"Xəzər Lənkəran” bizim komandamızdır, onu sevənlərin komandasıdır. Bu üzdən daim diqqət mərkəzimizdədir və daim müzakirə mövzumuzdur. Ən son olanlar isə yenidən komandaya qaytarılan qapıçı Kamran Ağayevin yenidən kaprizlərə başlaması və bununla əlaqədar mətbuat və televiziyaya çıxması azarkeşlərin həm söhbətlərdə və həm də sayt və sosial şəbəkələrdə qızğın müzakirəsinə səbəb olub. Müzakirələr bir az əvvəlki dövrləri də əhatə edərək, Rednikin gedişində onun roluna və ya haqlı olmasına qədər gedib çıxır. Müzakirələrdə həm də yerli kadrlara və əcnəbilərə münasibət də yer alır. Bütün fikir bildirənlərə təşəkkür edərək onu bildirmək istəyirik ki, çoxdan yaranmış bu problemə hər kəs müəyyən təəssübkeşliyi ilə yanaşıb. Bütün fikirlərdə həqiqət bu və ya başqa formada bildirilib. Ona görə də hamısına hörmətlə yanaşırıq. Amma məsələyə bir var ki, ümumi konteksdən yanaşasan, bir də var ki, konkret yanaşma nümayiş etdirəsən. Bu məsələyə ümumi konteksdən yanaşma dövrü arxada qalıb. Çünki yerliçilik, əcnəbi söhbətləri çox müzakirə olunub. Əlbətdə yerli kadrlar nə qədər lazımi səviyyədə və nə qədər çox olarsa, bu millətin inkişafının göstəricisi sayılar. Amma müqəddəslərimizin "Əgər elm uzaq Çindədirsə, onu gedib öyrənmək lazımdlr" kimi kəlamlarını da unutmamalıyıq. Bu fikirlər tarixin sınagından keçmiş olduğundan mübahisə obyekti ola bilməz. 

Bu mənada hər hansı bir əcnəbidən nəsə öyrənmək lazımdırsa, bunu əlbətdə etməliyik. Yoxsa özümüzə qapanıb bizdən başqa yalandır fikri, bizi çox geridə qoya bilər. Allah başda Hacı Zeynalabdin Tağıyev kimilərə rəhmət etsin ki, öz şəxsi vəsaitləri hesabına, millətini düşünərək neçə-neçə azərbaycanlıları xaricdə təhsil alaraq dünya təcrübəsinə yiyələnmək üçün göndərib oxutmuşdur. Bu gün bu dövlət səviyyəsində də həyata keçirilir. 

Bu mənada Rednik məsələsinə yanaşdıqda, həqiqətən bizim, futbol mənasında onun kimi mütəxəssislərdən öyrənməyə çox ehtiyacımız var. Müzakirələrdə Rednikin əgər yaxşı mütəxəssis olsaydı Azərbaycanda və ərəb ölkələrində niyə işləyirdi? Kimi fikirlər də səsləndirilib. Cavab olaraq bəzi şərhlərdə isə adlı-sanlı məşqçilərin Asiya kimi futbolu zəif ölkələrdə işləməsi də qeyd olunub. Skolari, Ziko kimi məşqçilərin hətda orta asiya ölkələrində işləməsi misal göstərilib.

  Bunun nəyi pisdir ki, həmin ölkələr də onların təcrübəsindən yararlanmaq istəyiblər. O cümlədən biz də Rednik kimi mütəxəssisdən. Rednikin "Xəzər Lənkəran"da işlədiyi dönəmi yadımıza salsaq, komandanın nə qədər yüksəlişdə olduğunu bir daha göz önünə gətirmək olar. Yoxsa, indiki bərbad oyunlar və bərbad ab-hava ilə 10-12-ci yerləri bölüşdürmək bəlkə daha yaxşıdır? 

