Biz bu bəyanatı imzalayanlar, "12-ci Oyunçu” azarkeş qrupunun rəhbəri İslam Cabbarlı və "Bosman” fanklubunun rəhbəri Mirhafiz Babayev "Xəzər Lənkəran” klubunun mövcud vəziyyəti ilə əlaqədar, klubun fəxri prezidenti və eyni zamanda sahibi, həmçinin təkcə cənub bölgəsinin deyil, bütün Azərbaycan futbolunun inkişafı üçün böyük işlər görmüş Mübariz Mənsimov cənablarına 2012-ci il sentyabr ayının 1-də hər iki qurum rəhbərinin imzası ilə müraciət ünvanlamışıq. Müraciətdə, həmişə iddialı olan bir klubun indi turnir cədvəlinin aşağı pillələrində yer alması, qənaətbəxş oyun sərgiləməməsi və bir sıra məqamları qeyd etmişik. Klubun sahibi kimi Mübariz bəydən, bu enişə səbəb olan faktorların dəqiqləşdirilməsi və aradan qaldırılmasını, bu komandanın sadiq azarkeş qurumlarının rəhbərləri kimi xahiş etmişik.

            Bütün idman ictimaiyyətinin diqqətinə çatdırmaq istəyirik ki, məhz bu müraciətdən sonra ətrafımızda dolaşan qəribəliklər hiss etməyə başlamışıq. Düzdür, əvvəllər də komandanın subyektiv olaraq, qənaətbəxş oyun sərgiləmədiyi dövrlərdə yazdığımız araşdırıcı yazılardan sonra belə təhdid və hədə-qorxulara rast gəlmişik. Amma indiki məqamda belə hallar daha çox vüsət alınca, narahatlığımızı çatdırmağı lazım bildik. Müraciətdən sonrakı son günlərdə "12cioyuncu.info” saytının şərh bölmələrinə hədə-qorxu dolu təhdidlər, təhqirlər və guya nədəsə mən, İslam Cabbarlını ifşa edəcəkləri ilə bağlı fikirlər daxil olur. Telefonuma gələn müxtəlif nömrəsi bilinməyən zənglərdə də eyni şeylər təkrar olunur.

            Klubun sahibinə müraciətdən sonrakı son günlər "Bosman” fanklubunun rəhbəri kimi mənim də ətrafımda qəribəliklərin baş verdiyini deyə bilərəm. Mənə yaxın hesab etdikləri bəzi şəxslər müxtəlif adamlar tərəfindən yanıma göndərilir. Müraciətin konkret kim tərəfindən yazıldığı ilə dolayısı yolla maraqlanırlar. Təbii ki, müraciətin hər iki fanat qurumunun rəhbərlərinin imzası ilə göndərildiyi məlum olsa da, mən də müəyyən məsələni dəqiqləşdirmək üçün yanıma göndərilmiş həmin şəxsə bunu mənim yazdığım barədə bilərəkdən informasiya sızdırdım. İki gün sonra isə klubun yuxarı dairələrində müraciətin mənim tərəfimdən yazıldığı barədə informasiyalar gəlməyə başladı. Bunu "12cioyuncu.info” saytının şərh bölmələrində də görmək mümkün idi. Mən bu informasiyanı yanıma göndərilmiş adama sızdırdıqdan sonra şərhlərdəki xarakterin də dəyişdiyi aydın görünür. Həmin göndərilən şəxslərin klubda kimlərə "yaxın” olduğunu bildiyimdən məsələnin kökünə də yəqinliyim var. Daha sonra bu "yaxın” adamlar məni müxtəlif yerlərə dəvət edir və kimlərləsə birlikdə görüşmək təkliflərini irəli sürsələr də təbii ki, mən bunların heç birini qəbul etməmişəm. Həmin şəxslərin dediklərindən həm də o aydın olur ki, rəhbərliyə yaxın bir çox dairələrdə sizin haqqınızda informasiyalar toplanır, müzakirələr gedir və əyilməyən bir şəxs kimi də qiymətləndirilir.

            Hər ikimiz, bunu, yəni müraciətin kim tərəfindən yazılmasını dəqiqləşdirmək məsələsini isə onların konkret kimiunlə haqq-hesab "çürütmələrini” bilmək cəhdi kimi qiymətləndiririk.

            Müraciətimizdən sonra bu kimi hallar hansısa təhlükənin yaxınlaşdığı barədə siqnallardır. Belə insanların klubda işləməsi isə heç də yaxşı hal deyil. Onlar bilməlidirlər ki, klubun prezidenti olan Mais Mənsimov cənabları, həm də qardaş Türkiyə respublikasının ölkəmizin cənub bölgəsi üzrə fəxri konsuludur. Klubda Mais Mənsimovun tabeliyində çalışan belə insanlar düşünməlidirlər ki, baş verə biləcək hər hansı narahatlığa görə, həm ölkəmizi və həm də qardaş Türkiyə respublikasını və onun cənub bölgəsi üzrə fəxri konsulu Mais Mənsimovu pis vəziyyətdə qoya bilərlər. İnanırıq ki, bu bəyənatdan sonra Fəxri konsul və eyni zamanda klubumuzun prezidenti olan Mais bəy qətiyyətlə bunların qarşısını alacaq və lazımi tədbirlərini görəcək ki, hər hansı narahatlıq baş verməsin. Bununla da əmin olmaq istərdik ki, bizə olan təhdidlər və telefonumuza gələn gizli zənglər barədə Hüquq Mühafizə orqanlarına müraciət etməyimizə ehtiyac qalmayacaq.

            Onu da bildirək ki, sevimli komandamız olan "Xəzər Lənkəran”ın bu günki durumu bizim kimi minlərlə azarkeşi də qane etmir və bu barədə klubun sahibi Mübariz Mənsimov cənablarından tədbirlər gözləyirik. Biz bütün bunlara baxmayaraq yenə də komandamızı dəstəkləməkdə davam edəcəyik və onun Azərbauycan futbolunun inkişafında rolunu görməkdən qürur duyuruq.

İmza: "12-ci Oyunçu” azarkeş qrupunun rəhbəri İslam Cabbarlı

            "Bosman” fanklubunun rəhbəri Mirhafiz Babayev  

02 Oktyabr 2012