"Xəzər Lənkəran” klubu özü ilə bərabər Azərbaycan futboluna bir çox yeniliklər gətirib. Futbolu, onun ayrılmaz hissəsi olan azarkeşləri olmadan təsəvvür etmək mümkün deyil. Bu baxımdan da "Xəzər Lənkəran” ölkə futboluna azarkeşlərinin simasında daha bir yenilik gətirdi. 

Belə ki, "Xəzər Lənkəran” azarkeşlərindən ibarət ilk olaraq müstəqil fəaliyyət göstərən fanat klubları yarandı ki, bu addımı da ilk olaraq "12ci oyunçu” MFK atmış oldu. 2008-ci ilin 22 fevralında 12 nəfərdən ibarət təsis yığıncağı keçirən "12ci oyunçu” MFK fəaliyyətini bu adla da rəsmiləşdirdi və ölkə tarixinə ilk müstəqil fanat klubu kimi düşdü.

Artıq təsis yığıncağından 10 gün sonra onların sayı 35 nəfərə, üç ay sonra isə 105 nəfərə çatdı. Beləcə inkişafda olan "12-ci”lər 1 il sonra öz rəsmi saytları olan http://12cioyuncu.moy.su saytı ilə də fəaliyyətlərini genişləndirmiş oldular. Son zamanlar isə "12cioyuncu.info” saytı ilə daha geniş fəaliyyətə başladılar.

22 fevral günü Respublikamızın ilk müstəqil fanklubu olan "12ci oyunçu” 4 yaşını qeyd edir. Bu 4 ildə doğrudan da çox işlər görmüş, çox layihələr həyata keçirmiş, Respublikamızda və onun hüdudlarından kənarda belə tanınmağa müvəffəq olmuşlar.

Bu gün də öz fəaliyyətlərində yeniliklər etməklə çoxlarımızı yaxşı mənada, təəccübləndirməkdə davam edirlər. Onlara gələcək fəaliyyətlərində uğurlar arzu edirik.

Bu ildönümü münasibəti ilə biz "Bosman” fanklubu olaraq yeni təşəbbüsdə bulunmaq istərdik. Belə ki, ölkəmizdə dövlət səviyyəsində 2005-2015-ci illəri əhatə edən "Futbolun inkişaf proqramı”nı, ölkə prezidentinin idmana qayğısını və Azərbaycan idmanına necə bir azarkeşlik nümunəsi göstərməsini əldə əsas götürərək, Azərbaycanda futbolun inkişafında azarkeşlərin rolunu qiymətləndirmək, həvəsləndirmək və bununla da Avropa səviyyəsi ilə ayaqlaşmaq üçün ölkənin ilk müstəqil futbol fanatları klubunun təsis günü olan 22 fevralı, "Azərbaycanda futbol fanatları günü” kimi qeyd edək. Bunun üçün ölkəmizdə fəaliyyət göstərən bütün fanat qurumlarını və müstəqil azarkeşləri bu layihəyə tərəfdar çıxıb, səs verməyə çağırırıq. Yalnız bundan sonra təkliflər paketi hazırlayıb aidiyyətli dövlət orqanlarına müraciət edə bilərik. Bununla da dövlətimizin futbol azarkeşlərinə, futbolun inkişafı naminə töhfə olaraq 22 fevralı Azərbaycanda futbol fanatları günü kimi qeyd etməmiz üçün  şərait yarada bilərik.  

Bir daha təbrik edirik!

"Bosman” fanklubunun idarə heyəti        22 Fevral 2012-ci il