3-cü turda "Xəzər Lənkəran” - "İnter” görüşünü idarə edən baş hakim Fariz Yusifovdan azarkeşlərimizin də narazı qaldığını deyə bilərik. Məhz onun hər xırda fola fit çalaraq oyunun tempinin öldürülməsi, ümumilikdə "Xəzər Lənkəran”a antipatiyasının aşkar görüntüləri, fiziki hazırlığının zəif təsir bağışlaması, elə bunun nəticəsində də epizodlara uyğun yer seçə bilməməsi, onun oyun ərzində çoxlu səhvlərə yol verməsinə gətirib çıxarırdı. Futbolçuların simulyasiya etməsi və ya həqiqi zədələnmələrinin təyin edilməsində aşkar çətinlik çəkən Fariz Yusifov bununla ilk dəfə deyildi ki, belə səhvlərə yol verir və "Xəzər Lənkəran”a antipatiya nümayiş etdirirdi.

           Bu məsələ bəzi yazarlara da bəhanə verirdi. Konkret olaraq həmin matçla bağlı  Erkin adlı birinin "Xəzər Lənkəran”ın zəif çıxış etdiyini bildirir və qol vura bilməməkdə, hətta komandanın azarkeşlərini aldatdığını belə dilə gətirirdi. Erkin adlı yazara biz əvvəlki yazılarımızda cavab vermişdik. Cavabımızda "Xəzər Lənkəran”ın qol vura bilməməsi səbəbləringən biri kimi, baş hakimin komandamızın oyununa mənfi mənada qərarlar verməsini də göstərmişdik. "Xəzər Lənkəran” neyləsin ki, hər dəfə kəskin hücuma keçdiyi zaman kimsə özünü yerə yıxır və ya heç bir səbəb olmadan baş hakim fit çalaraq oyunu saxlayır.

          Yerli-yersiz fitlər isə ümumiyyətlə futbolumuzu bərbad hala salıb, oyunlarda sürətin xeyli aşağı düşməsinə səbəb olur. Bir daha Erkinkimilərin nəzərinə çatdırmaq istəyirik ki, AFFA-nın Hakimlər Komitəsinin son qərarı ilə tanış olsun. Hansı ki, adı çəkilən matçla bağlı, oyunun baş hakimi Fariz Yusifovun qeyriqənaətbəxş idarəçiliyi ilə bağlı təcrübəsiz hakim kimi, 1-ci divizionun oyunlarını idarə etməyə göndərilmişdir

          Buyurun tanış olun:

          AFFA-nın Hakimlər Komitəsi I divizionun ilk turuna təyinatları açıqlayıb. Apasport.az saytının məlumatına görə, əsasən gənc və təcrübəsiz ədalət təmsilçilərinin fit çaldığı aşağı dəstənin ilk turunda FİFA referisi də iştirak edəcək.

           Bu, "Şahdağ” və "Bakılı” arasında Qusarda keçiriləcək görüşə təyinat alan Fariz Yusifovdur. Unibank Premyer Liqasının III turunun müəyyən narazılıqların yaşandığı "Xəzər Lənkəran” - "İnter” görüşünü idarə edən 38 yaşlı hakimin sonrakı tura təyinat almamağı müəyyən ehtimallara əsas vermişdi.

           Hakimlər Komitəsi bu dəfə də ədalət təmsilçisinin cəzalandırılıb-cəzalandırılmamağını gizli sirr kimi saxlasa da, indi hər şey üzə çıxıb. Belə ki, ölkənin 3 FİFA referisindən biri olan Yusifovun IV turda "istirahət edib”, I diviziona "ezam olunması” məhz cəza tədbiri funksiyasını daşıyır.