Mirça Rednik bu gün komandada deyil. Hansı müsbət dəyişikliklər var? Əgər varsa, buyurun deyin! Rednikin zamanında Kamran Ağayevin kaprizləri daha şiddətli idi. Oyunlara çıxmamaq, məşqləri yarımçıq qoyub, istədiyi vaxt düşərgəni tərk etmək kimi özbaşınalıqlar və sair və ilaxır. Özü də onda o, tək də deyildi. Qoşulanları da var idi. Hətda mətbuat və futbol qurumlarını da bura əlavə etsək, vəziyyətin necə acınacaqlı olduğu ortada idi. Məhz Mirça Rednikin həqiqi böyüklüyü sayəsində o vaxt bunlar güclü nizam-intizam sayəsində qaydaya qoyula bilirdi. Daha bugünki kimi hətda teleekranlara belə gedib çıxmırdı. İndi ki, Rednik yoxdur. Yerli deyə hayqıranlar indi də bunu görmürmü? Məşqçi yerli, köməkçilər yerli, idarəçilər yerli.

İndi bir Kamranın məni sayan olmadı deyərək, düşərgəni özbaşına tərk etməsi niyə bu qədər qloballaşıb mətbuatın gündəmindən düşmür? Hətda televiziya ekranlarına çıxaraq daha geniş kütləyə çatdırılır? İndi ki, Rednik yoxdur! Daha əcnəbi mütəxəssislər yox, hamı yerli mütəxəssislərdir. Deməli, biz özümüz-özümüzü yandırmışıq. Yüksəlişdə olan bir komandanı hansısa ucuz kaprizlərə qurban vermişik. Guya səbəbkar Rednik idi deyə, vəziyyətdən çıxma yolunu onun gedişində görmüşük. Bəli, belə eybəcər nəticəyə gəlib, min bir yolla ədalətsizliklər etdik. Elə bir komandanı uşaq-muşaq əlinə verdik. Bu idimi bizim çıxardığımız nəticə və atdığımız addımlar? Komandanın bu günki durumu hər kəsə sübutdur. Bunun müzakirəyə belə ehtiyacı qalmayıb. Redniki uzaqlaşdırmaqla, elə nə qədər özümüzə xəyanət etmiş olduq. Yaxşı günlərini pis günlərə dəyişənlərə başqa ad vermək mümkündürmü?

