəyinə uyğun olaraq bu məsələnin də həllində müsbət dəyişikliyə nail olacaq.

QEYD: Yazının mətni "Xəzər Lənkəran” klubunun rəhbərliyinə rəsmi məktubla göndərilmişdir.