Bu gün Azərbaycan futbolunda xüsusi yeri olan və futbola qədəm basdığı gündən daha çox tanınaraq ictimaiyyətin böyük sevgisini qazanan, "Xəzər Lənkəran”ın fəxri prezidenti, "Palmali” Şirkətlər Qrupunun prezidenti Mübariz Mənsimovun doğum günüdür. Hər bir azərbaycanlının qürur mənbəyinə çevrilən Mübariz bəyi sevmək üçün kifayət qədər səbəb var. Vətənpərvər, bacarıqlı iş adamı, ölkə xaricində yaşayıb, fəaliyyət göstərsə də demək olar aldığı hər bir nəfəslə belə Azərbaycanla yaşayır. O, dünyada böyük gəmiçilik şirkətinin sahibi olsa da Azərbaycanı və onun qəhrəman övladlarını unutmur və əlində olan bütün imkanlarla, ölkəmizi tərənnüm edir. Belə ki, dünya sularında üzən iritutumlu tankerlərinə Azərbaycanın igid və qəhrəmanlarının, böyük şair və yazıçılarımızın, ictimai xadimlərimizin, düşmənlərimizin vəhşiliklərini dünyaya tanıdılması vacib olan Xocalı kimi şəhərlərimizin adlarını verməklə, böyük bir təbliğat və ölkə həqiqətlərinin dünyaya çatdırılması kimi vətənpərvər iş görməkdə davam edir.

 Digər bir tərəfdən ölkəmizdə futbola gətirilən yeni nəfəs isə onun başçılığı altında yaradılan "Xəzər Lənkəran”ın ölkə birinciliyində çıxışı ilə başlayıb. Məhz onun dünya futbolunda tanınmış isimləri "Xəzər Lənkəran”a gətirməklə gördüyü işlər, ölkə futbolunun da nüfuzuna ciddi mənada xoş təsirlərini buraxmış məqamlardır. Zəngin futbol tarixi olan Lənkərana, ümumilikdə cənub bölgəsinə böyük futbolu, elə böyük səviyyədə qaytaran və bununla da biz futbolsevərlərə maddi dəyərlə deyil, böyük mənəvi dəyərlərlə sevinc bəxş edən bir şəxs olan Mübariz bəy haqqında geniş nələri isə yazmağa ehtiyac qalmır. Çünki onun gördüyü böyük vətənpərvər işlərdən azacıq məlumat, onun böyüklüyü haqqında lazımi təsəvvür yaradır. Hər halda onun haqqında ölkəmizin idman mediasında Mübariz bəyi  sevənlərin də, tənqid edənlərin də qəbul etdiyi bir fikir var- O, ölkə xaricində qazandığı pulları Azərbaycan futboluna xərcləyən və xərclədiyi paraların maddi olaraq geri gəlməyəcəyini bilə-bilə yenə xərcləməkdə davam edən yeganə şəxs, yeganə klub prezidenti, yeganə iş adamıdır.

Azarkeşlərlə birbaşa əlaqədə olmasa belə, onların tələbləri ilə birbaşa tanış olan və bu tələbləri lazımınca dəyərləndirən bir klub sahibi olan Mübariz bəy, az öncə dünyaca ünlü mütəxəssis Con Benjamin Toşakı "Xəzər Lənkəran”ın başına gətirməklə, azarkeşlərə və komandaya nə qədər önəm verdiyini bir daha sübut etmiş oldu. Maraqlı məqamlardan biri də elə odur ki, elə yeni uelsli çalışdırıçımızın da bu gün doğum günüdür. İki böyük simanın yəqin ki, arzuları arasında ən öndə olanı "Xəzər Lənkəran”ı layiq olduğu məqamda görməkdir. Bizdə bu arzunun tezliklə gerçəkləşəcəyinə inanır, həm fəxri prezidentimizə, həm də sevimli komandamızın baş məşqçisinə can sağlığı, uzun ömür və işlərində müvəffəqiyyətlər arzulayırıq.