Kamran Ağayevin son teleekranlarda çıxışı da çox mətləblərə aydınlıq gətirdi, dediklərimizi bir daha sübut etdi. Adamın milli komandanın çılxışı ilə əlaqədar dediyi bir fikir vardı;-millinin belə zəif çıxışında həm baş məşqçi Berti Foqtsun günahı var, həm də bizim. İlk baxışdan guya təvazökarcasına deyilmiş fikir kimi görünür. Amma diqqətlə yanaşdıqda, futbolçunun məşqçini belə günahlandırması nə dərəcədə düzgündür? Baş məşqçi əleyhinə kimliyindən asılı olmayaraq belə bir çıxış edən futbolçu cəzadan kənarda necə qala bilər? Bu əcnəbi dünyanı bəyənmədiyimiz hansı ölkədə baş verə bilər? İşin maraqlı tərəflərindən biri də o idi ki, artıq məşqçilik fəaliyyətinə başlamış Aslan Kərimov da studiyada olaraq, bu fikirlərin təsdiqinə qoşulur. Bir demir ki, ay futbolçu, sən kimsən ki, məşqçilik fəaliyyətini tənqid edirsən? Sənə bu səlahiyyəti kim verib? İndi yerli məşqçi Aslan Kərimov hansı iradəylə məşqçiliyini davam etdirəcək? Bəli, belə fikirlər Rednikin arxasıyca da çox deyilmişdi. Deməli, susan Aslanlar heç zaman Rednik kimi səviyyəli mütəxəssis ola bilməyəcək. Və biz də yerli qətiyyətsizlərin ümidinə qalıb, futbolumuzdan inkişaf gözləməliyik. Səviyyəli əcnəbilərə isə yerli materiallardan torba tikməliyik. İnkişaf et ölkə futbolu! Görək necə edirsən? Sözümüz həm də verilişdə iştirak edən, hörmət bəslədiyimiz Ceyhun bəyədir. Ceyhun bəy azarkeşləri qınayaraq, niyə oyunun əvvəlində istefa qışqırmalarını anlamadığını söyləyir. Deyir ki, hələ oyunun bitməsinə çox qaldığından komanda bəlkə 3, bəlkə də 4 top vuracaq. Razıyıq, Ceyhun bəy! Əgər bir oyunla məsələyə qiymət verməkdən söhbət gedirsə. Amma hamı kimi siz də bilirsiniz ki, "Xəzər Lənkəran”ın dərdi elə bu oyun deyil. "Xəzər Lənkəran” kimi komanda uzun müddətdir ki, mənliyini axtarıb tapa bilmir. Baş məşqçi isə, sizin dediyiniz kimi komandaya 3-4 top qazandırmağın yolunu çoxdan itirib, əvəzində 3-4 dəfə istefa verib, ətrafı istefaya göndəriləndə müdafiə edə bilməyib. Oyunun bitiminə qalan hansı 60-70 dəqiqədən danışaq ki, 6000-7000 dəqiqədir ki, komanda özünə gələ bilmir. Söhbət kiminsə istefasından getmir. Biz fanklub olaraq, istefa qışqırılmasını çıxış yolu saymırıq. Amma nəhəng bir komandanın çöküşünə də dayana bilmirik. Bunun üçün də lazım olan addımların atılması xahişiylə klubun sahibinə müraciət də etmişik. Bəli, Ceyhun bəy, sizdən də bir oyuna görə yox, ümumi qiymət gözləyirdik. Həm də azarkeşlər niyə yerli məşqçilərə qısqanc yanaşırlar? sual doğru fikrinizə bir il əvvəlki "Xəzər Lənkəran”la, bugünki "Xəzər Lənkəran”ı müqayisə etmənizi istəməklə cavab veririk. Yanınızda futbolçu məşqçini tənqid edir, buna nə Aslan və nə də siz münasibət bildirmirsiniz. Yetişəcək olan Aslan nə qədər qətiyyətsiz olacaqsa, azarkeşlərin qətiyyətsiz məşqçiliyimizə münasibəti də sizin cavabınız sayıla bilər. Tənqid etmək fikrindən uzaq olsaq da, sizlərdən qətiyyət gözləməyə haqqımız çatır. Axı bunu Mahir Rüstəmli kimi siz də deməliydiz. Biz sizləri gələcək ədalətsevərlər kimi tanımaq istəyirik.

Qətiyyətdən söz düşmüşkən 6 şikayətçi futbolçunu göndərin, ya da özünüz gedin tələbinə Mirça Rednikin cavabı belə olmuşdu: "Onları komandaya mən gətirmişəm. Necə olur ki, onları kənarlaşdırım, özüm isə buradan maaş alım? Əgər hər şeyi belə tələsik istəyirsinizsə, yaxşısı budur özüm gedərəm!” Belə qətiyyətli yerli mütəxəssislərimiz də yox deyil. Qapıçılarla işləyən məşqçimiz Hafiz Əliyev, Kamran Ağayevin qaytarılmasına münasibət soruşulanda: O məni bir məşqçi kimi bəyənmədiyini və arxamca çox söz danışdığını bilərək, mən ona necə məşq keçə bilərəm? Qoy kimi bəyənirsə, elə onunla da məşq etsin. Mən ona məşq keçməyəcəıyəm! Fikirlərini qəzetə də açıqlamışdı. Lənkəran futbolunun canlı əfsanələrindən sayılan bu son dərəcə hörmətli şəxsiyyət və nüfuz sahibi karyerasını bəlkə də təhlükə altına qoysa da sözünün üstündə duraraq, qətiyyət göstərdi. Məhz belə qətiyyət hesabına komandamız düşdüyü intizamsız günlərindən qurtula bilər. Komandanı bugünki vəziyyətdən çıxara biləcək insanlar məhz belə qətiyyət sahibi olmalıdır. Halal olsun belə insanlara. Onlar doğurdan da şəxsiyyətdirlər.  

Verilişin ən sonunda isə açılan bir həqiqət, ədaləd məvhumunun yaşadığına bir işarə idi. Bəli, ən sonda həmişə Redniki mən Rednik eləmişəm deyən Kamran Ağayev bunları dedi: "Mirça Rednik doğurdan da çox güclü mütəxəssis və nizam-intizamı sevən biriydi.”