Ölkəmizdə çıxan daha bir nüfuzlu idman nəşri olan "Çempion” qəzetinin iddiasına görə komandamızdan ayrılanların sırasına əski "Roma”lı futbolçu olan rumıniyalı Adrian Pits də qoşulub. Belə ki, adıçəkilən qəzetin bugünki (17-19 iyun 2011) sayında bu barədə manşet xəbər dərc olunub. Xəbəri olduğu kimi diqqətinizə çatdıraraq onu da demək istəyirik ki, Adrian Pits ayrılarkən həm də "Futbolunuz barədə məndə müsbət fikirlər oyandı” -kimi fikir də səsləndirib. 

            Ötən mövsümün qış fasiləsində "Xəzər Lənkəran”ın heyətində köklü dəyişikliklərin şahidi olduq. Baş məşqçi Mirça Rednikin heyətə cəlb etdiyi futbolçular arasında Adrian Pits də var idi. Nüfuzuna və karyerasına görə, ölkəmizə gəlmiş ən səviyyəli legionerlərdən biri olan Pits özünü yaxşı tərəfdən də göstərə bildi. Rumıniyalı futbolçu meydançaya çıxdığı bütün oyunlarda, demək olar ki, komandasının ən yaxşılarından biri olmağı bacardı. Hamı sabiq "Roma”lının "Xəzər Lənkəran”da qalacağını gözləsə də, Rednik fərqli qərar verdi və mövsüm başa çatan kimi yola salınan futbolçular arasında Pits də yer aldı. Hazırda ölkəsi Rumıniyada olan futbolçu ilə əlaqə saxlayıb, hazırki durumu ilə maraqlandıq. Yarımmüdafiəçi öz çıxışını dəyərləndirərkən bir çox mövzuya da toxundu: "Xəzər Lənkəran”da olduğum bu qısa müddətdə çox şey gördüm. Azərbaycana gələnə kimi sizin futbolunuz barədə heç bir məlumatım yox idi. Mənə təklif gələrkən, az da olsa tərəddüd edirdim. Ancaq təklif Mirça Rednikdən gəldiyinə görə "yox” deməmişdim. Azərbaycana gəldim və qısa müddət ərzində futbolunuz barədə məndə müsbət fikirlər oyandı”.