"Futbol da bir dünyadır” deyimi, həqiqətən də çox gözəl bir deyimdir. Biz futbolsevərlər idmanın şahı adlandırdığımız bu idman oyununda nələr görməmişik, dilə gətiriləsi olmayan hansı həyəcanları yaşamamışıq. Hərənin sevdiyi bir klub var ki, onunla yaşayır, fəxr edir, öyünür, ona nəğmələr qoşur.

          Lakin "Xəzər lənkəran” azarkeşləri də özünəməxsusluğu ilə seçilir, onu "Sən bizim qürurumuzsan!” deyə qürürlanır, "öncə vətəni, sonra səni sevdik!” deyə sevgisini izhar edir, start fitindən, final fitinə qədər inanılmaz dəstək nümayiş elətdirir, harada oynamasından asılı olmayaraq onu yalnız buraxmır, gününün çox hissəsini komandası haqda düşünür, söhbətlərinin əsas hissəsini komandasına ayırır, ona əks gedənlərin yerindəcə cavabını verir, istənilən sivil yolla doğma komandasını müdafiə edir və sair. Ən yaxınına və ən əzizinə olan münasibətini "Xəzər Lənkəran”dan əsirgəmir. Bu böyük ailənin möhkəmliyi və böyüklüyünün sirri də bundadır. Bu günə qədər "Xəzər Lənkəran”a çox mahnılar qoşulub, çox şüarlar səsləndirilib. Amma bir çox məşhur komandaların, oyunboyu öz komandalarına həsr etdiyi mahnıları oxusa da, bütün azarkeşlər tərəfindən oxunan bizim belə bir mahnımız yoxdur. Sanki hamı bunu istəyir, lakin həyata keçirməyin çətinliyi bunun alınmamasına gətirib çıxarır. Ona görə də "Xəzər Lənkəran”ın cənub bölgəsini təmsil etdiyini nəzərə alaraq və bu bölgənin digər məşhur xalq mahnilarından biri olan "Ay Lolu” xalq mahnısının musiqisi üzərində qurulmuş, sözləri isə "Xəzər Lənkəran”a həsr olunmuş bir mahnını oyun zamanı bütün azarkeşlərin bir ağızdan oxuması, stadionu necə də doğma və möhtəşəm bir "havaya” qərq edər. Bu mahnını hamı bildiyi üçün onun həyata keçirilməsi də yəqin ki çətin olmaz. Bu xalq mahnısının musiqisinə Mirhafiz Babayevin yazdığı sözləri, azarkeşlərin müzakirəsinə buraxmaq, onların istəyi ilə dəyişikliklərin edilməsi, nəhayət belə bir özəlliyə də sahib olmamız bizcə, oyunlar zamanı çox xoş bir ovqata gətirib çıxarar və bu da komandamıza özəl bir dəstək olar. Beləliklə, hamının əzbər bildiyi "Ay lolu” aşağıdakı sözlərlə sizin müzakirənizə verilir. Gəlin bu işi "Neftçi” ilə oyuna qədər tamamlayaq və bu mahnının sədaları altında əzəli rəqibimizi məğlub edək.

Ay lolu, gəlsin "Xə-zə-r”in qolu,

Ay lolu, biz sevirik futbolu.

Ay lolu, gəlsin "Xə-zə-r”in qolu,

Ay lolu, meydan fanatla dolu.

"Xə-zə-r”im daşdı, Nənəle,

Rə-qib dolaşdı, Nənəle,

"Xəzər” dəqiq, zərbə vurub,

He-sa-bı açdı, Nənəle, 

He-sa-bı açdı, Nənəle.

Ay lolu, bağ-la-rıq bütün yolu,

Həm sa-ğı, həm ortanı, həm solu. 

Ay lolu, bağ-la-rıq bütün yolu,

Həm sa-ğı, həm ortanı, həm solu.

Rə-qib bü-züş-dü, Nənəle,

Til-simə düşdü Nənəle,

Bi-zi keçmək istəsə də,

Özü sürüşdü, Nənəle,

Dal üstə düşdü, Nənəle.

Ay lolu, mey-dan fanatla dolu,

"Xə-zə-r”dən öyrənin siz futbolu,

Bi-zim-dir çempionluğun yolu,

Öl-kə-nin futbolunun, simvolu,

Ay lolu, yenə vuraq, bir qolu,

Ay lolu, gəlsin "Xəzər”in qolu...