Son günlər komandalarımızın, o cümlədən də doğma "Xəzər Lənkəran”ımızın qış hazırlıq dövrü ilə əlaqədar xəbərlərə və yeniliklərə başımızın qarışdığı vaxt, azarkeşlərlə bağlı yeniləşmiş bir köhnə xəbərə görə narahatlıq yarandığını deyə bilərik.

            Belə ki, "Neftçi” ilə son ev qarşılaşması zamanı azarkeşlər arasında münasibət gərginliyinin olduğu haqda xəbərlər yayılmışdı. Videogörüntülərdən işin nə yerdə olduğu görünsə də asayiş keşikçiləri olan polislər birtərəfli qaydada hərəkət edərək "Xəzər Lənkəran” azarkeş qrupu olan "Caspian Ultras” fanat qrupunun bir neçə üzvünü Lənkəran şəhər Polis İdarəsinə aparıblar. Orada adışəkilən fanat qurumu üzvlərinin bəzilərindən izahat alaraq sonra sərbəst buraxıblar.Sərbəst buraxılmaya səbəblərdən biri kimi də "Xəzər Lənkəran”ın icraçı direktoru Höccət Hacıyevin işə qarışması olub. Beləliklə, "Caspian Ultras” fanklubunun üzvü Bakı şəhərində yaşayan Ağadadaş Tağızadə polis bölməsindən ayrılaraq, elə həmin gün Bakıya qayıdıb.

            Lakin son günlər, köhnə ittiham kimi, üstündə"Məşəl” tapıldığına görə Ağadadaş Tağızadəni müxtəlif yollarla maraqlanıb tapmağa nail olan polis əməkdaşları onu yenidən Lənkəran şəhər Polis İdarəsinə israrla dəvət edirlər. Ona deyilən "Məşəl” məsələsinin terrorçuluqla bağlı olduğundan yenidən məsələni aktuallaşdırmalarıdır. "Caspian Ultras” fəallarından, bilavasitə hadisələrin iştirakçısı olan və fanqurumda "M-te-te” ləqəbi ilə tanınan Əlizadə Ceyhun Afiq oğlundan aldığımız məlumata görə, həmin vaxt Ağadadaş Tağızadənin üstündə olan həmin "məşəl”, əslində batareya ilə işləyən, yəni işıqlanan bir təhlükəsiz vasitə olub. Məhz Polis tərəfindən də tam təhlükəsizliyi bilinən belə oyuncaq vasitəsinin, hansı terror əməlinə səbəb olacağına təəccübünü ifadə edən "M-te-te” ləqəbli Ceyhun Əlizadə həm də Ağadadaş Tağızadənin ilk izahatında bunu naməlum bir adamdan aldığını da vurğulayıb.

            Biz "Bosman” fanklubu və "12-ci Oyunçu” azarkeş qrupu olaraq, stadionlarda və ondan kənarda azarkeşlərin daim bir-birlərinə hörmətlə yanaşmasının tərəfdarı olmuşuq və bunu daim sülhə çağırış fəaliyyətimizlə sübut etmişik. Polis orqanlarından da xahişimiz budur ki, müasir  dünya futbolunun "zənginliklərini” nəzərə alıb, belə sadə və batareya ilə işləyən hər hansı təhlükəsiz vasitəyə görə Ağadadaş Tağızadənin bu məsələsinin üstündən keçsinlər. Azarkeşlərin komandalarını dəstəkləmələri yolunda hər hansı təhlükəsiz predmetlərə görə narahat olmasınlar.

            Bildiyimiz kimi bütün dünyada "futbol azarkeşlər üçün oynanılır” deyilən məşhur bir ifadə var. Elə "Caspian Ultras” fanklubunun rəhbəri Ramal Novruzovun bu barədə informasiya vasitələrinə verdiyi müsahibəni də yada salsaq, görərik ki, bu məsələdən sonra həmin fanat qurumunda nə qədər ruh düşkünlüyü hiss olunmaqdadır və belə getsə, fanklubun fəaliyyətinə son verəcəyik, deyə o bildirib.

            Biz isə onu demək istəyirik ki, onsuz da azarkeş sarıdan əziyyət çəkən stadionlarımız belə bir qrupu da itirməklə daha da sönükləşə bilər. Ölkə futbolunun geriyə deyil, yalnız irəliyə getməsini arzulayan insanlarımız çoxdur. Elə polislərimizin arasında da bu gözəl idman növünü sevənlər az deyil.    

"12-ci Oyunçu” azarkeş qrupunun təşkilat komitəsi

"Bosman” fanklubunun idarə heyəti                        11 Yanvar 2013