Bildiyimiz kimi bu il Azərbaycan kubokunun XX yubiley yarışları keçirilir. Bir müddət əvvəl 1/16 mərhələdən başlayacaq yarışın püşkü də atılmışdı. Keçən ildən tətbiq olunan reqlament əsasında keçiriləcək bu yarışlarda 1/16və 1/8 mərhələdə komandalar cəmi bir görüş keçirməlidir. Elə bu görüşün qalibi də növbəti mərhələyə yüksələn komanda olacaq. ¼ və ½ mərhələsinin oyunları isə ev və səfər görüşlərindən ibarət olacaq və yalnız bundan sonra növbəti mərhələyə və finala yüksələn komandaların adlarına aydınlıq gələcək. Final görüşü isə həmişəki kimi paytaxtda keçiriləcək və yalnız bir oyundan ibarər olacaq. Bu oyunun qalibi isə Azərbaycan kubokunu başı üzərinə qaldıraraq yarışın qalibi adını qazanacaq.

Bildiyiniz kimi keçən mövsüm "Xəzər Lənkəran” yarışlarda inamla çıxış edərək kuboka sahib çıxdı. Bu il isə komandamız yenə çempionatdakı kimi bu yarışdada inamla çıxış etmək əzmindədir və kuboku özündə saxlamaqla bizləri sevindirmək gücündədir.

1/16 mərhələnin yarışlarında tək Premyer Liqa təmsilçisi "Sumqayıt Şəhər” komandası çıxış edib. Qalan komandalar isə birinci dəstə təmsilçiləri olub. Artıq 26 Oktyabrda keçirilən ilk mərhələnin qalibləri də müəyyənləşib. 1/8 mərhələdə bəzi Premyer Liqa təmsilçilərinin rəqibləri bəlli olsa da, bəzilərinin rəqibləri 1/16 final mərhələsindən gələcək komandalar olacaqdı. Dediyimiz kimi bu mərhələnin oyunları artıq keçirildiyindən 1/8 final mərhələsinin bütün iştirakçıları və əvvəlcədən atılmış püşk nəticəsində bütün rəqiblər məlumdur. Rəqibi məlum olmayan komandalardan biri də elə doğma "Xəzər Lənkəran” klubu idi. Belə ki, potensial rəqibləri 1/16 final mərhələsində qarşılaşacaq "Şuşa" - "Qaradağ Lökbatan" cütünün qalibi, 1/8 final mərhələsində komandamıza rəqib olacaqdı.

Artıq 26 Oktyabrda 1/16 final mərhələsinin oyunları keçirilib və IV cütün qalibi "Qaradağ Lökbatan” komandası olub. Beləliklə, 1/8 final mərhələsində komandamızın rəqibi "Şuşa” komandasına 2:3 hesabı ilə qalib gələn "Qaradağ Lökbatan” komandası olub.

1/8 final mərhələsinin oyunları isə 30 Noyabr 2011 ci ildə keçiriləcək. Tək oyunla qalibi bilinəcək bu matçda komandamıza uğurlar arzu edirik və düşünürük ki, səviyyə baxımından çox yüksək olan komandamıza "Qaradağ Lökbatan” komandası elə də başağrısı ola bilməyəcək.